O le taeao nei lea ua fa’amoemoe le maota maualuga a le Senate, e faia ai sa latou fa’aiuga i pili tupe o loo totoe a le malo e le i faia i ai sa latou fa’aiuga.

I le taimi o le tauaofiaga a le maota maualuga i le taeao ananafi, na talosagaina ai e le afioga i le ali’i peresetene o le Senate, Gaoteote Palaie Tofau afioga i Ta’ita’i o Komiti o lo o i ai pili a le malo sa tuuina atu i ai mo le iloiloina, ina ia tuuina atu i luma o le maota i le taeao nei e fai i ai se finagalo o afioga i Senatoa.

Saunoa Gaoteote e fa’apea, talu ai o lea ua sauni le Fono mo lana malologa umi i le fa’aiuga o le vaiaso nei, ua tatau ai ona tuuina atu uma pili o lo o ta’atitia i tua i komiti e fai i ai se finagalo a le maota.

O pili e pei ona aga’i ia i le saunoaga a Gaoteote, o pili tupe a le faigamalo lea ua mae’a ona pasia e le maota o sui, ae o lo o fa’atali i ai se fa’aiuga a le maota maualuga.

Sa ia talosagaina fo’i le afioga i le ali’i Senatoa ia Paepae Iosefa Faiai, o le taitai o le Komiti o Pulega o Taulaga ma Malaeva’alele, lea o lo o taoto ai le pili e sii ai totogi o tautua i luga o le uafu, ina ia tu’uina atu fo’i le pili a le maota o sui o lo o taoto i lana komiti e fai i ai se finagalo o le maota i le taeao nei.

Sa ia talosagaina fo’i le ta’ita’i o le Komiti o le Paketi a le maota maualuga, afioga Magalei Logovi’i ina ia vaai uma pili tupe o lo o taoto i lana komiti e tu’uina atu i luma o le maota mo sana fa’aiuga i le taeao nei.

Na fa’afetaia e Gaoteote afioga i Senatoa e tusa ai o galuega sa fa’atinoina, mo le iloiloina toto’a lea o pili tupe sa talosagaina e le malo, mo le fa’amoemoe e maua ai se isi vaega tupe fesoasoani mo le malo i le lumana’i, ae i lona talitonuga, afai ua tuai ona faia ona fai i ai se faaiuga a Komiti, o le a sauni le Laulau e tuuina atu lana fa’aiuga e tusa ai o tulafono ia.

O ni isi o pili tupe a le maota o sui ua uma ona pasia e afioga i Faipule, ae o lo o taoto i le maota maualuga, o pili e sii ai totogi o tautua i luga o le uafu, ma le pili e fa’aee ai le lafoga mo pisinisi.

O le vaiaso na te’a nei na pasia ai e le Senate le Paketi Faaopoopo a le kovana, ae o le taeao nei lea ua fa’amoemoe e pasia ai e le maota o sui la latou tulafono i le paketi fa’aopoopo a le Kovana.

O se tasi o tulafono tupe a le malo ua malilie uma i ai maota e lua e taofi mo le taimi nei, o le pili e fa’aee ai le lafoga o oloa e 7%.

O le fa’aiuga ina ia taofia lea tulafono sei i ai se isi taimi, na faia lea ina ua mae’a ni iloiloga a komiti o le Sailiga o le Tamaoaiga a maota e lua, ma fa’amautuina ai loa le fa’aiuga ina ia taoto pea i le Komiti lenei tulafono seia toe iloilo i se taimi o i luma.

O le aso Faraile nei lea ua fa’amoemoe e tapunia aloaia ai galuega a le Fono Faitulafono, ma mae’a aloaia ai lana tauaofiaga lona 2 o le Nofoaiga lona 35 o lo o fa’agasolo i le taimi nei.