Ads by Google Ads by Google

Silia $140,000 foa’i a le atunu’u mo tagata mafatia atunu’u i fafo


Le taimi na saunoa fa’apitoa ai afioga i le Maoputasi ia Mauga Tasi Asuega i le fonotaga a le kapineta i le aso Lulu, e fa’afetaia le foai a le atunu’u mo tagata i Amerika na mafatia i fa’alavelave fa’alenatura. [ata: FS]
ausage@samoanews.com

E silia i le $140,000 le aofa’i o le foa’i mai le atunu’u atoa e aofia ai ekalesia, pisinisi, nu’u, fa’alapotopotoga, tagata ta’ito’atasi ma vaega eseese o le malo ua mafai ona tu’u fa’atasia mai le latou sailiga tupe sa faia i le masina na te’a nei, e fesoasoani ai i tagata na mafatia i fa’alavelave fa’alenatura e pei ona a’afia ai setete o le malo tele ma ona teritori e lua - Puerto Rico ma US Virgin Islands.

 

O le fonotaga a le Kovana ia Lolo Malatasi Moliga ma lana Kapeneta i le vaiaso nei, na mafai ai ona fa’alauiloa aloaia le aofa’i o lenei foa’i.

 

I le ripoti na tauaaoina e le Komiti sa gafa ma le tu’u fa’atasia o le foa’i atoa, o lo o taua ai le aofaiga e $147,255.24, lea e aofia ai ma se vaega tupe e le i mae’a ona aoina mai i totonu.

 

O le afioga i le Maoputasi ia Mauga Tasi Asuega na fai ma sui o le latou Komiti sa fa’amaopoopoina lenei sailiga tupe e fa’aleo le agaga fa’afetai i le atunu’u atoa ma le malo, ona o le fesoasonai ua mafai ona fa’amaopoopo.

 

I le fai ai ma sui o ta’ita’i fa’aleaganu’u, na taua ai e le Failautusi o le Ofisa o Mataupu Tau Samoa, le matagofie o se atunu’u ae galulue fa’atasi ona tagata, e atagia mai ai le fealofani atoa ai ma le felagolagoma’i o tagata uma e fesoasoani i le malo.

 

Saunoa Mauga e fa’apea, o le fa’ata’ita’iga lelei lea e manaomia ona fa’atinoina e Ta’ita’i o le atunu’u mo fanau ma tupulaga, e le gata ia aoao i latou ia iloa alofa, a ia aoao fo’i i latou ina ia iloa ona faia faaiuga lelei ma avea ai i latou ma ta’ita’i fa’atuatuaina o le atunu’u i le lumana’i.

 

Na fa’afetaia e le ali’i kovana ia Lolo Matalasi Moliga le tupe ua mafai ona tu’u fa’atasia e le Komiti mai le atunu’u.

 

O lo o atagia i le ripoti le maualuga o le tupe na mafai ona ao mai i Ekalesia eseese uma lava i totonu o le atunu’u, sosoo ai loa ma isi fa’alapotopotoga eseese e aofia ai matagaluega ma ofisa a le malo, pisinisi ma faalapotopotoga, seia oo lava i tagata ta’itasi.

 

Saunoa Lolo e fa’apea, o le tulaga o lo o atagia mai i le ripoti, e pei ona maualuga ai le foa’i mai Ekalesia i le atunu’u, o le ata vaaia lena o le faigamalo ma le soifuaga o lo o soifua ai Amerika Samoa i le taimi nei.

 

“Ua lava le ata lea e ta’u mai ai le soifuaga o le atunu’u, tatou te fa’amuamua lava le Atua i soo se mea tatou te faia, o lana foa’i mo i tatou, tatou te toe fa’afo’i atu e ala i fesoasoani mo tagata mafatia,” o le saunoaga lea a le ali’i kovana.

 

O le afa o le tupe na mafai ona aoina, o le a tauaao atu e fai ma sao a Amerika Samoa i le Ofisa o le Koluse Mumu a le malo tele o Amerika, e fesoasoani ai i tagata uma sa a’afia i mala fa’alenatura e pei ona saunoa le ali’i kovana. O le isi afa o le foa’i, o le a tu’u atu lea e fesoasoani ai i le fa’atinoina o le tautuaa le Ofisa o le Koluse Mumu i Amerika Samoa.

 

Saunoa le ali’i kovana e fa’apea, e mana’omia fo’i le fa’aleleia atili o le tautua a le Ofisa o le Koluse Mumu i le teritori, lea ua molimauina le si’itia o le tele o tulaga talu ai le lagolago ma le fesoasoani a le malo ma le atunu’u atoa.

 

O se taimi e le o toe mamao ua fa’amoemoe e tu’u aloaia atu ai se saunoaga mai Ta’ita’i o le malo ma le atunu’u, e fa’afetaia ai le atunu’u atoa e tusa ai o lenei foa’i maoa’e.