Ads by Google Ads by Google

Poloaiga a le Kovana e fa’avae ai Ofisa fou malo i Manu’a

ausage@samoanews.com

Ua maea sainia e le afioga i le ali’i kovana ia Lolo Matalasi Moliga lana ulua’i poloaiga i le tausaga fou lenei 2017, e aloaia ai le fa’atulagaina atoa ai ma le Puleaina o le Ofisa a le malo i le itumalo o Manu’a.

 

Ina ia tusa ai ma le malosi ua mae’a ona tu’uina mai e le Fa’avae Toe Teuteuina a le malo o Amerika Samoa, i le Kovana na te sainia ai se poloaiga, ua manatu ai loa le faigamalo ina ia sainia lenei poloaiga e aloaia ai le fa’avaeina o le Ofisa o le malo i Manu’a.

 

I se vaega o lenei poloaiga o loo taua ai e fa’apea, ua faitau miliona ma miliona se vaega tupe ua fa’aalu e le malo e fa’atinoina ai le fausiaina o atina’e tetele i totonu o le itumalo o Manu’a i nofoaga i Ta’u, Ofu ma Olosega, ma ua mae’a fo’i ona fa’atula’i e le malo ta’iala ma tulafono e fa’atautaia ai galuega fa’atino a Matagaluega ma Ofisa Tumaoti a le malo ua i ai i le itumalo o Manu’a.

 

O le fa’atupulaia o le i ai lea o Ofisa ma Matagaluega eseese uma a le malo i Manu’a, aemaise ai tagata faigaluega e to’atele ua galulue mo le fa’atinoina o galuega mo le manuia o Manu’a, e tatau ai ona i ai se pule fa’amalumalu mo le vaaia atoa ai ma le tausia lelei o meatotino a le malo i Manu’a.

 

O auaunaga ma tautua ua fa’atinoina e ofisa uma ma matagaluega a le malo i Manu’a, e tatau ona o gatasi ma soo se tautua ma auaunaga o lo o maua i le motu o Tutuila nei, o le mafua’aga fo’i lena e taua tele ai le tatau lea ona atoatoa o le tautua i Manu’a, e le gata e si’itia ai pea tulaga tau i le tamaoaiga o le malo, ae mafai ai fo’i ona maua isi atina’e eseese e pei o turisi ma fa’atoaga, lea fo’i o loo galulue le malo e fa’aleleia lona malosi i Tutuila nei.

 

“O le soifua fiafia o tagata i Manu’a atoa ai ma tulaga tau i le atina’eina o lona tamaoaiga, o se tulaga lea ua tatau ona si’itia i luma, i le tuana’i ai o tausaga e 112 sa le amanaiaina ai le itumalo atoa ai ma le leai o ni fa’agaioiga tau i le atina’e sa fa’atinoina ai”, o se vaega lea o le poloaiga a le ali’i kovana.

 

E ese mai i le tulaga o le tamaoaiga o Manu’a, ua i ai fo’i le manatu o le malo ina ia si’itia le tulaga o le Soifua Maloloina o tagata, e ala i le fa’aleleia atili lea o tautua eseese e pei o tagata faigaluega ma mea e fa’atinoina ai galuega, ina ia mafai ai ona fa’alaua’itele le tautua i totonu o le itumalo.

 

Ina ia mautinoa o loo aga’i pea i luma tautua eseese mo le itumalo i le tamaoaiga aemaise ai o le olaga fiafia o tagata, ua manatu ai le malo e tatau ona mata’ituina gaioiga uma nei ina ia mautinoa e tupu pea ma aga’i i luma.

 

O le toe fa’aleleia o le va galulue vavalalata ma sui o le Feterale i Manu’a, o le isi lea tulaga ua manatu le malo e tatau ona fa’aleleia, ma ia taumafai fo’i e faia fa’aaoaoga uma e suia ai ituaiga lagona ma mafaufau o tagata faigaluega a le malo, o le galulue fa’atasi lea o tagata uma mo le manuia o le malo ma le atunu’u atoa.

 

O le atina’eina o tulaga tau pisinisi i Manua, o se tasi lea o auala e manatu le malo e tatau ona si’itia ma fa’aleleia, ina ia mautinoa e fesoasoani malosi ai i le atina’eina o le tamaoaiga o le malo, e oo fo’i i le tautua a le Matagaluega o Aoga, e mana’omia le fa’aauau pea ona fa’aleleia ma si’itia i luga, fa’atasi ai ma le fa’aleleia o isi auaunaga e pei o faleaoga, auala o femalagaaiga, polokalame o le Taumafa o Aoga aemaise ai tulaga i faiaoga.

 

“O le saogalemu atoa ai ma le soifua fiafia o tagata o loo alala ma nonofo i motu o Manu’a, o le isi lea tulaga e tatau ona fa’atumauina pea, o le mafua’aga fo’i lea e mana’omia ai ni isi ua mae’a ona a’oa’oina lelei latou te fa’atinoina ia auaunaga e pei o Leoleo, vaega Fuimu, Leoleo e galulue mo le puipuiga i le gataifale (marine patrol), faapea ai fo’i ma ta’avale falema’i”, o se vaega lea o le poloaiga a le ali’i kovana.

 

E le gata i atina’e o loo manaomia le fa’aleleia mo Manu’a, ae mana’omia fo’i le fa’aauau lea o le tulaga lelei ma le malosi o auaunaga o le eletise, suavai, suavai lafoa’i fa’apea ai ma le suavai taumafa o loo i lalo o le vaavaaiga a le Pulega o le Eletise ma le Suavai a Amerika Samoa (ASPA), ina ia mautinoa e maua uma e aiga ma pisinisi i totonu o le itumalo lenei auaunaga taua.

 

“O le si’itia atoa ai ma le fa’aleleia o auala o femalagaaiga i le ea ma le sami mo Manu’a, o le isi lea tulaga e tatau fo’i ona matua fa’amalosia pea i soo se taimi”, o se vaega lea o le poloaiga a le ali’i kovana.

 

Ina ia mautinoa e ausia uma le fa’atinoina o tulaga e pei ona taua i totonu o le poloaiga a le ali’i kovana, mo le fa’aauau pea lea o le soifua lelei ma le manuia o tagata i Manu’a, o le Fa’atonu o le Ofisa o le malo i Manu’a o le a gafa ma le fa’amalosia o tulaga uma e pei ona taua.

 

O ona tiute tauave e aofia ai faamalosia o vaega uma o le poloaiga, galulue fa’atasi ma Ta’ita’i lagolago, aemaise ai o le tu’uina atu o fa’atonuga i tagata faigaluega uma a le malo i Manu’a mo galuega e fa’atinoina, atoa ai ma le fa’atutumuina o avanoa faigaluega e moomia mo Manu’a.

 

O le aso 4 Ianuari 2017 na aloaia ai le poloaiga lenei a le kovana.