Solofua isi moliaga mamafa fa’asaga ia Okesene Alo


Okesene Alo [ata AF]
ausage@samoanews.com

O le mae’a ai o le ulua’i iloiloga a le ali’i Leoleo o le Falepuipui a Tamaiti (Juvenile Detention Center - JDC) ia Okesene Alo, lea sa fa’ataunu’uina i luma o le fa’amasinoga fa’aitumalo i le taeao ananafi, na faia ai loa e le afioga i le ali’i fa’amasino ia Fiti Sunia le fa’aiuga, e tu’u atu ai moliaga mamafa e 3 o lo o tu’uaia ai e le malo ia Alo e fa’aauau la latou iloiloga i luma o le fa’amasinoga maualuga, ae o isi moliaga e 10 o lo o totoe ai i le pepa o tagi sa fa’aulu e le malo, ua solofua e le fa’amasinoga.

 

I le mae’a ai ona teena e le fa’amasinoga fa’aitumalo o moliaga o le faia o uiga mataga i tama’ita’i laiti fa’asaga ia Alo i le masina na te’a nei, na toe faila ai loa e le malo la latou tagi i le 2 vaiaso talu ai, ma fa’atulaga ai loa le ulua’i iloiloga e pei ona fa’ataunu’uina i le taeao ananafi.

 

O le tama’ita’i loia ia Kristy Dunn na tula’i mo le malo ae o le tama’ita’i loia ia Sharron Rancourt na tula’i mo Alo.

 

O moliaga e 3 o lo o tu’uaia ai Alo ua tofu atu i luma o le fa’amasinoga maualuga e aofia ai le faiaiga ma se teineititi e laititi i lalo o le tulafono (rape), moliaga o le tagofia o itutinosa o se teineititi e laititi i lalo o le tulafono (sexual abuse 1st degree), fa’apea ai ma le moliaga o le faia o amioga mataga fa’afeusuaiga (deviate sexual assault).

 

E to’atasi le molimau a le malo na valaauina i le taeao ananafi e molimau i le ulua’i iloiloga, o le ali’i leoleo lea sa autu i ai le su’esu’eina o le mataupu fa’asaga ia Alo ma isi Leoleo e to’a 3 mai le Falepuipui a Tamaiti, susuga Det. Filemoni Amituana’i.

 

E pei ona manino i le molimau a Det. Amituana’i, e to’alua tama’ita’i sa taofia i le falepuipui a Tamaiti i le va o le masina o Me e oo atu ia Aokuso o le tausaga na te’a nei, o lo o tu’uaia na faia i ai e le ua molia uiga mataga, o le isi e 14 tausaga le matua, lea o lo o taua i le ripoti a leoleo o ‘victim #4’, ma le isi e 15 tausaga le matua, lea o lo o taua i totonu o le ripoti a leoleo o ‘victim #1’.

 

Na taua e le molimau a le malo lona fesiligia o ‘victim #4’ ma ‘victim #1’ e tusa ai o lenei mataupu, lea fo’i na maua le avanoa la te fa’asoa atu ai faamatalaga e tusa ai o tu’uaiga fa’asaga ia Alo.

 

Na taua e le ali’i leoleo ia Det. Amituana’i le fa’amatala atu e le ‘victim #4’ ia te ia e fa’apea, i se taimi o le aso 21 Me 2016, na alu atu ai Alo ma tatala mai o ia mai totonu o le potu o loo loka ai ae la o i fafo ma la ulaula ai, ma o se taimi o le la ulaulaga tapa’a na faia atu ai e le ua molia uiga mataga ia te ia e aofia ai lona kisi atu ia te ia, tagofia ona itutinosa sosoo ai loa ma le la faiaiga (sex intercourse).

 

E tusa ai o fa’amatalaga na fa’ailoa e ‘victim #4’ ia Det. Amituana’i, e silia i le fa’asefulu ona la fai’aiga ma le ua molia i le va o le masina o Me e oo atu ia Aokuso o le 2016, i nofoaga eseese i totonu o le Falepuipui a Tama’iti e aofia ai totonu o le potu e teu ai meaai fa’apea ai ma totonu o le umukuka.

 

E pei ona taua i le molimau a Det. Amituana’i, sa taofia fa’atasi ia ‘victim #4’ ma le ‘victim #1’ i totonu o le potu e tasi, ma sa mafai ona fa’amaonia atu e le ‘victim #1’ ia te ia fa’amatalaga uma sa fa’amatala atu e le ‘victim #4’.

 

O moliaga mamafa e 3 o lo o tu’uaia ai e le malo ia Alo e pei ona tofu atu i luma o le fa’amasinoga maualuga, o moliaga uma ia e afua mai i le mataupu fa’asaga i le ‘victim #4’, ae o moliaga uma o lo o tu’uaia sa a’afia ai le tama’ita’i lea o lo o taua o le ‘victim #1’, ua solofua uma e le fa’amasinoga ina ua le mafai e le malo ona tu’uina atu mau fa’amaonia e lagolago ai sa soli se vaega o le tulafono.

 

E pei ona manino i le molimau a Det. Amituana’i, e le o ia lea sa fa’amatala i ai e le ‘victim #1’ uiga mataga sa faia e Alo ia te ia, ae o isi ali’i Leoleo Su’esu’e sa la su’esu’e ma fesiligia le tama’ita’i na a’afia, ma la tu’uina atu ai loa fa’amatalaga e uiga i lea fa’alavelave ia Det. Amituana’i ina ia tu’u fa’atasi ma isi fa’amatalaga sa maua mai i lana su’esu’ega.

 

E le i mafai e le malo ona fa’ailoa i a latou mau fa’amaonia le taimi ma le aso na faia ai e Alo uiga mataga i le tama’ita’i lea o loo taua o le ‘victim #1’.

 

Na finau Rancourt e fa’apea, o le tagi a le malo fa’asaga ia Alo, o lo o fa’avae i luga o fa’amatalaga fa’alogo, e aunoa ma ni mau fa’amaonia e lagolagoina ai tu’uaiga fa’asaga ia te ia. Sa ia taua atili fo’i le le talafeagai o tu’uaiga fa’asaga ia Alo, ona o lea ua manino i le molimau a le ali’i Leoleo Su’esu’e ia Det. Amituana’i, e ese Leoleo Su’esu’e sa latou su’esu’eina ma fesiligia le tama’ita’i o loo taua o le ‘victim #1’, e le o ia.

 

O le taeao o le aso Faraile o le vaiaso nei lea ua fa’atulaga e tula’i ai Alo i luma o le fa’amasinoga maualuga, mo le tu’uina atu o lana tali tete’e e tusa ai o moliaga mamafa e 3 lea ua tu’uaia ai e le malo o ia, ma o lo o tumau pea le taofia o ia i le toese i Tafuna ina ua le mafai ona ia totogi le tupe e $15,000 ua fa’atulaga e le fa’amasinoga e tatala ai o ia i tua.

 

(English version of this story in today's issue)

Comment Here