Tala I Vaifanua


[ata: foa'i]

MALAGA MAI VAIASO A SAU FOMAI MAI LE SHRINERS

 

Ua fa'ailoa mai o le a o'o mai fo'i le asiasiga masani a Foma'i mai le Shriners i Hawaii, i le falema’i o le LBJ Medical Center i Faga’alu i le vaiaso a sau nei.

 

Ua matauina o lenei tautua e faia lava e foma'i mai le Shriners i tausaga ta'itasi ma e matele lava ina fesoasoani e toe siakia gasegase sa faia taotoga ma togafitiga muamua, po'o le va'aia fo'i o nisi gasegase fou mo i latou.

 

Ua fa'ailoa mai o lenei auaunaga ua ofoina mo le fanau e 18 tausaga ma le laiti mai lea matutua. Ua o'o lava i le laugutu atia, tulaga fa'aletonu i ivi, le maeaalio, mu ma isi gasegase uma e ao ina taoto e toe fa'aleleia o latou itu tino, e tatau ona faia talavai ma va'aia nei foma'i fa'apitoa e malaga mai e to'afa i latou.

 

O talavai ua fa'atulaga mo Novema 14 - 17 ma e faia i le LBJ i le vaega a le Surgical Clinic. Ua fa'alauiloa mai lenei tautua, ina ia utagia e tagata lautele, afai o i ai ni afaina i tino o fanau e ao ina va'aia e foma'i nei, ona fa'ao'o ane lea i le lisi o talavai a le Shriners i lea vaiaso.

 

O le vala'au i le vaega a le Surgical Clinic e mafai ona fa'ailoa ane ai le taimi ma le aso e va'aia ai e lou alo.

 

ASI VAVE LE PALOLO - LEILOA LAVA LE OSO VAVE MAI

 

Ua lolofi le atunuu ina ia vave ona tapena mea uma e tatalia ai le I'a. O le tau ua sagatonu ma le fa'amoemoe, aua o le timuga so'o ma le tau malulu toe vevela fo'i le la i so'o se taimi e suluia mai ai ona ave malolosi.

 

Ua fua fo'i le Moso'oi ma le Laga'ali, o fa'ailo ia o le vao e fa'ailoa ai, e feso'ota'i lona tau ma le taina o le i'a e fa'alua lava i le tausaga ona tatalia. Ua louloua pea uiga o le tau, e le o se mea fou i lona vaitau lenei, ae iloga, o Tutuila e le'i tetele le tataga o le palolo ia Oketopa, lea ua tatalia i'umaea o le toe aso nai Moamoa i le fa'amoemoe e maua se vaega o le tataga e lofia ai le mata'ai mo se Palolo.

 

O lo ua o mai sa'o lava le vaega o lo'o suesueina fa'asaeanisi le olaga o i'a e matai'ai ai Samoa, ina ia tatou le tausamia i'a nei ma fai ma mea e mafua ai ona vave mou ese atu mai o tatou ogasami.

 

Peita'i, o lo'o latou sailia fo'i vaitau tonu o le soifuaga atoa ma lona lapo'a ma le umi o nei i'a, ona mafaia lea ona tu'ufua ma fofoa mai ai nisi i'a e tele mo le fofoga taumafa o le atunu'u.

 

Ua tatou iloa fo'i o le palolo, o le vaitau tonu lea e feusua'i ai fuafanau o i'a ina ia mafai ona fa'ateleina i'a o le sami atoa o Samoa.

 

Lea ua tatou lofia fa'atasi ma nei sui Saeanisi, e fia molimauina fo'i e i latou nei e to'atolu, se taga palolo a le atunu'u, aua ua latou iloa lelei, e tatau fo'i ona ta le palolo i isi motu uma o le pasefika e aofia ai ma Hawaii lea e alaala tumau ai i latou.

 

"Ona o le fofoa o i'a e le o se mea na'o Samoa e tupu ai, e tatau ai fo'i ona maua i Hawaii, Tonga, Fiti, ma isi motu uma o le vasa Pasefika po'o le Alamoana,” o se tala lea a Ken Longenecker.

 

O le isi lea latou poloketi o le a taumafai e iloa patino, le uiga o le tau, taimi e atoa ai le masina, va'aia fuga o la'au o le vao e manogi, e ao ina fa'aosofia fa'anatura le fofoa o i'a fou i le gataifale.

 

Manatua aua nei galo sau fa'asolo manogi o le laga'ali po'o le Moso'oi, ina ia fa'aosofia le sau atili o le i'a i lenei toe tataga o le tausaga 2017.

 

SAMOA AIRWAYS - SUIA AI LE IGOA POLYNESIAN AIRLINES

 

Ua amata ona fa'amasani le atunu'u i le igoa fou o le Kamupani Va'alele a Samoa, lea sa masani ona tatou laulauvivilu ai i le igoa "Polynesian Airlines" lele ua fa'ailoa mai, ua avea ma "Samoa Airways."

 

Afai fo'i e te toe vala'au i laina o pisinisi sa masani ona fa'ailo mai o le Polynesian Airlines, ua tali mai lau vala'au i le "Samoa Airways."

 

"O a'u ua ou fa'apea ua sasi la'u telefoni na vili i le Talofa Airways ina ua ou fa'alogo atu  fai mai mulimuli Airways, peita'i ua toe fesili atu lava 'O le polenisia lea?' ae toe tali mai, sa'o lelei lava!"

 

Ina ua fesiligia lea sa talia lea telefoni, "Ua sui le tou igoa i le Samoa Airways i le taimi nei, ae fa'ailoa mai, Ioe o lea ua tau fa'amasani atu ai, a'o le'i o'o mai le aso 14 Novema, lea ua matua fa'amautu a'ia'i ai lea suiga atoatoa o mea uma."

 

O le aso 14 o Novema e amata aloaia ai malaga a le Samoa Airways i le va o Apia ma Niu Sila, e faaaogaina ai le va’alele B737 e lisi mai i se kamupani va’alele i Eropa. Ua faamoemoe foi le Samoa Airways mo malaga i le va o Samoa ma Sini, Ausetalia.

 

Ua i ai fo'i ma le fa'aletonu tau le talosaga ma pasia o visa e malaga ai tagata i Niu Sila ma Ausetalia, lea ua toe fa'alauiloa mai, ua le toe mafai ona fa'aulu se talosaga mo malaga i Niu Sila mai le Ofisa o le Konesula o Niu Sila i Samoa, lea ua tapunia se'ia o'o i le aso 6 o Ianuari, 2018.

Comment Here