AMATA FA’AALIGA POLOKETI FA’ASAEANISI FANAU A’OGA

Na fa’atumulia le Lee Auditorium i Utulei i le aso Lua na te’a nei, ina ua fa’aalia le 172 o galuega fa’atino a le fanau a’oga Tulaga Muamua i le atunu’u, o i latou sa fai o latou sao i le fa’aaliga o galuega fa’asaeanisi i lenei tausaga a’oga.

Na va’aia fo’i pisi o le Komiti o Mataupu Fa’asaeanisi i le latou tofi o le tu’ufa’atasiga o togi ua mae’a tapena e fa’amasino filifilia mo le fa’amasinoina o galuega fa’asaeanisi a le fanau.

O le aso lava fo’i lea, e ao ina toe fa’atautaia ai le fa’amasinoga lona lua mo i latou o le a togisilia mai vaega ta’itasi sa vaevaeina i ai galuega fa’asaeanisi. O i latou na e toe tauva i le te’a ai o le itula e 12:00 i le aoauli o le aso Lua lava, ina ia maua ai sui ua togisilia mai poloketi na fa’aalia a le fanau a’oga mai le 23 aoga tulaga muamua.

O le fa’aaliga o Poloketi Fa’asaeanisi a le fanau aoga i A’oga Maualuluga e fa’atautaia i le Lee Auditorium i Utulei i le aso, ma e fa’atautaia mo le aso atoa. A mae’a fo’i ona fa’aalia ma fa’amasinoina uma nei poloketi, ona fili fa’apitoa mai fo’i lea o poloketi togisilia mai vaega ta’itasi e toe tauva fa’alua mo ni tulaga togisilia i a’oga maualuga mo le fa’ailoga fa’apitoa, lea e auai atu ai nei sui iloga i le fa’aaliga tele a le Iunaite Setete ia Me, 2017.

O sui e togisilia mai le fa’aaliga a a’oga tulaga muamua ma a’oga maualuluga, o le a faia le latou laugatogi ma taua’aoina ai fa’ailoga i le aso Faraile, itula e 2:00 i le afiafi i le US Army Reserve i Tafuna.

O nisi o galuega fa’atino sa matauina le matagofie i lenei tausaga e aofia ai, le poloketi a le ali’i o Toetu Sapakuka mai Lupelele, lea e fesiligia ai, “Poo le a lava le aoga e sili ona tele o le ‘ea o lo’o i ai?” O le tali mai le ali’i fai poloketi lenei, sa ia fa’ailoa ai, “Dr Pepper.”

O le isi galuega sa mata’ina sa saunia e Materina Lauina mai Iakina Academy ma e vasega tasi o ia, “O ou Lagona e lima” e te silafia ai o e Ola pea!” E feoai solo lava tamaiti, ae o lo’o nofo lelei lava  Materina e le migoi.

FA’AI’U KOLENIGA & AOGA A TAMAFA’ATUI UIAGALELEI-US MARINE

O se tasi o alo o le atunu’u, Tamafa’atui Uiagalelei mai le afio’aga o Futiga ma Nuuuli, ua mae’a ana koleniga ma a’oa’oga fa’apitoa mo tomai e mo’omia ona tautua ai i le US Marine Corp ma ua i ai nei o ia i lana pou e tiute ai.

I lona fa’au’uga sa auai lona tina matua ia Iva Uiagalelei ma ona matua Chiara ma Ituau. Sa ia faailoa mai e faapea, “Ona o lea sa o mai uma si o’u aiga, ae fa’ailoa atu so’u fanoga i a’u uo mamae ma o uso fo’i i le fa’agatama o le ‘Tuuga Fautasi’ -  Ia alofagia e le Atua se tou taumafaiga i lenei tausaga, e ui ina faigata lo’u fia oo atu, ae o le a tu’i atu le mulipapaga aua ua le gafatia i lenei tasuaga. Ia se’e le Sa o le Manuelele i lenei tausaga, ma ia maua se malo! O mo’omo’oga e fia auai. Tasi le Loto tasi fo’i le fa’amoemoe, o le Mua lava!”

O Uiagalelei sa aoga fa’au’u i le Kolisi Tu’ufa’atasi o Amerika Samoa ona malaga ese atu ai loa e fa’atino ana koleniga i le Maligi.

TOFIGA FOU AMERICAN SAMOA NATIONAL OLYMPIC COMMITTEE

UA mae’a ona filifilia le nofoatofi o le American Samoa National Olympics Committee (ASNOC), ma ua filifilia ai nei Ed Imo e avea ma Peresetene, ua suia ai le susuga Victor Langkilde sa i ai i lea tofiga. I le tofi o le Failautusi, ua filifilia ai le susuga Ethan Lake, o le fa’atonu o Ta’aloga a le Matagaluega o Tupulaga Talavou ma Tina a le malo. O le tofi Teutupe ua maua e Erica Radewagen, o ia fo’i o lo’o presetene o le Swimming Association ma o se totino o le ASNOC.

O lo ua loma fo’i le latou 4 tausaga e tautua ai, ae o lo’o ia i latou fo’i nisi o ta’aloga e tatau ona nofo sauini ai Asosi o ta’aloga eseese i le atunu’u e aofia ai Ta’aloga Fa’avaomalo a le Pasefika i le tausaga 2018, ma le Olimipeka o le 2020 i Tokyo Japan.

‘AU BASKETBALL LIKI O LE FU’A 2017

Ua faailoa mai e le Sosaiete Basketball i Amerika Samoa (ASBA), ua mana’omia ona fa’aulu au Basketball pe afai ua e manatu e tatau ona taumafai lau ‘au mo se fa’ailoga pe o se tulaga fo’i i totonu o le tatou atunu’u.

O lenei taumafaiga ina ia le motusia le taumafaiga a lenei Asosi e maua uma tama ma teine o lo’o i ai le taleni e ta’alo fa’atauva ai i lea fa’agatama.

Ua fa’ailoa mai e i ai le liki mo le vaega e 13 aga’i i lolo tausaga le matutua. Soso’o lea ma le liki a le 18 aga’i i lalo tausaga, ona oso loa lea o tama matutua ma tama’ita’i fo’i, ae faia le fonotaga fa’apitoa a le Asosi Basketball atoa i le aso 17 Fepuari, i le itula e 4:30 i le afiafi, ma e mana’omia ona i ai so’o se sui iloga o so’o se ‘au lava o le a fia fa’aulu mai i lenei liki Basketball mo le sisigafu’a. E faia le fonotaga i le Veterans Memorial Stadium Ofisa o le ASNOC.

Ua talosagaina fo’i ina ia taua’aoina fo’i ma totogi e fa’aulu ai lau ‘au Basketball i lea aso o le fonotaga ma ua fa’atulaga ina ia amatalia liki uma nei i le aso Gafa, Fepuari 20, 2017. O lona uiga, o le toe aso e fa’aulu ai sau ‘au Basketball i lenei liki o le aso 17 Fepuari, o le aso Faraile lea o lenei vaiaso.