Tala I Vaifanua


O se va’aiga i le aufaigaluega a le US Coast Guard i lana va’alele mo su’esue’ga i le sami, ‘Hercules C130’, lea na malaga fa’apitoa mai mo ia suesuega ma afea ai le tatou motu nei i le affiati o le aso Lulu na te’a nei. [ata: Leua Aiono Frost]

O se vaaiga i le ali’i sa palateina lea va’alele a le US Coast Guard mo suesuega uma o le EEZ, fagotaga ae maise o lipoti o mea na va’aia i le motu o le Manu’atele. O lo ua tutu fa’atasi i la’s ma le ta’ira’i o le aufaigaluega suesue a le Coast Guard Lt. Mathew Chase. [ata: Leua Aiono Frost]

O se va’aiga i le taimi na tulaueleele ai le va’alele a le US Coast Guard sau sa’o lava i lalo le nate siakia le tulaga o le kesi, va’aia lana matafaioi ao le’i faia se talanoaga ma le ‘au fa’asalalau. [ata: Leua Aiono Frost]

O le afiafi o le aso Lulu na tulaueleele ai i le malae va’alele i Tafuna le va’alele ituaiga “Hercules C130” a le US Coast Guard lea sa amatalia mai a latou galuega su’esu’e ma le va’aia fagotaga i totonu o Sone Fagota & Fa’asao a le malo tele, [Exclusive Economic Zone] e aofia ai Amerika Samoa.

 

E ese mai nei tiute masani, e lua nisi galuega tetele na mafai ai ona latou toe ta’amilo mai i le sone a Amerika Samoa.

 

O le galuega muamua ina ia latou lipotia atu le gaoioiga o lo’o fa’atino nei e le “Geo Explorer” lea e ta’amilo e saillia le agava’a o le alititai o malo e lima o le pasefika ina ia fa’ataoto atu ai le Tui Samoa Cable mo feso’ota’iga tau Initeneti, telefoni ma uaealesi.

 

Lona lua o le sailliga mautu lea o ni va’a mai nisi atunu’u o lo’o aofia i totonu o le EEZ a le Amerika, lea na masalomia ma lipotia mai le tatou atumotu o le Manu’atele.

 

Mai nei tiute uma ua faatulaga mo le aufaigaluega e to’a iva a le Public Affairs a le USCoast Guard, ua latou fa’ailoa mai, “O le tapenaga lea o se lipoti maumaua’i mo le fonotaga fa’apitoa a malo e to’aiva ua mae’a fa’atulaga. E tatau ona fono a’e nei malo uma o le Pasefika, ae ua mae’a taua’aoina fo’i le matou Lipoti mo sui tofia o le Iunaite Setete lea e fai ma sui o le Malo tele i lea fonotaga i le fa’ai’uga o lenei masina,” o se tala lea a le sui o lo’o fa’auluulu i ai lenei ‘au sues’e a le USCoast Guard, Lt Mathew Chase.

 

O malo e to’aiva lea ua lisia e ao ina fono fa’apitoa mo le Tui Samoa Cable e aofia ai: Samoa, Fiti, Niu Sila, Ausetalia, USA, Falani, Tuvalu, Wallis & Futuna, Tahiti, ae o lo’o aofia ai ma Amerika Samoa e tauau e 10 ai i latou, ae o lea ua fa’ailo, e le tau ‘auai, aua o lo’o i ai USA i lea fonotaga.

 

Ina ia afea i tatou i le malaga mai Barber’s Point i Oahu a le Hercules C130, na tu’ua ai se tasi o latou sui iloga, mo galuega saili e ao ina tu’ufa’atasia mai le Ofisa autu o le USCoast Guard in Pago Pago. O le tama’ita’i o  Petty Officer Amanda Levasseur, lea na taoto i ai lea matata na te faia, ae malaga ese atu le va’alele ma le to’a 8 o i latou e fa’atino mai saillira i le vasa Pasefika lea e aofia i le fa’ata’atiaga o le Tui Samoa Cable.

 

Ina ua fesiligia Lt Chase i va’a na lipotia mai le Manu’atele e o tatou aiga o alaala tumau ai, sa ia fa’ailoa, “Ia aua lava ne’i nofo popole Manu’a, e le o i ai ni va’a ese i le tatou gataifale po’o le EEZ a Amerika Samoa, lea e aofia i le EEZ e va’aia toto’a e le Iunaite Setete, e leai ma se va’a o se isi malo, ae ona o le malaga mai a le Sui Peresetene Mike Pence, lea na fa’atulaga ai fo’i va’a maulu a le USNavy ma le Coast Guard ina ia latalata mai Amerika Samoa. Ua le o toe i ai nei, ae o se mea lelei lava fo’i le nofouta o tagata uma e vaia toto’a mea e tutupu mai ma fa’ailoa mai i le matou Ofisa auto i Pago Pago nei. E fai si mamao o le nofoaga i Barber’s Point i Hawaii, ae vave lava ona o’o mai pe afai ae maua ni fa’ailo faapea i le lumana’i.”

 

“Ua matou makaina uma lava va’a fagota i le sone a Ameika Samoa ma le Iunaite Setete, e o’o fo’i i suesuega o le Tui Samoa Cable, ua matou iloa le mea ua oo i ai, atoa ai ma le gataifale atoa o le Pasefika e ono ta’amilo ai, afai e i ai ni fa’aletonu, e faia lava e i matou le galuega e tatau ona fai, e fa’asa’o ai ma fa’amalosi fo’i tulafono tau le sone o Amerika ma le sone o isi malo tuaoi ma i tatou, atoa ma malo o aofia i le maliliega mo le Tu Samoa Cable,” o toe fa’aopoopo mai lea a Lt. Chase.

 

Na fesiligia fo’i le tau o lenei vaitaimi pe le o a’afia ai latou suesuega i le gataifale, ae fa’ailoa mai e Lt.  Chase, “O le ituaiga va’alele lenei o le Coast Guard e fausia fa’apitoa ina ia fa’ataututu ma tau fa’aletonu i le ea, peita’i, o le tulaga o i ai nei, matagofie lava le matou feoa’iga i lenei aso, sa amatalia lava i le taeao po, ma o lea fa’ato’a fa’afo’i mai le matou malaga ina ia fa’amalolo fo’i ‘Hercules’ aua le malaga ese atu i le aso Faraile.”

 

I le tamia nei o lo’o malolo lelei le aumalaga lenei e to’aiva i le Faletalimalo o le Tradewinds mo le fa’amaeaina o latou lipoti i nei mea uma ua mae’a sailia lelei, ma e fa’ao’o fo’i le latou lipoti i le latou Ofisa ulu i Hawaii a’o le’i tu’ua e i latou uma le tatou Malo. Pe afai e tu’uva’a ese atu i latou, e le motusia le asiasi mai pea, ona o lo’o fa’atautaia pea galuega nei mo le Tui Samoa Cable, ma e tatau lava fo’i ona mataituina i taimi uma.

 

E le gata i le va’alele lenei mo suesuega ma fa’amaumauga ae ua fa’apea fo’i latou va’a uma o le USCoast Guard o lo’o feoa’i i le sami mo nei galuega lava e tasi. E malaga ese atu ai fo’i ma Petty Officer Amanda Levasseur.

 

O i latou o aofia i lenei aumalaga e to’avalu o: Lt Matt Chase, Petty Officer Amanada Levasseur, AETI1Andrew Morris, AMTI Michael Wyrick, Lt Commander Michael Koehler, AMT1 Drew Morris, AET3 Aldo Albarello, AET1 Chris Canales.

Comment Here