SOLOFUA MOLIAGA FA’ASAGA I NI ALI’I PAGOTA SE TO’ALUA

Ua talia e le fa’amasinoga fa’aitumalo le talosaga na fa’aulu e le loia a le malo i le aso Tofi na te’a nei, mo se avanoa e solofua ai moliaga mamafa sa molia ai ni ali’i pagota se to’alua, lea na tu’uaia i lo la fasi fa’amo’amo’aina o se isi ali’i pagota i le fa’aiuga o le tausaga na te’a nei ma manu’a tigaina ai o ia.

O le aso Tofi na te’a nei na fa’atulaga e faia ai le ulua’i iloiloga o le mataupu fa’asaga ia Reggie Va’avale ma Mosegi Solia Jr, e mafua mai i le fa’alavelave lea na manu’a tigaina ai foliga o le ali’i o Muaiga Siatiu poo Povi fo’i e pei ona iloa ai, ina ua la fa’aaoga se nofoa u’amea e sasa ai lona ulu ma ona foliga, peita’i na ua valaau le mataupu, na fa’aleo ai loa e le loia a le malo le talosaga ina ia fa’aleaoga le moliaga mamafa o le fa’ao’olima i le tulaga lua sa latou tu’uaia ai ali’i pagota e to’alua, ona o lea ua latou sauni e toe faia se suiga i le pepa o le tagi sa latou fa’aulu, ina ia fa’ailoa ai le moliaga mama o le fa’ao’olima i le tulaga tolu fa’asaga i ali’i o lo o tu’uaia.

Na taua atili e le loia a le malo e fa’apea, o le fa’aiuga ina ia solofua le moliaga mamafa fa’asaga ia Solia Jr ma Va’avale, na faia mai lea ina ua mae’a ona talanoa le malo i le ali’i pagota sa a’afia, ma ia malie ai loa e fa’aitiitia le mamafa o le moliaga e molia ai ali’i sa laua osofaia o ia.

Ua fa’aleaogaina nei e le fa’amasinoga fa’aitumalo le moliaga mamafa o le fa’ao’olima i le tulaga lua sa tu’uaia ai Solia Jr ma Va’avale, ae ua fa’atalitali atu nei i le taimi e faila ai e le malo moliaga mama fa’asaga ia tei laua i le vaiaso fou.

O le vevesi e pei ona manu’a tigaina ai le ali’i o Povi na alia’e mai ina ua mae’a ni ta’aloga a pagota sa faia, ma fa’atonuina ai loa e se ali’i Leoleo ia pagota ina ia toe fo’i i totonu o le fale o lo o taofia ai mo faigalotu o le afiafi.

A o aga’i atu Povi ma isi pagota i totonu o le fale, sa ee leotele mai i ai Solia Jr e fa’anatinati a latou gaioi ua lata le taimi o le faigalotu, ma, e lei logo lelei ia Povi le fa’atonuga a Solia Jr, ma tula’i mai ai loa se taugaupu i le va o ali’i ia e to’alua, sosoo ai loa ma le fa’ao’olima o Solia Jr ia Povi, ma tula’i mai ai loa se feeseeseaiga i le va o ali’i ia e to’alua.

Na taua e Povi le alu i le atoa o Solia Jr ma aumai le ali’i o Va’avale, ma la au to’alua ai loa i le fasiga o ia, ma fa’aaoga e i laua ia se nofoa e sasa ai lona ulu ma manu’a tigaina ai.

FALANIKO STOWERS

O le aso 17 Fepuari lea ua toe tolopo i ai le isi iloiloga o le mataupu a Falaniko Stowers ma le talitonuga o le Fa’amasinoga, e tatau ona o o atu i le aso lea ua mae’a ona sainia se maliliega i le va o le malo ma le itu a Stowers, ma fa’amuta aloaia ai loa taualumaga o lenei mataupu.

Ina ua valaau le mataupu a Stowers poo Nicole fo’i e pei ona iloa ai o ia e le to’atele i le taeao ananafi, na fa’ailoa ai e lana loia fautua ia Douglas Fiaui i le fa’amasinoga le mae’a lea ona latou tauaaoina o le ripoti a le malo atoa ai ma mau fa’amaonia e uiga i le mataupu a Nicole, ma ua latou fa’atali atu nei i le itu a le malo mo le tu’uina atu o se ofa e fa’amuta ai taualumaga o le mataupu.

Na fa’amaonia e le loia a le malo ia Gerald Murphy i le fa’amasinoga lo latou naunau e fa’avave uma talanoaga o lo o faia ma le itu a le ua molia i se taimi o le masina fou, peita’i na saunoa le afioga i le ali’i fa’amasino sili ia Michael Kruse e fa’apea, e le mana’omia e le fa’amasinoga le fa’aauau pea o le masani a le malo ma loia a i latou o lo o molia, o le tulioso atu lea ma maliliega i le minute mulimuli ae o lumana’i ai le amataina o le fa’amasinoga autu.

O Nicole o lo o molia i moliaga mamafa e lua o le umia fa’asolitulafono o vaega o le pauta fa’asaina o le aisa, atoa ai ma le fa’amoemoe e tulei atu i isi tagata. O le mae’a ai ona maua e Leoleo o ni fa’amatalaga mai ni isi o le atunu’u e uiga i le galuega o lo o tu’uaia Nicole i lona faia, o le tuleiina atu lea o le vaega o le pauta fa’asaina o le aisa i tagata, na fa’atulaga ai loa e Leoleo sa latou osofaiga fa’asaga ia Nicole.

I le aso na osofa’i ai e Leoleo ia Nicole, na tu’uaia le maua i ai o vaega o le pauta fa’asaina o le aisa, lea sa utu i totonu o straw ua uma ona tipi ma le fa’amoemoe e tulei ma fa’atau atu i isi tagata.

O lo o taofia pea Nciole i le toese i Tafuna e fa’atali ai le aso lea ua fa’atulaga e toe valaau ai lana mataupu.

TINO LELEIGA

O le vaiaso nei lea na faila ai e le malo le moliaga mamafa o le ave ta’avale ao se’i le laisene fa’asaga ia Tino Leleiga, i le mae’a ai lea o le fa’alavelave lea na maua ai o ia e Leoleo o loo ia fa’afoeina se ta’avale ae o lo o se’i e le fa’amasinoga lona laisene mo le umi e 6 masina.

Na avea le alu saoasaoa o le ta’avale na ave e Leleiga na itu na taofi ai e Leoleo lana ta’avale, ae ina ua fesiligia lona laisene, sa taua ai e le ua molia i Leoleo le se’i e le fa’amasinoga o lona laisene.

O le moliaga mamafa o le ave ta’avale ao se’i le laisene, e fa’amalosia le fa’asala ai o se tasi i le toese mo le umi e 90 aso.