Tala I Vaifanua

FA’AILOA TAVITA - NA TA’AALO I LA’UA I FANA

 

Mai Federal Way Washington, ua fa’ailoa ai e le taule’ale’a, o se uo mamae a Fa’avela Muipu, Chris Tavita mai Aoa, 23 tausaga o lona olaga,  “sa ma’ua ta’a’alo i le fana, e lei i ai sa’u fuafuaga e fana ai le pele ia te a’u, peita’i o le mea ua tula’i mai, ua matua ou fa’amaise i le aiga o la’u pele, ma ou te le iloa se mea ou te faia e mafai ai ona toe fa’afo’i mai lenei mea ua tupu, na’o lo’u fa’ato’ese ma tatalo i le Atua ia fa’amagalo mai lo’u tagata leaga ma le fa’atauva’a, i la’u mea ua sasi ai nei.”

 

O le sala fo’i ua molia ai o ia i le tulafono, o le fasioti tagata pa’ivale numera muamua, ma ua i’u fo’i lana fa’ai’uga, o le a tulia e ia lona fa’asalaga, ae le o mama ia te ia le mea ua tupu ma ua silafia fo’i e le Atua lona loto fa’anoanoa ma le agaga fa’amaulalo lava e fa’amaise ai i matua ae maise o le aiga atoa o lana pele o Fa’avela.

 

O i la’ua e tele na’ua la’ua uo mamae, ma sa asiasi ane fo’i Vela ia te ia i lona aiga i Federal i Federal Way, lea sa i ai lava fo’i ona uso, ae tupu lenei mea, ma ua fa’ailoa lava e i latou i Leoleo Suesue, le mea tonu na tupu.

 

Ua fa’asalalauina lea tala I le nusipepa a le Seattle Times, peita’i o lo’o i ai fo’i so’otaga i luga o le Facebook.

 

“Tulia lou fa’asalaga ma le fiafia, ia e iloa i lou loto, e silafia e le Atua mea uma i totonu i o tatou mafaufauga ma loto, e fa’amagaloina i tatou uma aua o i tatou e agasala tagata uma. Alofa tele mo oe, e i ai pea le alofa i lo tatou va,” o nisi na o tala ua tusia e se tasi o ana uo mo Tavita, ia malosi ai lona loto e talia le mea tiga ma le faigata ua o’o mai.

 

O lo ua fa’atulaga le tupe e totogia e tatala ai o ia i tua e fa’atali ai lona ulula’i iloiloga i le $750,000.

 

TOE LOKA KOMESINA LEOLEO A SAMOA & AVE TAAVALE

 

Mai le malo o Samoa tuto’tasi, e le o mailloa lelei po’o le a tonu nisi molliga fou e toe saisaitia ai le ali’i Komesina o Leoleo i Samoa, Fuiavailili Egon Keil ina ua o’o ane lana ta’avale i le Ofisa o Leoleo i le ulua’i taeao ua toe amata ai ona faigaluega, Aso Lulu, 12 Iulai, 2017  o le vaiaso nei i Samoa. E le gata i le ali’i komesina, ae sa loka atu ai ma lana ave ta’avale fa’ato’a amata i lana galuega, ina ua taumafai o ia e puipui mai le Komesina i lea lava taeao.

 

Na loka o ia i le sela i le Ofisa o leoleo,ma ua fa’apea fo’i ma lana ave a’avale, ae ua le mafai ona fa’ailoa mai i le ‘au tusitala, se moliga fou ua mafua ai, peita’i, e tolu masina sa tu’ua ai e le komesina ona tiute, ae tula’i e tali i ona mollga sa mua’i fa’amasinoina ai.

 

O le ali’i leoleo ua avea ma ana ave ta’avale, sa ia taumafai fo’i e iloa patino pe aisea ua a’apea ai ona saisaitia le komesina, peita’i, e le’i fa’ailoa ia te ia se tali, ma ua a’afia ai fo’i o ia, ma saisaitia atu ai i le taeao lava lea. Na vala’au e ia lona to’alua i le telefoni ma fa’ailoa i ai le tulaga ua o’o i ai lona aso faigaluega, ma ia fai atu i ai, “O a’u lea e loka, ae sa fa’ao’olima fo’i ali’i leoleo ia te a’u.”

 

I se tala a lea tina i le au tusitala i Samoa sa i ai, “O le aso muamua lea o lo’u to’alua e faigaluega ai o le ave ta’avale a le Komesina, ae ua toe loka, e tatau ona fa’ailoa mai poo le a tonu se mea au molia ai o ia.”

 

Sa fesiligia nisi o leoleo i le Ofisa i lea taeao, po’o le a tonu se mea o latou iloa, ua toe saisaitia ai le Komesina ma lana ave a’avale, ae fai mai nisi o i latou, e matua latou leiloa se mea ua mafua ai, po’o se moliga, masalo o lo’o iloa e ali’i leoleo i tua se mea na latou faia ai lea mea.

 

E to’atele nisi o le aiga o Keil na o’o ane i le Ofisa o Leoleo lea e loka ai o ia, ma latou fa’ailoa, “E matua ese le mea e o’o i le matou tama pe afai e fa’alogo mai i lenei mea ua faia i si matou tuagane, masalo e vave ai ona matou fa’amavae.”

 

Ua taua e le National Prosecution Office a le Malo, e le’i latou iloaina se mea e ao ina saisaitia ai le Komesina. Peita’i ua fa’ailoa e Samoa Mulinuu Mulinuu, o le sui komesina o Leoleo, o le fa’atonuga e saisaitia le afioga le Komesina, sa fa’atonu mai e le ali’i Minisita o Leoleo, Sala Fata Pinati.

 

TUI ATUA TAMASESE EFI FA’AFEILOA’I ‘FLYING FIJIAN’

 

O le aso Lulu o le vaiaso nei, sa feiloa’i e le Ao Mamalu o le Malo o Samoa, Tui Atua Tupua Tamasese Efi le taunu’u i Samoa o le ‘au Lakapi malosi a le Flying Fijians mo a latou ta’aloga fa’avaomalo i Samoa.

 

E tasi le itula sa tatalia ai le o’o ane o le Au Lakapi, ae ina ua to’ai taunu’u i latou, e le’i fa’amaulalo fo’i le ta’ita’i o le ‘au malaga ona ua fa’atuai ona o’o ane i le maota o le Ao o le Malo o Samoa.

 

“E talia ma le fiafia outou i lo’u lava lotoifale, fa’atasi ai ma le lotoifale o Samoa, aua e aga tutusa a tatou aganu’u ma agaifanua pe a tatou fa’atusalia i lo tatou tupuga mai le atuvasa lenei. Peita’i o aga o le fa’agatama o le Lakapi, e fa’ailo ai lo tatou lotonu’u ma le tatou iloa patino o le ta’aloga lava ia. E le sua ai lo tatou toto o lo’o sua ai o tatou tino ma ivi i aso uma o lo tatou ola.”

 

“Po’o le a lava le i’uga o le ta’aloga, e le suia ai le agaga o lo ua fa’afeiloa’ia ai outou I lenei fale, o le fiafia ma le tausimalo lelei, o lo tatou aiga lava lenei, e fa’apena fo’i pe a matou masi’i ma asiasi atu i Fiti i so’o se ala ua mafai ona maua ai se so’otaga. E loloto atu nai ta’aloga, la tatou mafutaga i so’o se taimi.”

 

Na saunoa fo’i lana afioga, e tusa o le suiga ua mae’a ona faia i le Malo o Samoa, ina ia soloa’i o ia e malolo mai le tofi “Ao o le Malo.” Ma sa ia fa’apea ai ma ata, “Ia ua outou iloa, o lo outou asiasi mai, ma ou fa’afeiloa’ia o outou i laufanua o Samoa, o lo ua fa’amauina nei, o se toe tautua lea mo a’u e fa’atino ona ou soloa’i lea e malolo mai le tofi. Ou te talia lava outou i so’o se taimi i le lotoifale o lo’u alga.”

 

Na talia e le ta’ita’i o le aumalaga a Fiti lea saunoaga taua I sana tala, “Matou te fiafia pea e avea oe ma Ao o le Malo o Samoa, aua atonu e maua ai se Eleele mo matou, matou te nonofo ai ma le toe fo’i.”

Comment Here