Ads by Google Ads by Google

Tala I Vaifanua


O le tamaita’i lenei sa avea ma sui o le Koluse Mumu sa a’oa’oina i tomai tau “Mapping” ma sa auina atu o ia i le lua vaiaso i Kalefonia mo a’oa’oga faapitoa nei a le Koluse Mumu i le aai o San Diego i Kalefonia. [ata: Leua Aiono Frost]

Nisi o sui o le Sosaiete a Tama ma Teine Tuai o le Samoa College (SCOPA) lea ua fa’atautaia lua nei e i latou ma le Malo o Samoa le tatou Kolisi i Vaivase. O sui nei o i latou o lo’o alaalatumau i Samoa ma galulue ai, ma o i latou fo’i na savavali fa’apitoa i le Savali Fa’aaloalo o le Sisigafu’a 2017 peita’i o le tausaga i’u o i latou nei o le 1975. [ata: Leua Aiono Frost]

TOAI TAUNUU TINO MALIU PVT SHALEEN MAIAVA IUNE 9

 

Ua fa’ailoa mai e matua loto fa’avauvau fa’apea le pa’ia maualuga i aiga i ona itu na lua, o le a to’ai taunu’u mai le tino maliu o le Fitafita Samoa ua maliu a’o i ai i ona faiva i  Fort Meade, Maryland i le malaga a le Hawaiian Air ia Iuni 9, 2017.

 

Ina ua taunu’u mai le sui o le US Army ina ia logotala matua ma feagai fo’i ma i la’ua ina ia iloa patino gaoioiga uma e fa’atino e le US Army mo Pvt Shaleen Maiava, sa faia ai le filifiliga maumaututu a i la’ua o le a le malaga, ona o le tulaga le mautinoa o avanoa mo toe taliu mai fa’atasi ma Sa o si o la’ua alo.

 

E ui i le pu’upu’u o le taimi, ae sa tele se fesoasoani na feutaga’i a le Sui i le Konekeresi Aumua Amata ma le aufaigaluega i Amerika Samoa nei, ina ia maua visas e malaga ai matua nei, ina ia o mai fa’atasi ma si la’ua alo ‘ua fa’ia mai le fuifui.’

 

Na maua uma avanoa mo le Hawaiian Air fa’apea fo’i ma va’alele e o’o lelei ai le faigamalaga i Fort Meade mo le sauniga mulimuli o Shaleen, ae faailoa mai e le tina o Sa Maiava, “Ae fa’aletonu lava le toe taliu mai, ina ne’i ma’ua le o mai fa’atasi ma si ma’ua tama. O lea ua faia ai le ma’ua fa’ai’uga, leai o le a tatalia pea iinei ma’ua ma le fanau, ae malaga se tasi o le matou aiga o lo’o alaalata’i i Hawaii e faia ma matou sui, afai ae le maua mai e i latou na le sauniga iinei, ae o lo’o ma’ua mauaina toe taimi o si a ma’ua tama i inei.”

 

Ua fa’atulaga le sauniga i Fort Meade i le aso 6 Iuni, 2017, ma afai loa ae mae’a ona fa’ato’a tu’ua loa lea o Maryland e lona sa i le aso 8 Iuni, maua mai ai le malaga a le Hawaiian Air mo Pago Pago nei ia Iuni 9, 2017. O sauniga i’inei ua tu’uina atu lea i le pa’ia o aiga, ma e le’i fa’atulagaina mo le taimi nei, ae o le a toe fa’ailoa atu i se faasalalauga pe a tulata atu i lona to’ai taunu’u mai i o tatou laufanua.

 

FESOASOANI KOLUSE MUMU AIGA AAFIA I LOLOGA

 

I le lologa o le ogatotonu o le masina na te’a nei, sa gafatia lava e le Koluse Mumu o Amerika Samoa ona fesoasoani atu i mea e manaomia e aiga e to’aiva sa mana’omia se  fesoasoani.

 

E le gata ina vala’au nei aiga i le Koluse Mumu, ae sa latou so’ofaatasi fo’i ma paaga masani, Matagaluega o le Saogalemu Fa’alotoifale/TEMCO ina ia fesosasoani atu i aiga ua matauina e i latou, o lo ua mana’omia le fesoasoani i tulaga mo moega ma ieafu, o mea e gaosia ai mea’ai.

 

O afio’aga o Malaeimi, Mapusaga, Mesepa, Fagaima ma Kokoland lea sa tele i ai nai aiga nei sa manaomia le fesoasoani a le Koluse Mumu.

 

O se fa’amatalaga mai le sui o le Koluse Mumu, Val Tuilefano, sa ia fa’ailoa ai, “Po’o a lava mea ua mafai ona maua e le Koluse Mumu e fesoasoani ai i aiga, ua faia lava lea auaunaga, aua o le autu tonu lea o le Koluse Mumu o Amerika Samoa, e tula’i atu e fa’ao’o se fesaosoani ina ia tau fa’amama le avega i aiga ua pagatia i ni fa’alavelave fa’anatura poo ni fa’alavelave fa’afuase’i e tula’i mai.”

 

Peita’i, e ui ina tetele sologa i Maloata, ma sa taofia ai feoa’iga mo sina vaitaimi i Fagamalo, ae leai se vala’au na o’o mo se fesaosoani i lea itu o le itumalo o le Alataua.

 

E ese mai lea, ua fa’ailoa mai ua taliu mai le sui e to’atasi o le au faigaluega volenitia a le Koluse Mumu, ia Bella Asiata, na malaga i Santa Monica ma San Diego i Kalefonia. O lea malaga ina ia aoaoina i le faiga o sailiiliga i nofoaga ua fa’atama’ia i ni fa’alavelave fa’afuasei ua a’afia ai le atunu’u.

 

E lua vaega o lea a’oa’oga faapitoa, sa faia aoa’oga mo le vaega muamua i Santa Monica mo le lua aso, ona si’itia mai lea o le a’oaoga i San Diego mo le vaega lua o lava a’oa’oga na malaga atu ai lea sui.

 

O le sui  na filifilia, ua fa’ailoa mai, “Ua alagatatau lava ona auina atu lea tama’ita’i, aua ua matauina pea e sui mai fafo i latou malaga mai, e mata’alia ma e faigaluega malosi, fa’aamaoni i tiute fai ma le filiga le tina lea i taimi uma e ofoina ai lana tautua mo le Koluse Mumu.” E tasi le vaiaso na malaga ai lea sui mo ana a’oa’oga fa’apitoa nei.

 

SCOPA MA LE MALO O SAMOA

 

Ona o lo’o to’atele i latou sa a’o’oga i le Kolisi o Samoa o lo’o galulue fo’i i Amerika Samoa nei, o lea ua taua ai fo’i ona fa’ailoa atu se tala’aga ua oo i ai le fa’atautaiga o le Kolisi o Samoa i lenei vaitaimi.

 

Ua i ai nei se maliliega fa’apitoa ua tapena e le Malo fa’atasi ai ma le SCOPA po’o le sosaiete a Tama ma Teine Tuai sa a’o’oga i le Kolisi o Samoa i Vaivase. O lo’o i ai fo’i le SCOPA i Amerika Samoa.

 

Ua fa’ailoa e le susuga le pulea’oga o lo’o tula’i nei, Reupena Rimoni, “O lenei  maliliega e fa’atautailua le Kolisi o Samoa, ua fa’atulaga ai le totogia e le Malo o Faia’oga uma lava, ae o le SCOPA latou te va’ava’aia le fa’atautaiga o le a’oga, le toe fa’aleleia o meatotino uma i totonu o le a’oga. E oo fo’i i fa’aiuga fai mo le leleiga aga’i i luma o a’oa’oga ma isi tulaga uma mo le Kolisi o lo’o matuu lava lea i le SCOPA.”

 

O lenei ituaiga o pulega ua matele ina fa’aaogaina i a’oga tetele i Niu Sila ma o se faiga fo’i ua matuu ese ai se isi mamafa mai le Matagaluega o A’oga, ae fa’aaoga fo’i le vasega o fanau sa a’otauina i le Kolisi o Samoa lava latou, e fa’atino so latou sao patino i le vaieli sa latou utuvai ai ao saili le stamai e tautua ai Samoa.