Ads by Google Ads by Google

Rev. Fa’atauva’a: Ou te le i taliaina tu’uaiga sese fa’asaga ia te a’u

ausage@samoanews.com

Na fa’amanino e le susuga a Fa’atauva’a Talamoni lea sa avea ma Faifeau a le Ekalesia Faapotopotoga Kerisiano i Amerika Samoa (EFKAS) i le afioaga i Pago Pago i le vaiaso nei e fa’apea, e leai se taimi na tu’uina atu ai sana fa’amatalaga i luma o le Komiti a le Au Toeaiina a le EFKAS na te taliaina ai tu’uaiga sese sa faia e ni isi o le aulotu fa’asaga ia te ia, e pei ona faia ai le fa’aiuga e fa’amalolo lona tofi Faifeau.

 

O le mae’a ai ona lomia e le Samoa News o se ripoti i le vaiaso na te’a nei, e tusa ai o le fa’aiuga a le Au Toeaiina o le Ekalesia e fa’amalolo ai le tofi Faifeau a le susuga a Fa’atauva’a Talamoni mo le 3 tausaga, na maua ai loa le avanoa e feso’ota’i mai ai le susuga a Talamoni mai lona aiga i Oklahoma i Amerika, mo le fia tu’uina mai o sana saunoaga e tusa ai o le ripoti sa fa’asalalauina e le Samoa News.

 

I le ripoti e pei ona fa’asalalau e le Samoa News, i le mae’a ai lea o se fa’atalatalanoaga ma le Failautusi o le Komiti a le Au Toeaiina a le Ekalesia, susuga Rev. Elder Leatulagi Fa’alevao, o lo o taua ai le talia ma le agaga fiafia e le susuga a Talamoni o le fa’aiuga a le Au Toeaiina ua tu’uina atu ia te ia, e fa’amalolo ai lona tofi faifeau mo le 3 tausaga.

 

“Sa ma taliaina ma le loto maualalo le ma tula’i ese lea ma Pago Pago, ina ia tausi ai le filemu, e pei ona fautuaina ai i maua e le ma Toeaina, ma le fa’amatalaga sa tu’uina mai, e sau se taimi ona aami lea o i maua e Tama o le Ekalesia, peita’i ane e le i aamia lava i maua. Ou te le i faia lava se tala fa’apea ua ou taliaina moliaga pepelo e tele ua ta’u leagaina ai a’u ma si o’u to’alua, ua mae’a ona faia le fa’aiuga a le Au Toeaiina mo maua, e aunoa ma le feso’ota’i mai e fesiligia i maua”, o le saunoaga lea a Talamoni.

 

“E fia fa’ailoa i le Ekalesia aoao ma le atunu’u, ou te le o toe taumafai e fai se fa’amatalaga ina ia toe suia ai le fa’aiuga ua faia mo a’u ma si o’u to’alua e le Au Toeaiina, pau le itu e fia fa’ailoa, ua lagona lo ma fa’anoanoa i le fa’aiuga ua faia ae aunoa ma ni mau e lagolagoina ai, atoa ai ma le tele o tala sese ua fa’atupu solo ua ta’u leagaina ai i maua ma le aiga”.

 

“O le mea sa’o lava na tupu, sa ou pisapisao i luma o le fale o le faifeau i le afiafi o le aso Gafua, ina ua mae’a le Kerisimasi, ona o tulaga lava i lo ma aiga ma si o’u to’alua, ae ou te le i pa’i lima i se tasi e pei ona tu’uaia ai a’u, ae sa pule tutu e ni isi o le nu’u le fa’aiuga ina ia ma tula’i ese, ae le o le finagalo lea o le Ekalesia atoa”, o le saunoaga lea a Talamoni, atoa ai ma lona taua o suafa o ni isi o le au matutua o le aulotu sa latou faia fa’amatalaga le sa’o i le Au Toeaiina e fa’asaga ia te ia ma lona to’alua.

 

O le mataupu e fa’atatau i le aulotu i Pago Pago ma le susuga a Talamoni, na tofu atu i le Komiti a le Au Toeaiina ina ua tu’uaia le ali’i faifeau i lona fa’ao’olima.

 

Saunoa atili le susuga a Talamoni e fa’apea, sa i ai lava lona manatu maualuga e lavea’i e le Au Toeaiina i laua ma le la galuega ina ua tula’i mai le fa’alavelave, peita’i ane e le o le tulaga lea sa i ai, sa ia talosaga fo’i ma loimata i sui o le aulotu i Pago Pago mo se avanoa e fono ai le aulotu atoa ae se’i fa’aleo sa laua fa’atoesega i luma o le aulotu atoa ae le i oo atu i le po o le vaeluaga o le tausaga fou na mavae atu nei, ona o le tulaga e pei ona ia pisapisao ai i luma o le maota o le galuega, peita’i sa matua teena lava e se tasi o Tama matua o le Ekalesia.

 

“O le aso Sa muamua o le tausaga lenei ina ua mae’a le sauniga o le Fa’amanatuga, sa fai ai le ma ifoga, na ma to’otutuli ai ma si o’u to’alua i luma o le nu’u ma le aulotu i Pago Pago ma ma fa’atoese i ai ona ua ou sese, peita’i ane e le i taliaina la maua ifoga, o lea na ma tula’i ese ai ma le agaga maualalo ina ia tausi le filemu, ona ua malosi tele le fa’amata’u mai a se tasi o Tama matua o le Ekalesia”, o le saunoaga lea a Talamoni.

 

E pei ona taua e le susuga a Talamoni i le Sama News, e fa’alua ona alu le savali a le aulotu i Pago Pago i le Komiti a le Au Toeaiina o le Ekalesia aoao, ina ia tu’u se avanoa ia te i laua ma si ona to’alua, na o o lava ina to’otutuli le aulotu i luma o le Au Toeaiina, peita’i ane sa le i taliaina lava le talosaga.

 

“E pei ona ou fa’ailoa atu, ou te le o toe taumafai lava e fai se tulaga ina ia fesiligia ai le fa’aiuga a le Au Toeaiina ua faia, po o se tulaga fo’i ina ia atagia mai ai lo’u toe taumafai e sui le fa’aiuga, pau le tulaga ou te mana’o e fia fa’asa’o, ou te le i taliaina lava tu’uaiga sese e pei ona ta’u leagaina ai lo’u igoa, e le i maua fo’i se avanoa e fa’aleo ai ni o ma lagona ma si o’u to’alua i luma o le Komiti a le Au Toeaiina, a o lea lava ua faia la latou fa’aiuga, o le mafua’aga tonu lena ua vaeluaina ai le aulotu i Pago Pago, ona o le fa’aiuga e fa’atula’i ese i maua sa faia e sui e to’atolu o le aulotu, ae o le i finagalo i ai le 95% o le aulotu”, o le saunoaga lea a Talamoni ma ia taua ai suafa o i latou e to’atolu sa faia fa’amatalaga ma tu’uaiga le sa’o fa’asaga ia te ia i luma o le Au Toeaiina.

 

Saunoa atili le susuga a Talamoni e fa’apea, ua mae’a sa latou feiloaiga ma ni isi o le aulotu a Pago Pago sa malaga atu ma latou feiloa’i i Amerika i se taimi e le i mamao atu, ma ia fautuaina ai i latou ina ia galulue pea e tausi le filemu i totonu o le ekalesia a le Atua, ma taumafai ina ia toe faia se leleiga i le lotoifale o le aulotu.

 

“E tumau pea o ma lagona alofa i le aulotu i Pago Pago aemaise ai lava le aufaigaluega a le afioaga, ae o le itu fo’i e tatau ona tatou mafaufau i ai, ia tatou manatua le poloaiga mulimuli a lesu, ia tatou fealofani”, o le saunoaga fa’ai’u lea a le susuga a Talamoni.