Tala otooto mai le Fa’amasinoga


[ata: SN]
ausage@samoanews.com

VILIAMU LAFAITELE

 

O le masina fou o Novema lea ua fa’atulaga e toe valaau ai le mataupu a le ali’i o Viliamu Lafaitele, i le mae’a ai lea ona ia teena o moliaga mamafa e 2 ua tu’uaia ai o ia e le malo, e mafua mai i le fa’alavelave lea na ia fa’ao’olima ai i se isi ali’i ma manu’a tigaina ai.

 

O moliaga o lo o tu’uaia ai Lafaitele e le malo e aofia ai le fa’ao’olima i le tulaga 2, ma le talepe fale i le tulaga lua.

 

O moliaga e pei ona tu’uaia ai Lafaitele e le malo na alia’e mai i se fa’alavelave na tula’i mai i le masina na te’a nei i Tafuna, ina ua logo e le to’alua o le ali’i na manu’a le Ofisa o Leoleo mo se fesoasoani, ona o manu’a tuga sa a’afia ai lona to’alua.

 

Na taua e le ali’i na a’afia i Leoleo e fa’apea, o se taugaupu i lo la va ma Lafaitele, na fa’ai’u ai loa i lona una’i o le ua molia ma pau ai i luga o ma’a, i le taimi o le latou inugapia sa faia ma ni isi o a latou uo.

 

Ina ua mae’a le inugapia, sa latou fa’amavae ai loa ma taape, ona ia fo’i lea i le latou fale, ae fo’i ia Lafaitele ma isi o ana uo i o latou aiga, e leai ma mea na tupu. Na fa’ateia le na aafia ao nofonofo i totonu o lona fale pe tusa o le itula talu ona tuana’i le latou tafaoga, ina ua malepe le faitoto’a o lona fale, ma ia vaaia ai Lafaitele ua savali atu i totonu o lona fale e aunoa ma se fa’atanaga ma fa’aoolima loa ia te ia, e ala i lona sasa o lona ulu i se laupapa ma manu’a tigaina ai.

 

O le po lava lea na logo ai le Ofisa o Leoleo mo se fesoasoani, ma latou sailia ai Lafaitele ma pu’e fa’apagota ai lava.

 

O lo o taofia pea Lafaitele i le toese i Tafuna i le taimi nei, ina ua le mafai ona ia totogiina le $5,000 lea ua fa’atulaga e tatala ai o ia i tua. Ae afai e mafai ona tatala o ia i tua, ua poloaina o ia ina ia aua ne’i ona toe taumafai e fa’afesootai le ali’i na aafia i lenei mataupu poo lona aiga, fa’asa fo’i ona ia toe tagofia le ‘ava malosi, a ia avea o ia ma tagatanu’u e usitai i soo se tulafono a le malo.

 

SIO APELU

 

Ua molia nei e le malo le ali’i o Sio Apelu i le moliaga mamafa o le ave ta’avale a o se’i lona laisene. O lea moliaga na afua mai lea i le fa’alavelave lea na tula’i mai i luma o le ofisa a le Pulega o le Eletise ma Suavai i Tafuna i le masina na te’a nei, ina ua taofi e Leoleo se ta’avale pikiapu sa vaaia le alu saoasaoa i se taimi o le vaveao.

 

Ina ua fesiligia e Leoleo le ave ta’avale (lea na iloa mulimuli ane o ia o Apelu), i le mafua’aga o le soona alu saoasaoa o lana ta’avale, na tali le ua molia, o lo o fa’anatinati e piki mai lona to’alua e faigaluega i le falema’i i Fagaalu ua manava.

 

Na pepelo Apelu i Leoleo ina ua fesiligia lona laisene, ae ina ua fa’aauau pea le suesueina o ia i le mafua’aga o le soona alu saoasaoa o lana ta’avale, na ta’utino ai le ua molia i Leoleo e fa’apea, o lo o se’i e le Fa’amasinoga lona laisene ave ta’avale, o le mafua’aga lea o lona alu saoasaoa, ina ua ia vaaia le Ta’avale a Leoleo o lo o mulimuli atu i ona tua.

 

O le masina o Me o le tausaga nei na se’i ai e le fa’amasinoga fa’aitumalo le laisene a Apelu, ina ua fa’amaonia le moliaga o le ave ta’avale ‘ona sa tu’uaia ai o ia e le malo. I le aso na se’i ai lona laisene, sa fa’ailoa i ai e le Fa’amasino, e le tatau ona ia toe fa’afoeina se ta’avale i totonu o le taimi o lo o se’i ai lona laisene.

 

Afai ae maua o ia o lo o ia fa’afoeina se ta’avale, o le a molia o ia e le malo i le moliaga mamafa o le ave ta’avale ae o lo o se’i lona laisene, ma, afai ae fa’amaonia e le fa’amasinoga lea moliaga, e ono taofia o ia i le falepuipui mo se umi e le silia i le 5 tausaga.

 

O lo o tumau pea tuutuuga o lo o tatala ai Apelu i tua e fa’atali ai le aso lea ua fa’atulaga e toe valaau ai lana mataupu.

 

Ae o le moliaga o le ave ta’avale ao se’i lona laisene lea ua molia ai o ia e le malo, e mafai ona fa’asala ai o ia i le toese mo le umi e le silia i le 5 tausaga, ae fa’amalosia lona tuliina o le umi e 90 aso i le toese.

Comment Here