Tala I Vaifanua


O se vaaiga i le taimi na fa’apa’iaina ai le afioga le Tama Matua ma le Faletua i le sauniga sa fa’atautaia i le Malumalu Metotisi i Malaeloa lea e tautua ai lana afioga ma le faletua atoa ma aiga. O le sauniga sa faia ia Tesema 22, 2016. [ata: Leua Aiono Frost]

O se va’aiga i se tasi o sui tauva a le Sau Ia Bodybuilding sa mafai ona tauva mo le 6 vaiaso e fa’aoso ai lou tino lelei, ma o tapenaga lava nei e taumafai ona fa’aleleia atili ai tino o alii tauva. [ata: foa’i]

SAOFA’I O TUIOLEMOTU VAIFAGALOA NEUELI

 

O le fa’aiuga o le masina ua te’a sa fatasia ai le paia maualuga o Aiga, i ona itu tetele ma ona itu taulagi ina ia molimauina le fa’afotuova’aulu a le afioga le Tama Matua Tuiolemotu Vaifagaloa Neueli Tuiolemotu i le afio’aga i Malaeloa.

 

O lea fa’amoemoe ua loa fo’i ona tapua’ia e le paia o Aiga ae maise le afio’aga, aua ua loa ona tatalia se tasi e tula’i o aiga e avea ma sui iloga i totonu o le saofa’iga a le afio’aga.

 

O le afiafi o le aso 22 Tesema, 2016 na fa’apa’iaina ai le nofo i le Ekalesia Metotisi o loo tautua ai ma lona aiga i le afioaga, ma sa auai le paia o aiga, fa’atasi ma uo mamae ma e masani ae tainane fo’i le afio’aga ma sui o le itumalo, ina ia molimauina lea aso.

 

I lea sauniga sa vala’aulia fa’apitoa lava le mamalu o Faafeagaiga uma o le afioaga i so’o se fata faitaulaga ina ia faae’e o latou a’ao i le afioga le Fa’anofonofo ma le Faletua e fa’apa’iaina ai i la’ua mo le la’ua tofiga fou e tausia ai aiga, afio’aga ma le Itumalo i le va ma  le Ekalesia ae maise o le malo.

 

O le aso 23 Tesema, na faato’a fa’apa’ia ai le fa’anofonofo i lona afio’aga ma le itumalo fa’apea fo’i le paia o Aiga na masii atu mo le fa’amoemoe. Na talitoga le itumalo ina ua mae’a le usualele a le itumalo ma talia ai le afioga Tuiolemotu Vaifagaloa Neueli i ona itumalo.

 

I le ava o le usualele a le itumalo sa fa’afao ai a’ao o le alo tama’ita’i o le fa’anofonofo ma le faletua, ae na agaia e le pa’ia o le aumaga o le afio’aga.

 

SAU IA BODYBUILDING - 6 VAIASO SUI AI LOU TINO

 

Na tapunia le avanoa e fa’aulu lou suafa i le tauvaga a le Sau Ia Bodybuilding Inc. [Asosi o Alii & Tama’ita’i Tino Lele i Amerika Samoa] ia Tesema 23, 2016 ma amata loa ona fa’aoso tino lelei o ali’i ua auai i lea tauvaga.

 

O le faamoemoe, ia matagofie nisi o ali’i o le a tauva i le masina o Aperila, lea e talimalo ai lea Asosi Tino Lelei i se tasi ua lauiloa i lea fa’agatama, ma tauva ai i latou ua mae’a i ai suafa i lea tausinioga. E le o fa’avaivai le taumafaiga, ae ua iloga fo’i le aoga tele o le fa’aosofia o lagona lelei, ina ia tino lelei ma matagofie le maimoaga a le atunu’u i a latou pelega i lea fa’agatama.

 

Ona o le tauvaga ua tauva ai sui iloga ua auai suafa na amata mai i le aso na tapunia ai avanoa, ua mae’a faia galuega a fa’amasino ma ua fa’alauiloa ma taua’aoina fo’i fa’ailoga mo i latou ua manumalo i vaega ta’itasi na fa’avasega e le Asosi Tino Lelei.

 

E tolu ituaiga si’i o le tauvaaga: Bench, Squat ma le Dead Lift. O fa’aiuga sa taua’aoina ma suafa o i latou ua manumalo:

 

• Bench Press: Ua manumalo ai Joe Taulagi Telefoni i le tulaga muamua. Lona lua o Li’a Tifele ae lona tolu ai Sammy Maiava.

 

• Squat Position: Manumalo ai Joe Taulagi Telefoni, tu lua Sammy Maiava ae tulaga tolu ai Li’a Tifele.

 

Dead Lifts: Manumalo ai Li’a Tifele, tu lua Sammy Maiava ae tulaga tolu Aunese Tauinaola.

 

Sa faia le fa’atasiga mo lea fa’amoemoe e taua’ao ma taualoa ai tulaga o nei sui uma sa tauva i le Maota o le ali’i peresetene o le Asosi i Fogagogo i le afiafi o le aso To’ona’i na te’a nei.

 

Saunoa ia Sala McMoore o lea lava Asosi, “O le masina o Aperila lea ua matua tinou atu lenei Asosi ina ia lava tapena a tatou alo tino lelei ia mautinoa se tauvaga matagofie i le oo mai fo’i o le susuga Stan ‘Rhino’ Affording, ma e faia lea fa’amoemoe i le Fale Laumei ina ia gafatia ona maimoaina e le mamalu lautele o le atunu’u.”

 

“E le gata ina oo mai lea sui iloga i le fa’agatama mo le fa’amasinoina o tatou tama tino lelei, ae o le a ia faia fo’i ni a’oa’oga fa’apitoa mo tatou sui tauva ma isi o le a fiafia i lea fo’i fa’atagatama i lea vaitau.”

Comment Here