FOLASA GALEA’I

O le aso Lulu o le vaiaso fou lea ua toe tolopo i ai le ulua’i iloiloga (preliminary examination) o le mataupu a Folasa Galea’i, lea na fuafua e fa’ataunu’uina i luma o le afioga i le ali’i fa’amasino ia Fiti Sunia i le taeao ananafi, ina ua talia e le fa’amasinoga le talosaga a le tama’ita’i loia ia Kate Hannah o lo o tula’i mo Galea’i, mo se avanoa e toe tolopo ai le ulua’i iloiloga mo le vaiaso fou.

O lo o tu’uaia e le malo ia Galea’i i le moliaga mamafa o le ave ta’avale ua mafua ai ona o o le oti i se isi tagata (vehicular homicide), ma o lo o tumau pea tuutuuga o lo o tatala ai o ia i tua, ina ua mae’a ona ia totogi le tupe e $2,500 na fa’atulaga e le fa’amasinoga e tatala ai o ia i tua.

O le moliaga e pei ona tu’uaia ai e le malo ia Galea’i, na afua mai lea i se fa’alavelave tau ta’avale na tula’i mai i le vaiaso na te’a nei i Matafao, lea na mafua ai ona o o le maliu i se Tama matua ina ua so’a e le ta’avale sa ia fa’afoeina, e pei ona taua i fa’amaumauga a le fa’amasinoga.

O le moliaga mamafa o le ave ta’avale fa’atamala ua mafua ai ona oo le maliu i se isi tagata, o le vaega D lea o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala foi i le salatupe e le silia i le $5,000, ia poo le fa’asala fo’i i fa’asalaga uma ia e lua.

O ni isi o tuutuuga o lo o tatala ai le ua molia e aofia ai le fa’asa lea ona ia toe soli se tulafono, auai i soo se taimi e fa’atino ai ana iloiloga, ma ia fesootai vava lalata fo’i ma lana loia.

MELVIN ETEUATI

O le ali’i talavou mai Amouli lea na ta’usala e le fa’amasinoga maualuga i moliaga mamafa e 2 o le goai, ua poloaina e le fa’amasinoga le taofia o ia i le toese mo le umi e 28 masina, o se tasi lea o tuutuuga o lana nofovaavaaia e 7 tausaga.

O isi tuutuuga o lana nofovaavaaia e aofia ai lona toe totogiina o tupe sa ia gaoia mai i faleoloa e 2 na a’afia i lana solitulafono, fa’asa ona ia toe tagofia le ‘ava malosi po o fualaau fa’asaina, ua fa’asa fo’i ona ia toe solia se tulafono a le malo a o fa’anofovaavaaia ai o ia mo le 7 tausaga.

E pei ona manino i le folasaga a le loia mo le malo ia Kristy Dunn, o le fale muamua lea na osofa’i e Eteuati sa ia gaoia mai ai se tinoitupe e $500 ma ni isi o mea aoga, ae o le falelona lua sa ia gaoia mai ai le tinoitupe e $700 atoa ai ma ni isi fo’i mea aoga, ma o vaega tupe ia ua poloaina le ua molia na te toe totogi i ali’i faipisinisi e to’alua na a’afia i lana gaioiga.

Ina ua maua le avanoa o Eteuati e fa’atoese ai i luma o le fa’amasinoga, sa ia talosagaina ai loa se avanoa e toe fo’i atu ai i tua i lona aiga e saili sana galuega e tausi ai ona matua. Na taua e le ua molia lona salamo e tusa ai o lana solitulafono sa fai, ma ia ta’utino ai i ali’i fa’amasino, na te le toe faia lava lenei solitulafono i le lumana’i. Sa ia fa’atoese fo’i i aiga na a’afia i lana solitulafono, ina ia latou fa’amagalo o ia.

Na talosaga le loia a Eteuati ia Douglas Fiaui i le fa’amasinoga ina ia sapaia le fautuaga a le Ofisa Fa’anofovaavaaia, ina ia tu’uina atu se faasalaga faanofovaavaaia mo le ua molia, ina ia mafai ai e le fa’amasinoga ona mata’itu ana gaioiga e fai a o fa’anofovaavaaia ai o ia.

Talu ai o le talosaga a Fiaui ina ia faanofovaavaaia Eteuati ina ia mafai ai e le fa’amasinoga ona tulimata’i ana gaioiga uma e faia ao fa’anofovaavaaia ai o ia, na saunoa ai le afioga i le fa’amasino sili ia Michael Kruse e fa’apea, e le mafai e le faamasinoga ona tulimata’i gaioiga uma e faia e le ua molia, aemaise lava pe afai e toe filifili o ia e gaoi ma ave meatotino a isi tagata.

Saunoa atili Kruse e fa’apea, e faigata i le fa’amasinoga ona talia lenei ituaiga manatu, o le ua molia o se tagata na soifua mai i totonu o le atunu’u, e tele avanoa e mafai ai ona ia ola ma saili i ona lima mea e manuia ai, a o lea ua alu ma gaoi toe fa’aleaga meatotino a tagata mai fafo o lo o nonofo i totonu o le atunu’u.

O le moliaga mamafa o le gaoi, e mafai ona fa’asala ai se tasi i le toese mo le umi e le silia i le 7 tausaga, pe fa’asala foi i le salatupe e le silia i le $5,000.

E 14 tausaga na manatu le fa’amasinoga e taofia ai Eteuati i le falepuipui, peita’i ua fa’amalumalu lona tuliina o lea fa’asalaga, ae ua poloaina le fa’anofovaavaaia o ia mo le 7 tausaga i lalo o tuutuuga e ao ona ia usita’i i ai, ma o ni isi o ia tuutuuga e aofia ai le aua lea ne’i ona toe solia se tulafono a le malo, a ia avea o ia ma tagatanu’u lelei e tausisi i soo se tulafono a le malo i taimi uma.

FA’ASI’I AUAPAAU

O le aso Gafua o le vaiaso fou lea ua fa’atulaga e toe fa’aauau ai le fofogaina o le maliliega lea ua mae’a ona sainia i le va o le malo ma le ali’i o Fa’asi’i Auapa’au. E tasi le moliaga o lo o tu’uaia ai e le malo le ali’i o Auapa’au, e na o le moliaga mamafa o le faomea i le tulaga muamua.

Ae i lalo o le maliliega lea ua mae’a ona sainia e le ua molia ma le malo, ua malie ai le malo latou te toe faia se suiga i le moliaga e tasi sa latou tu’uaia ai le ua molia, ina ia fa’ailoa ai le moliaga mamafa o le gaoi.

I le tali ioe ai la o Auapa’au i le moliaga o le gaoi e pei ona toe teuteu e le malo, ua ia sauni ai e ta’utino i le fa’amasinoga e fa’apea, i se taimi o le aso 16 Tesema 2016 i Nu’uuli, sa ia osofaia ai se faleoloa ma le fa’amoemoe ina ia fa’atino ai le solitulafono o le gaoi.

Ua sauni le ua molia e ta’utino i luma o le fa’amasinoga maualuga e fa’apea, a o i ai i totonu o le faleoloa sa ia osofaia, na ia gaoia ai se tinoitupe e $260 ma le fa’amoemoe e le mafai e le pule o lea faleoloa ona toe maua.

Talu ai ni isi o vaega o le maliliega o lo o mana’omia le toe teuteuina ina ia atoatoa lona manino, ua manatu ai le fa’amasinoga e tolopo lenei mataupu i le aso Gafua o le vaiaso fou, ma o lo o taofia pea Auapaau i le toese i Tafuna e fa’atali ai lana iloiloga i le vaiaso fou.