SPC Shaleen Maiava - “Fai ma le Fatu mea uma!”


O se vaaiga i le sauniga a le aiga, mo le tamaitai fitafita Samoa ia Shaleen Maiava i le vaiaso ua te’a i le EFKAS i Utulei. O le Sa o Shaleen o pito mai i luma i le taimi o le sauniga. [ata: Leua Aiono Frost]

O toe sauniga o lenei Toa o Samoa, sa fa’atautaia i Ekalesia e lua ona sa soifua a’e fo’i o ia, i le tausiga a ona aiga e lua, ma ua fa’apea ai ona to’atele i latou e molimauina lona soifua talavou.

 

I ona matua i Utulei, ua iloga lona tausa’afia i lona aiga, ae maise fo’i o ona uiga usita’i ma le tausa’afia i totonu o le mafutaga fa’ale-autalavou. Na molimauina e le to’atele ae maise o lona Tama faaleagaga, Rev. Elder Ioane Evagelia, o le EFKAS i Utulei. “O le tama’ita’i ua a’oa’oina lelei, ae ua iloga fo’i lona usiusita’i i faatonuga, aua ua iloga ona uiga na i totonu o ana vasega na a’oga ai. Ua matou iloa lelei lona tagata talavou, o se tasi o lo’o ua fa’amanuia i ai le Atua i taleni e tele. O se tama’ita’i e fiafia e ta’alo, aua e ola fiafia fo’i, na te le tafia i nisi ni faaletonu o mafutaga fa’atalavou, e iloga lona loto fa’amagalo ma le fa’afiafia tagata, e fa’amasani vave foi i so’o se isi, o se tasi e uiga tausa’afia,” o se molimau lea a lona tama fa’aleagaga, i le sauniga fa’aleaiga.

 

E le’i i ai se mafuaga ua faailoa i aiga ua mafua ai ona maliu Shaleen i le nofoaga o le US Army i Fort Meade, pau le mea mautinoa, sa vala’au mai o ia i lona tina ua fa’aletonu lana fa’alogo i lona moa ma ua faigata ai ona sao se mea’ai a’o i ai i latou i le vao mo koleniga fa’apitoa. Peita’i, e tusa ai o se saunoaga a le ali’i Satini sa aofia ai Scalene Maiala i lana vaega fa’apitoa e va’aia, “O le fa’alavelave e le mafai ona ou tautala i ai, aua o lo’o fa’aauau pea sailiga uma a le US Army.”

 

E tusa ai o uiga o SPC Maiava i le latou mafutaga i le galuega, sa ia fa’ailoa ai, “O lenei tama’ita’i o se tasi e le fa’aleoa maia ni ona manatu, e filemu lava ma usita’i i so’o se fa’atonuga. Peita’i e fa’afiafia tagata lava ia, ae maise i nisi fo’i o alo o Amerika Samoa o lo’o matou tiute fa’atasi i le nofoaga i Fort Meade. I la’u ta’ita’iga o le a ou misia fo’i lenei alo o Samoa. E iloga lona ola fa’aaloalo, ae o lea ua ou sau, ma ou va’aia uiga o fanau talavou iinei, e fa’aaloalo tele i tagata matutua, e fa’alogo i matua i mea uma, leitoa lava a soifua fa’alogo ma usina’i Shaleen ia i matou o ta’ita’i.”

 

Ua le gata i le, “O le fiafia latou o Shalene e pese i ana pese Samoa, ma ana fa’apea fo’i o i ai lava ia ma i matou, ua leva ona fa’amalosi mai ia i matou ina ia fiafia, tusa poo le a le faigata o le galuega.”

 

Sa ia molita’i mai fo’i alofa’aga o i latou uma o i ai i lana ta’ita’iga mo le latou uo pele ua maliu. E le gata i lea, ae o le vasega o fanau a Samoa o lo’o aofia i totonu o lea nofoaga i Maryland.

 

O se molimau a le lona tama, e faigaluega i le Star Kist Samoa, sa ia fa’ailoa ai, “Ona o lenei tama’ita’i o se tasi e fiafia tele i ta’aloga, e muamua lava vala’au atu ia te a’u, ina ia ou auai atu e matamata i ana ta’aloga, poo fea lava e faia ai. Ou te le misia, e ui i le vaivai ma le mamao i nisi taimi, ae alu lava ina ia tausoa fo’i le lagona sapaia o ana taumafaiga. E le’i i ai fo’i se lagona lava e tasi, o le a vave ona motusia le mafutaga fa’apenei, peita’i, e ui i le faigata, ae talia le vala’au paia ua oo mai.”

 

Sa ia fa’ailoa se tala a lona afafine o le a tamau pea i lona loto, “O lana tala i le tele o taimi e tau fa’avaivai ai i so’o se mea, e fa’amalosi mai lava i le taimi nei, ‘Fai ma le fatu mea uma, Dad!’ Ua ou iloa lelei fo’i, o lena le mea o le a faia pea, ina ia fa’aolaola ai pea le lagona misialofa ia te oe le afafine pele.”

 

Na masii le vasega fa’aiuaso fa’atasi ma Shaleen mo le latou molimau, lea na faia e le sui tofia o le vasega, ae ina ua mae’a le molimau i uiga ta’asa’afia, fa’amasanigofie ma le aga filemu o Shaleen i le latou vasega, ona usuina lea o le latou pese aualofa mo ia. Sa molita’i ane fo’i le latou meaalofa mo le latou pele.

 

E i ai fo’i nisi na masi’i mamao mai o aiga na lua, sa fai o latou sao e fa’ailoa ai lo latou alolofa ia “Lisa” o le igoa lea e vala’au ai lenei tama’ita’i fitafita e lona aiga. O Lisa fo’i, o le suafa lea o lona tina sa tausia mai lava o ia, fa’aa’oga ma fautuaina lona olaga atoa, lea e ese mai ai fo’i ona uiga tausa’afia, a’oa’oina lelei ma le fa’aaloalo.

 

“O ia o se talavou e aga fa’aaloalo tele, peita’i i le matou toe mafutaga i Samoa a’o le’i malaga mai ma alu atu ai i fafo ia Aukuso 2016 e amata lana auaunaga i le US Army. E le o matou fetagisi, aua o lana toe upu na fai mai, ‘Tatou feiloa’i i le lagi pe afai e tutupu ni fa’aletonu i lenei fo’i galuega o le a aga’i atu i ai.’ Lea ua taunu’u, ma ua iloga fo’i, sa alu ma lona iloa e ono tutupu mea fa’apenei. Ia tatou fiafia aua, sa ia faia le tautua, sa ia taumafai le mea sili, ua i’u fo’i ana taumafaiga.”

 

Na tula’i lea o lona uso sa la’ua ola fa’atasi mo lana molimau faaleuso, “O Shaleen, o se tamaita’i agamalu lava o ia, ma sa ia avea ma uso moni i le li’o o le matou aiga i Utulei. Ia manuia lava lau malaga, tatou feiloa’i i le isi ituvai.” O le pese sa usuina e ia mo le fa’amavaega ma lona uso o se pese sa mana’o Shaleen na te iloa po’o ai na ia usuina, ao fa’amavae i latou o le a malaga ese atu mo lana tautua, “O Mafutaga e le Lelei.”

 

Na moliamo le sui o Aiga, le susuga Ma’anaima Fualaau ma le faletua fo’i o Faga Unutoa Fuala’au, sa iloga ai, e agava’a fo’i lenei tamaita’i talavou i tautua fa’atalavou e tautuaina ai aiga i fe’au masani fa’aleaganu’u, limalima ma mataala i tiute poo fe’au i fa’alavelave uma faaleaiga.

 

O se tasi molimau sa tula’i ai Eti, o se tasi o ali’i talavou sa ao’oga mai lava ma Shaleen mai le laiti. “O a’u na vasega mai lava ma Shaleen i le vasega 1 - 8 i Kanana Fou, se’ia o’o ina eseese mai A’oga maualuluga e fa’atasi atu i ai. O ia lava o se tasi e atamai tele, aua na uma lava le matou palagia o Shaleen ina ua sau ma lana pepa o le matou suega fa’aali mai i o matou luma ma fai mai, E a la, e filemu lava ae a’asa!”

 

Mai le nofoaga sa maliu mai ai le tama’ita’i fitafita, e i ai se tasi o tama’ita’i Samoa o lo’o tiute ai, ma sa fa’auia mai ona alofa’aga mo Shaleen e ala i lona tina. Sa tula’i fo’i lea tina ma molimauina le fesoasoani tele a lenei tama’ita’i i si ana tama. Ua fa’ailoa mamao mai e lona alo, “O le tele o taimi e fa’amalosi mai lava Shaleen pe a oo ina lutaluta le tai o koleniga ma ua avea ma ala ua sau ai le musu e fa’aauau le auaunaga, ae toe taliu mai i aiga. O lana faufautua mo i matou na mulimuli mai ia te ia, ae maise o ona uiga fiafia e faafaigofie ai le matou o ese mai ia te outou matou matua. Ia e fa’ailoa lena mea i le to’atele o le a auai i lona toe sauniga.”

 

O le toe sauniga o Shaleen na fa’atautaia lea e le Ekalesia a Iesu o le Au Pa’ia o Aso e Gata Ai i Ottoville, lea e avea ai ona matua na fanaua ma ona uso ma tuagane. Na faia lea sauniga i le aso Toonai ma sa fa’atinoina uma ai sauniga mamalu a le Vaega Au, ma sa tautuaina fo’i lona Sa e le vasega o Fitafita na fa’atulaga e le Ofisa o le VA ma le US Army Reserve.

Comment Here