FA’AUUGA TAFUNA HIGH - “IA MANU MAI LAGI OU ALA”

E to’a 267 i latou ua umia tipiloma i le faauuga a Tafuna High School i le taeao ananafi, lea na tima’i ai le afioga le Kovana Sili Lolo Matalasi Moliga, ma ia fa’amalosia ai le fanau, “Ia saili mamao, saili ia umi lau sailiga, o le sili fo’i lena o lou aoga i ou matua ma Aiga ae maise o lou malo ma ona tagatanu’u. Saili ia umi ma fita ina ia fa’amanuia mai ai le Atua i matua e sili ona tele.”

O le latou fofoga taumolimoli sa latou tofia ai se tasi lava o Toa na fa’alele a le Laumua talu mai le tausaga 2005 ina ua fa’au’u mai THS. Ua avea nei o ia ma tagata Saeanisi suesu’e i fa’ama’i e i ai le Kanesa, Ma’i fatu, Gugu ma le Dengue Fever atoa ma le Kanesa o le Mafaufau. O ia lenei o Dr. Andrew Ah Young, ma sa ia molimau i le tele o le sao o lona faia’oga o mataupu fa’asaeanisi i Tafuna, Dr. Joserose Jyothibhavan ia te ia ma lona olaga taumafai e fa’amautu se filifiliga o se ituaiga o a’oa’oga e mafai ona fiafia o ia e tausaili ai sona lumaca’i manuia. Lea ua taliu mai, ua avea ma foma’i o suesuega fa’asaeanisi o ituaiga o fa’ama’i e a’afia ai tagata soifua, o lana a’afetai ua mae’a faia i lona faia’oga ina au toe asiasi tasi lava i lona potu a’oga Laboratory, sa amata ai ona fafau lona soifua suesue faasaeanisi i Tafuna High.

“O lo’u fa’anaunauta’iga lea o totoe nei, o le fa’atulaia lea o se falema’i suesue o ala o togafitiga o gasegase fita nei, e fa’aaogaina ai lau, fua ma pa’u o la’au o lo’o tutupu lauolaola i le tatou atunu’u, aua sa mafaia lava ona fa’ailoa maumaututu i a’u suesuega na amata ai ona ou fiafia i lenei matata, sa gafatia e le sua o le Nonu, ona tape namu lea latou te fe’avea’ia le Dengue.” O ia o se alo na fanau a’e i Faleniu i le tausaga 1987, e faifa’ato’aga nai ona matua e tausia ai lona aiga, ma o le vaitausaga 2001 i le 2005 na te fa’ailo o se vaitau na matua fa’aosofia ai lona naunau e avea o ia ma tama suesue fa’asaeanisi mo ni togafitiga o gasegase o lo’o aafia ai le to’atele o tatou tagatanu’u ma le lalolagi atoa.”

Na malaga ese atu Andrew mai ona matua e tausaili le atamai mo fa’ailoga maualuluga ina ua maua lana sikolasipi mai le Gates Millenium Fellowship, lea sa totogia ai ana a’oa’oga e tausaili lona fa’ailoga muamua. O ia sa avea lona tausaga a’oga i le togisilia ma sa ia mauaina fo’i le fesoasoani a le sikolasipi a le tatou Malo. O lona fa’ailoga Bachelors of Science mai le Iunivesite o New Mexico i le tausaga 2009 a’o le’i si’itia ana a’oa’oga mo le isi la’asaga i Kalefonia i Saute. O le atoaga o le 27 tausaga o lona soifua na fa’amanuiaina ai loa lana sailia o lona fa’ailoga PhD i le Biological Chemistry mai le Iunivesite o Kalefonia, Los Angeles. O nei fa’aeaga uma ua ia ausia, ua fa’ailoa mai, “Avea ma se sao aoga e ta’uleleia ai le tausiga fita na tausaili e nai o’u matua ina ia ou maua le atamai, ma ia toe aoga mai i lo’u malo ma ona tagatanu’u i le lumana’i.” O ona matua o Sua ma Luisa Ah Young.

“Ia manu mai lai ou Ala” e moni lava aua o lou ala e faigofie, ae o le tapua’iga a matua ma latou tatalo ina ia manuia, e mautinoa ai e fa’amalosi le agaga o le Atua ia te oe, ma fa’aosofia lou mana’o ia maua le ‘auga ma loua fa’amoemoe na alu atu ai. E faigata le ala, e tatau lava ona e fa’amoemoe i le fesoasoani mai a le Atua e te manuia ai, ae le o le fa’alagolago tasi i lou lava atamai.”

SAMOANA SGA - FAAILOGA FAAPITOA

Na taua’aoina aloa’ia fa’ailoga mo i latou uma sa avea ma Totino o le Laulauafono a le Sosaiete a le Fanau A’oga i le Samoana High School i lenei tausaga aoga atoa i se fa’atasiga i le Paradise Pizza Place i Pago Pago i le aso Faraile na te’a nei.

Sa vala’aulia fa’apitoa ai le Faipule o Amerika Samoa i le Konekeresi ina ia fesoasoani i le taua’aoina o fa’ailoga.

O ta’ita’i o le Sosaiete sa latou fa’atautaia le sauniga e le fofoga o le polokalama faataoto, SGA Advisor Carl Schuster. Na  mua’i fa’alauiloa e i latou e na fesoasoani i le fa’atupega o nei fa’ailoga uma sa taua’aoina, ma sa latou fa’alauiloa ai le fesoasoani sa fa’o’o atu e le Ofisa o le Congresswoman Aumua Amata, le Matagaluega o Tina ma Tupulaga DYWA, L Faipule o le Inumalo #8 Steve Leasiolagi, TJ’s Gym, Amerko ma Rosevonne Pato, Lalelei Designs, Gabrielle Fa’aiuaso, Atafaga Photography,  Angello’s Cafe ma le McDonalds Restaurant i Fagatogo ma Tabuna.

Na mua’i taua’aoina fa’ailoga uma mo i latou sa tutula’i ma faia tiute i le tausaga a’oga lenei ua mae’a, 2016-17, e amata mai i le vasega 9 e o’o mai i le vasega 12.

Ina ua mae’a ona taua’aoina lea o fa’ailoga mo i latou o le a tutula’i i lenei tausaga aoga o le a savalia, 2017-2018.

Na fa’alauiloa fo’i le vasega ua manumalo a’ia’i i le tauvaga a vasega uma i lenei tausaga, ua maua lea e le vasega 11. Na tutula’i le tama’ita’i o Leitu Tofiga mo le taliaina o lenei fa’ailoga taua mo lana vasega.

MANINO REED: A’OGA MO FAIAOGA FALETUSI KONEKERESI

Ua fa’ailoa mai le avanoa ua maua nei e le tama’ita’i faia’oga mai Samoana High School ina ia auai atu ai i A’oa’oga Fa’apitoa o le a fa’atautaia i le Faletusi o le Konekeresi Washington DC i le taumafanafana lenei po’o le tu’uaga umi lenei o a’oga.

O le umi o lenei kosi ua fa’ailoa mai e amata ia Iuni 26 seia o’o ia Iuni 30, 2017, ma ua fa’ailoa mai i le tusi fa’ailo na lafoina mai ia Manino Reed, e tusa ma le 300 faia’oga sa talosaga mo lenei avanoa, ae ua filifilia fa’apitoa lava le talosaga sa fa’ao’o atu e le tama’ita’i faia’oga Samoana High.

Ua fa’ailoa mai fo’i, ua mafaia lava e so’o se faia’oga ona talosaga atu mo nisi o fa’amaumauga e mafai ona fa’aaoga i lona potu a’oga mo lana vasega i so’o se tausaga, pe afai o le a talosaga atu i le susuga Michael Apfeldorf i le faletusi i lana emeli: mapf@loc.gov po’o le alu fo’i i le Upegatafailagi a le Faletusi: loc.gov/teachers/.