TOE FO'I I AIGA - PUNAVAI O FA'AMANUIAGA - PAGO PAGO

Ua tau fa'ai'ui'u le polokalama o le "Toe fo'i i Aiga - Punavai o Fa'amanuiaga" lea o lo'o fa'atautaia i le Maota o le Galuega, Ekalesia Katoliko i Pago Pago, ua tu'ufa'atasia ai aiga e 12 ina ia maua le agaga, galulue fa'atasi ma fefa'asoa'i lagona ina ia le o'o fanau i fa'apotopotoga o lo'o tagofia sikaleti o'ona, vaila'au ma fua'alau fa'asaina, atoa ma le Inuva'a malosi.

O lenei polokalama o lo'o fa'amalosia mai e le vaega o le feterale o lo'o toina mai ai le vaega tupe fa'atupea ai tautua lautele mo fanau talavou, lea e fa'auia mai i le Matagaluega o Tautua ma Alamanuia mo Tagata Lautele [DHSS].

Ua taua'aoina lea polokalama e fa'atautaia e le vasega o Koalisi a Itumalo, ma o lo'o i lalo le polokalama i Pago Pago i le va'ava'aiga ma le fa'atautaiga a le Koalisi a le Itumalo o le Ma'oputasi, lea e i ai lo latou Ofisa autu i le fogafalelua o le McDonalds i Fagatogo.

O le fa'aiuga o le polokalama sa fa'atautaia mai le 7 vaiaso, o le aso To'ona'i o le vaiaso nei, ma o le a auai nisi o le Ofisa ulu o le DHSS i lea polokalama, latou te fa'afofoga aloa'ia a'o molimau nisi o matua ma fanau, e tusa o le latou a'oa'oga fa'apitoa, ina ia mafai ona faia fa'atasi galuega ma tiute i totonu o le li'o o le aiga.

"O le tele o matua, ua le mailoa le aso na gata ai ona ia fusi mai i lana tama, ma fai se la'ua talanoaga vavalalata, e fa'ailoa ia e ia se filifiliga ua sasi ona faia e le tamaititi, ma e i ai fo'i a'afiaga mulimuli mai i lona soifuaga, ona ua sasi sana fa'ai'uga fai,” o se tala lea a Ramona Hisatake, o le Ofisa a le Koalisi a le Ma'oputasi.

"O na ituaiga o mea e tutupu i aiga, ua molimauina e nisi o matua, e moni lelei. Ua na'o le ote lava i le fanau, ae le tu'ua se taimi ia i latou e fa'ailoa mai ai so latou iloa na ala ai ona faia fa'aiuga ua latou fa'atino,” o a Hisatake lea.

"Mai polokalama uma lava e fa'ataoto ma fa'atautaia e le Koalisi a le Ma'oputasi, o le Toe Foi i Aiga - Punavai o Fa'amanuiaga o se polokalama lea ua sili ona aoga. Ua avea ma mea e matou e asiasi uma ai i aiga o fanau talavou lea e i le va o le 10-14 tausaga le matutua. Ua iloga lelei aiga e ao ina galulue fa'atasi ma i matou, ina ia suia le va'ai a matua i fanau, ma le fa'amoemoe fo'i o fanau i o latou matua!"

O aiga e 12 ua auai i le polokalama, na fili fa'apitoa lava ona o fanau. Ua aoga tele i ai le polokalama, ma ua va'aia fo'i suiga tetele ma le lelei talu mai ona auai fa'atasi le aiga atoa i vasega e 7 e ta'i tolu itula ma fa'atautaia i vaiaso e fitu ua mae'a lelei nei.

Ua i ai vaega o le polokalama ia e fa'atino fa'atasi ai se galuega e le aiga atoa. O le polokalama ua fa'aautu ina ia so'ofa'atasi lagona o matua ma fanau.

"O le faiga lenei ua mafai ai ona fa'asoa mai fanau i mea o mamafa i o latou lagona, ua fa'apalepale fo'i lava ma fa'ailoa atu i ai le tulaga e ao ina fa'aleleia ai latou lagona, aua le alu i le isi uo tama po'o teine e talavou fo'i e fa'asoa i ai, ae fa'asoa mai ia i matou o latou matua,” o se tala lea a Kaiva Silao e tusa o lenei polokalama sa auai.

"O le fesili tele lava e muamua fa'ao'o i matua, ‘O e iloa lelei lau tama?’ Ae o le fesili fo'i i le fanau, O e iloa lelei lou matua? E i ai taimi ua maligi ai loimata o le tina, ae ua le mafai ona latou talia le fesili,” o se fa'asoa lea a Hisatake.

O le mau lava a le Koalisi a le Ma'oputasi, "O le La o le Fa'amoemoe" e auga mea uma, ina ia faia le galuega tima'i ma faufautua i fanau talavou a le itumalo a'o i ai pea se malamalama itiiti o le fa'amoemoe maualuga e le tagofia e fanau talavou e le'i uma pule fa'aletulafono a matua le 'ava o'ona, tapa'a o'ona, vaila'au oona ma fuala'au fa'asaina.

O le a soso'o le a'oga lenei i Pago Pago ua mae'a, ma se a'oga fo'i e fa'atautaia i Utulei  po'o Fagatogo a'o le'i mae'a lava lenei tausaga.

FAIAOGA JR PREP SPORTS - FA'ATEA SAUAINA FANAU TA'ALO

I se lipoti mai Hawai’i o lo’o taua ai se faia'oga o le Au Ta'a'alo a le Rock Solid Crusaders mai Kalihi, Ionatana Alualu, ua fa'ate'a tumau mai le avea ma se faia'oga i au ta'a'alo a le Polokalama o le "Jr Prep Sports" ona ua ia fa'ao'olima i se tasi o tamaititi ta'alo mai le 'au a le Wahiawa Lancers.

Na loka Alualu i le malae na faia ai lea ta'aloga, aua na molimauina e le to'atele o matua ma e fo'i sa maimoaina lea ta'aloga, le mea atoa na tupu. Ina ua ili le fa'aili a le Laufali e taofia le ta'aloga, sa matauina le tamaititi na fa'ao'olima i ai Alualu o lo'o tau vaovao mai ma se tasi o le 'au a le Rock Solid Crusaders.

Ua fa'ailoa e le Peresetene/CEO o le JPS, Robert Faleafine, "O Ionatana Alualu ua fa'ate'a ma ua le toe i ai se mea lava o le Polokalama a le JPS ua toe aofia ai le igoa po'o lea sui i ana liki, ta'aloga ma 'au ta'a'alo."

"E le o le fa'ao'olima i se tama ta'alo, se a'oa'oga lelei mo i latou ia lelei ai latou ta'a'alo, ma e le o se mau fo'i lea e sapaia e le JPS. O le 'auga o le Polokalama a le JPS, ia a'oa'o lelei fanau a'oga i ta'aloga Football ina ia sologa lelei lo latou taumafai i lea fa'agatama ina ia fa'aleleia atili le latou ta'alo, ma maua ai avanoa lelei e a'o'oga ai i Kolisi ma Iunivesite ma manuia ai latou lumana'i ona  o lo latou iloa o le ta'aloga, ma ta'alo tausa'afia,” o a Faleafine lea.

O le JPS lea ua silia nei ma le 800 fanau a'oga ua ta'a'alo fa'atauva ai i le ta'aloga Football ae o lo ua fa'auluina i ai ma le fanau a'oga ua a'oa'oina lelei e ta'a'alo i le Volley Ball ma le Basketball i le fa'ai'uga o lenei tausaga.

Ua fa'ailoa e Faleafine, "Ua mae'a ona soalaupule atoa lea fa'aletonu, sa uia lava ala o le tulafono ina ia sa'o ma lelei le usita'ia o tulafono uma tau ta'aloga e fa'atauva ai fanau a'oga talavou e lei uma pule a matua fa'aletulafono.”