Ua sauni atu nei le aufusu fa’apolofesa a Amerika Samoa atoa ai ma ni isi o alo o loo tausinio i le vaega o fusuaga amata (amateur), e fa’afetoai le malosi o le aufusu mai Samoa lea ua fa’amoemoe e malaga mai e tausinio i le Ipu a le Kovana, mo fusuaga fa’avaomalo o le fu’a a le atunu’u i lenei tausaga, lea ua fa’amoemoe e fa’ataunu’uina i le maota o le Bowling Alley i Tafuna i le po o le aso To’ona’i o le vaiaso fou, Aperila 15, 2017.

I se fa’atalatalanoaga a le Samoa News ma le Peresetene o le Asosi o Fusuaga Fa’aolofesa a Amerika Samoa ia Toleafoa Henry Tavake i l vaiaso nei, na fa’amanino ai e Toleafoa le polokalame ua mae’a ona fa’ataoto mo Fusuaga Fa’avaomalo ma Samoa i le fa’amanatuina o le fu’a o lenei tausaga.

“E 10 paga o le a mafai ona maimoa i ai le atunu’u i le vaiaso fou, ma o ia paga e aofia ai paga e 4 mo fusuaga a le vaega amata (amateur), ma paga fa’apolofesa e 6, lea o le a tausinio ai le aufusu fa’apolofesa filifilia a le atunu’u ma le aufusu fa’apologa malosi mai Samoa”, o le saunoaga lea a Toleafoa.

O paga e  mo fusuaga a le vaega amata o le a tausinio i latou i le Ipu a le Kovana lea e masani ona fa’agasolo i le va o Samoa ma Amerika Samoa i tausaga ta’itasi i taimi o le sisiga fu’a.

“O le tausaga fo’i lenei o le a tausinio ai Samoa ma Amerika Samoa i le fusi i le aupaga o le light heavy ua fa’aigoaina o le All Samoan belt, lea o le a fusu ai le alo o Amerika Samoa ia Sui Palauni ma le ali’i o Michael Fonoti o Samoa i le fusuaga e 8 ta’amilosaga”, o le saunoaga lea a Toleafoa.

“O le ta’amilosaga Fa’avaomalo fo’i lenei o le a liliu ai loa se tasi o alo o Amerika Samoa ia George Tanoa Jr i le fusuaga fa’apolofesa, lea fo’i o le a la fetaui ma se tasi o alo iloga mai Samoa i le ta’aloga o faipelega, le susuga ia Tony Iapesa i le fusuaga e 6 ta’amilosaga”.

O le fusi o le All Samoan belt e pei ona fuafua ai e fa’alauiloa i le vaiaso fou mo le ulua’i taimi, e le gata o le a tausino ai Amerika Samoa ma Samoa, ae o le a mafai fo’i ona tausinio ai isi ali’i fusu Samoa o loo nonofo i atunu’u e pei o Niu Sila ma Ausetalia, e pei ona saunoa Toleafoa.

Sa ia taua fo’i e fa’apea, o le sui o Samoa i le Taupulega o Fusuaga a le Lalolagi (World Boxing Association - WBA), le afioga ia Ale Vena, o ia lena ua galulue soosoo tauau nei ma le afioga ia Toleafoa i le fa’amautuina o le fusi lenei ina ia mautinoa o loo o gatasi ma tulafono a fusuaga a le lalolagi, ma fa’a faigofie ai ona una’i tama fanau a Samoa ina ia aga’i i luma la latou taumafaiga i le taleni o le fusuaga.

E pei ona silafia, o le susuga ia Palauni lea na fa’atoa avea ma alii fusu fa’apolofesa i le tausaga na te’a nei, e le’i i ai lava sana faiaina talu ona liliu o ia i le fusuaga fa’apolofesa, ma e oo fo’i i le susuga ia Tanoa Jr, ua tele naua fusuaga fa’avaomalo ua mafai ona tausinio ai o ia e fai ma sui o Amerika Samoa, e aofia ai ta’aloga a le Pasefika i Papua Niu Kini i le tausaga e 2015, o le World Boxing Championship i Ausetalia i le masina o Oketopa o le tausaga lava lea 2015, atoa ai ma ta’amilosaga o Fusuaga a le Pasefika sa faia i Samoa i le masina o Fepuari o le tausaga nei, lea fo’i na maua ai e ia le pine apamemea ina ua tausinio i lalo o le fu’a a le Asosi o Fusuaga a Amerika Samoa (American Samoa Amateur Boxing Federation), lea o lo o peresetene ai le afioga ia Paepaetele Mapu Jamias.

O le vaiaso fou lea ua fa’amoemoe e taunu’u mai ai le aufusu mai Samoa, ma sauni ai loa ma le ta’amilosaga fa’avaomalo o lenei tausaga.