74 FA’AU’U MAI LE NU’UULI VOCTECH HIGH SCHOOL

“Po’o le a lava Lau Filifiliga, Fai ia Lelei”, le manulauti lea a le Aoga Maualuga Matata Eseese a le malo i lenei tausaga, ma ua fa’asinoala ai i le fanau faau’u ina ia faia se filifiliga e tusa o le faitalia ma le mana’o o le tagata, ae tasi le mea ua fautuaina, “Ave uma i ai le malosi ma le agava’a, ina ia fai ia lelei!”

O le fautuaga lea na molita’i e le lauga fa’apitoa o le aso, le afioga le Lutena Kovana Lemanu Peleti Mauga, ma sa ia tima’ia fo’i i latou ina ia sela la’ititi, ae aua le umi ona nofonofo ai ma toe fa’amoemoe i matua ma aiga, aua o i latou lava sa avea ma fa’amoemoega mo le lumana’i o aiga, ekalesia ma le malo.

“Afai e to le manava ma sela la’ititi, ae aua le fa’aumiumi ai ma e fa’apalapala ai, ae na’o na tu sela toe oso le mea malosi, tulimata’i le lumana’i i le mea ua mae’a a’oa’oina ai oe, ia faalautele atili ma galue ai, avea oe ma se tasi e faamoemoeina e lou aiga i le lumana’i.”

“Po’o le a lava lau filifiliga o se mea e te fia tautua ai i le lumana’i, fai ia lelei, ae ou te toe fa’amalosi atili ai, avea oe ma se BEST o lau filifiliga.” Sa ia toe fa’ailoa i le fanau, le aoga o le alu e taumafai ae le fa’agalo fautuaga, a’oa’oga ma le fa’atuatuaga o tatou tagata, o le Atua lava. “E te malosi ai, ma fai ma taula o lou fa’amoemoe e aga’i i luma au taumafaiga, aua ua e iloa lelei, o lo’o nonofo tapua’i atu ou matua, lou aiga atoa uma lava, ae maise lau ekalesia, ae o tulimata’ia fo’i e le Malo, po’o a mai ana lupe fa’alele o lo’o saili manuia i fafo, ae a le folauga a Amerika Samoa i le lumana’i.”

I se isi vaega o lana saunoaga sa ia fa’ailoa atu ai, “O ta’ita’i o le lumana’i, e tatau ona latou fa’amuamua o latou tagata, mata’i po’o talileleia o latou mana’oga tupito. I taimi o fa’aletonu, ia latou fa’amalolosi ma finafinau ia tausaili pea ia toe malu le folauga a lona malo.”

“Pe afai e fia avea oe ma ta’ita’i lelei i le lumana’i, e ao ina outou filiga ma taumafai i lau tamo’ega o lumana’i, ia fa’aleleia outou sootaga ma isi, tausailia ia mautu a outou tomai i ala eseese ua matala mai mo outou, e tapena ai outou mo avanoa sili e mafai ai ona tautua ai o tatou tagata ma lo tatou malo. So’o se tofi lava ua tapena i ai, ia fai ia lelei ma tu’u i ai lou loto ia ausia matatia sili ua e gafatia.”

O le tama’ita’i togisilia i le vasega fa’au’u o Christine Tominiko mai Fagaima. O ia o se totino o le autalavou a le Metotisi i Fagaima. I lona olaga i le lumana’i, ua fa’alauiloa ai, “Ou te faamuamua le Atua i mea uma!” O ia fo’i ole totino ole NHS mo le tolu tausaga.

O le tulaga lua i le vasega o  le tama’ita’i o Fuamailelagimanuiaolenuu Ativalu Tago mai Nuuuli. O lana ekalesia o le CCCAS i Nuuuli. O ia fo’i o le sui o le  NHS mo le tolu tausaga.

I fa’ailoga fa’apitoa, ua manumalo John Manuika i le fa’ailoga mo le Poloketi o le Tausaga, le Tradesman Award.  O le fa’ailoga mo le sui o le vasega e sili ona amio lelei, ua maua e Tausala Leota. O le fa’ailoga mo le Ta’ita’i o le tausaga, ua maua lea e Abigail Saui’a. O le fa’ailoga mo le tama’ita’i sili ona taalo lelei, ua maua e Charlize Tapusoa, fa’ailoga mo le Tama Ta’alo lelei na maua e Hans Misa. O le togi maualuga i le SAT na maua lea e Samantha Amosa.

O le faia’oga mo le tausaga na filifilia ai e le fanau a’oga le tama’ita’i faia’oga Ms Rosalee Tela A. Shoulders.

O nisi o avanoa fa’asikolasipi, e aofia ai Fumai Tago ua ia maua le sikolasipi e $60,000 e aoga ai i le St Martin’s University i Washington. O le avanoa fo’i mo Josephine Solofa mai le Colorado State University  Pueblo, Colorado. O avanoa e lua mai le tatou Malo na mauaina lea e Christine Tominiko ma Alofa Su’a.

TO’AI TAUNU’U TINO MALIU SPC SHALEEN MAIAVA I AIGA

O le afiafi o le aso Faraile na te’a nei sa to’ai taunu’u mai ai le tino maliu o le tama’ita’i fitafita ua maliu a’o fa’atino pea ona faiva i nofoaga o le US Army Fort Meade i Maryland lea sa tiute ai. Na malaga mai le va’a o le tama’ita’i Fitafita Samoa ma le au malaga sui mamalu o le US Army, aua e le’i malaga ona matua e latou te o mai fa’atasi ma lona Sa.

Ina ua fesiligia pe aisea, peita’i ua fa’ailoa mai e le tina, “Ona o le toe fa’ailoa mai e ta’ita’i o le US Army iinei e matua faigata lava ona maua so ma’ua avanoa matou te toe fo’i fa’atasi mai ai ma le ma’ua tama. Na mautu lava mea uma sa taumafai fa’avave atoa e le tatou Sui i le Konekeresi, Aumua Amata, ae o’o loa i le toe sailia o se ma’ua avanoa e taliu mai ai Maryland i Hawaii, o iina loa na fa’ailoa mai ai lea tala faigata ia ma’a e faia  i ai se ma’ua fa’aiuga.”

Na toe taumafai lava Aumua mo se avanoa o manaomia, ma sa maua lelei lava, peita’i sa fa’ailoa mai e le tina, “Fa’afetai lava mo mea uma, ua iloga le alofa ma le taumafaiga le fa’atuaoia ua e tapena i ai, peita’i, ua ma’ua faia le fa’ai’uga e ma te fa’atalia atu ia iinei si a ma’ua tama, ae fai le tiute o le Army e pei ona agava’a ai o ia ma lana tautua!”

I lona fa’ataliga, sa auai atu i ai le Fa’atonu o le Ofisa o le VA a le tatou Malo, Rose Tago-Lancaster, fa’atasi ma le Pule o le Ofisa o le US Army Recruit iinei.

Na faia le sauniga i le potu fa’atalitali fa’apitoa o le malo i le malae va’alele, ma sa ta’ita’ia lea e Faife’au Toeaina Ioane Evagelia EFKAS i Utulei, aua o le autalavou sa auai i ai le tama’ita’i fitafita ao soifua ma aoga iinei. Ma sa auai Aumua, Lutena Kovana Lemanu Peleti Mauga ma le faletua o le Kovana, Cynthia Moliga, ma nisi sui mamalu o le malo i lea sauniga.

Na molitai mai lona Sa i le Malumalu o le falema’i tele i Faga’alu mo le sauniga mamalu na tapena e aiga ma le ekalesia na lua. Ma sa ta’ita’ia lea sauniga e Rev. Elder Evagelia ma Fa’afeagaiga tofia fo’i a le Falema’i tele. Ona tu’uina ai lea o ia i le Falema’i e tatalia ai le taimi mo ona sauniga i le aso Lulu ma le aso Toona’i o lenei vaiaso.

MALIU FITAFITA SAMOA FUAVA’A NIU SILA

Mai Samoa, ua lipotia mai ai faapea ua toe taliu i Niu Sila le aiga loto fa’avauvau o le ali’i Samoa sa tautua o se Fitafita o le Fuava’a a le Malo o Niu Sila [NZ Navy], Kilino Joseph Tua, lea na leiloa mai lona tino i le nofoaga o lo’o avea ma mata’aga i Samoa, le To Sua.

O lea nofoaga o lo’o gasolo i ai le to’atele ina ia tulioso e maulu ai ma ‘au’au pe a o’o ina sao lelei le lau oso ma toe manu ane i luga. Peita’i, e le o fa’amatala mai le afuaga ona leiloa o le fitafita.

Ua fa’ailoa e lona tuafafine, “E le o faigofie lo matou toe o ese mai Samoa a’e foliga mai ua matou lafoa’i fo’i si o’u tuagane pele, peita’i, ua mae’a taimi fa’atulagaina mo le sailiga a le NZ Navy, ua mae’a fo’i ona faia le isi sailiga a le matou lava aiga e aofia ai ma nisi sa malaga mai Niu Sila o uo mamae a Joseph ina ia fesaosoani e maulu e tau sailia lona tino.”

Ua atoa le ono vaiaso o faia le sailiga lenei, ma ua matua taliga fo’i e aiga se tala fiafia, ae le o motusia ai lo latou fa’amoemoe pea, atonu e maua lava lona tino ise taimi.

Ua fa’afetaia e le aiga o Joseph Tua le Aiga fo’i e ona le To Sua ona sa matua tatala atu lava ia i latou uma e aofia ai ma e na fa’atautaia sailiga e aunoa ma se totogi.

E 16 aso e fa’atulaga e le NZ Navy mo sailiga o so’o se tasi e leiloa i le sami ma ua  mae’a lelei fo’i nei aso e pei ona fa’atulaga, ae le maua lava se tala fiafia.

E ui ina faigata ona fa’atautaia se pepa maliu, ae ua fa’ailoa e Isabella Tua, “Ua mae’a ona tapena le pepa maliu o Joseph, ae ua tu’u nei i le fa’aiuga a le fale fa’amasino ina ia pasia e saini pe leai, ae o se mea sili ona faigata, o le a faia ona toe sauniga o si ou tuagane pele, ae leai sona tino i lona pusa!”