Na aofia le mamalu o le faigamalo a Amerika Samoa i ona tafa e tolu, Le afioga le Kovana Lolo Matalasi Moliga ma le Faletua ae maise le kapeneta, le Fa’amasino Sili Michael Kruse ma lana vaega o Fa’amasino Samoa, Le affoga le Peresetene o le Fono Faitulafono ma le Fofoga fetalai o le Maota ma Sui Tofia mamalu o le Fono Faitulafono, i le Gov.Lee Auditorium i Utulei mo le sauniga mamalu e amatalia ai le polokalama fa’apitoa a le Malo mo lana Sisigafu’a o lenei tausaga 2017. Na aofia atu ai fo’i malo valaulia: Nikolao Pula mai le Ofisa o le Initeria;  Ao Mamalu o le Malo o Samoa, Le afioga TuiAtua Tamasese Tupuola Efi ma le Faletua Filifilia ma nisi o sui o le US Coast Guard, US Army Reserve ma le vaega a le US Marines.

Sa auai fo’i aufaipese mo le fa’amoemoe e peseina vi’iga o lea sauniga. Le Aufaipese a le A’oga maualuga a Samoana i le taita’iga a le susuga Pati Pati Jr. ma le aufaipese a le A’oga Maualuga a Kanana Fou i le ta’ita’iga a Peseta Tia Seloti.

O le sauniga lotu sa faia i le aoauli o le aso Sa ua te’a. Ma sa ta’ita’ia e le susuga le Fa’afeagaiga mai Hawaii Rev. Elder Falelua Lafitaga ma sa lautogia fo’i le susuga le Faife’au Adney Reid, le Peresetene o le LDS Pago Stake, na te faitauina le Tusi Pa’ia.

I le Upu a le Atua sa tapena e Rev. Lafitaga na fa’aautu lea i le tapenaga o le fanau talavou, e o latou aiga, le afio’aga, le ekalesia ae maise le malo.

“Aisea ua tatou tapena ai tatou fanau i le sailia o le poto lautele, ae ua le ta’ita’ia le lima o lau tama i le Lotu? Ua misi ea ia i tatou matua le mea sa tatau ona fa’amuamua, ia tapena lava fanau i le iloa o lona Atua ona maua lea e ia le ola mata’u, usiusita’i ma le fa’alogo?”

O se fesili sa ia toe fa’ailoa atili, le fa’aeaina o le olaga o le Tupu o Tavita, na mua’i amata ao talavou ma la’ititi lava ona o lona ola mata’u, lona ola fa’alogo i lona Atua, lona ola usiusita’i i lona vala’auina, ma o lona le fefe e faia le finagalo o lona Atua i taimi ua lutia ai lona nu’u.

“Ua vave i tatou matua i le fa’apotoina o a tatou fanau i Ipad, iPod, iPone, ma isi mea uma ua oo vave ai i tatou i le ICU. Aisea ua tatou vavevave ai i nei mea e foliga mai ua aumaia ai le poto lautele i le fanau, ae le o le poto ea e sili ona tatou mo’omia o le iloa e le tamaititi o lona Atua, o isi mea uma e foa’i mai e le Atua i le fanau? O fea ea ua i’u la i ai tatou naunauta’iga nei, sa faia ma le manatu e maua ai manuia tetele o aiga? Ua tali mai ea, pe ua fa’ateleina ai le tete’e o fanau, fete’ena’i lagona, ma ua atili ai ona tele fa’alavelave e tutupu mai i o latou olaga ona o nei tomai ua atili televave ai lo latou olaga ae nimo ai le va’ai a matua ona e le’i tapena vave fo’i i latou e iloa so’otaga o nei meafaigaluega telea’i ua tatou tu’u atu i fanau e fa’aaoga.”

“Ua tele fo’i vaila’au o’ona ma le fa’asaina ua fa’aoga e le fanau, ua atili ai ona faigata ona fa’alogo i latou ma usiusita’i. Ua le faigofie ai lo tatou faiva, peita’i, po’o le a le telea’i o le olaga nei, ae a mautu le talitonuga o fanau i lo latou Atua e alofagia i latou ma le savaliga o lo’o foufou mai. Lea la ua atili vevesi le lotoifale ona ua lutia le ola puipuimalu o le fanau ona ua lutia fa’atasi i latou ma mea fa’aletonu ua a’afia ai lo latou saogalemu. O le a se mea a fai i nei ituaiga o fa’aletonu ma ona a’afiaga i le lumana’i o na fanau? Ia taofiofi mai le so’ona vave i ituaiga o tomai e ala mai ai isi mau mea e a’afia ai le mafaufautonu o matua, lena ua lepetia fa’atasi lagona o matua ma fanau, ua mapuna mai ai mea mataga ma ua le saogalemu ai olaga o nisi o fanau a le atunu’u.”

“Fa’amoemoe atili i le Atua na te toe faia se isi taeao fou mo nai na fanau. Peita’i, ia faia ma le toto’a o tatou tiute fa’atino i totonu o tatou Aiga i le ta’ita’iga o olaga o le fanau ia saogalemu le latou savaliga i le lumana’i. O le atoaga o le olaga o le fanau a Amerika Samoa e amata mai lona olaga, matua ia sa’o lau ta’ita’iga, ia fa’alogo le tamaititi i lona Atua, ia iloa ola matau i lona Atua, e iloa fo’i e le tamaititi lena usita’i ma fa’alogo i ona matua, le fa’asologa o lona olaga i le a’oga, ma fa’asolo ai i le olaga faigaluega, e fa’amaoni fo’i.”

O nisi ia o fa’atuaga sa fa’afofogaina mai le Upu na folafola e le susuga le Faife’au Toeaina mai Hawaii. O se avanoa sa ia fa’afetaia lava i le mae’a ai o lana lauga, ona ua faitaulia lona sui i le aso tele o Amerika Samoa.