Tala otooto mai le Fa’amasinoga


[ata: SN]
ausage@samoanews.com

FA’ALUPEGA VILIAMU

 

O le vaiaso nei lea ua fa’amoemoe le malo latou te faila ai moliaga fa’aopoopo fa’asaga i le ali’i o Fa’alupega Viliamu, e mafua mai i le fa’alavelave lea ua tu’uaia ai nei o ia, i lona fa’aoolima lea i se ave ta’avale atoa ai ma lona ave fa’agaoi o se tupe sa i totonu o le ta’avale a lea ali’i.

 

O lo o tu’uaia e le malo ia Viliamu fa’atasi ai ma se isi ali’i e laititi i lalo o le tulafono o lo o tau sailia nei, i lo la osofaia lea o se ali’i ave ta’avale, fa’ao’olima ia te ia ma gaoi meatotino sa i totonu o lana ato e aofia ai ma se tinoitupe.

 

O le vaiaso na te’a nei na tula’i ai Viliamu i luma o le fa’amasinoga fa’aitumalo, ma ia teena le moliaga mama o le fa’atupu vevesi i nofoaga faitele, ma toe tatala ai o ia i tua e fa’atali ai suesuega a le malo o lo o fa’agasolo e uiga i lenei mataupu.

 

O le aso Tofi o le vaiaso nei lea ua fa’amoemoe le malo e tatau ona oo atu i ai ua mae’a aloaia suesuega a Leoleo, ma iloa tonu ai loa moliaga fa’aopoopo e ono faila fa’asaga i le ua molia.

 

E ui o lea ua tatala i tua Viliamu e aunoa ma se tupe e totogi, ae na fa’ailoa i ai e le Fa’amasinoga e fa’apea, afai e faila e le malo ni moliaga mamafa fa’asaga ia te ia, e i ai le avanoa e ono fa’atulaga ai e le fa’amasinoga se tupe tele e tatala ai o ia i tua.

 

WAYNE MAPU

 

E 20 masina lea ua fa’asala ai e le Fa’amasinoga Maualuga le ali’i o Wayne Mapu i le vaiaso na te’a nei, ina ua fa’amaonia le moliaga mamafa o le fa’ao’olima i le tualga 2 na tu’uaia ai o ia e le malo.

 

Na ulua’i tu’uaia Mapu i le moliaga mamafa o le fa’aoolima i le tulaga muamua, ae i lalo o se maliliega sa latou sainia ma le malo ma talia e le fa’amasinoga maualuga, na ia tali ioe ai i le moliaga o le fa’aoolima i le tulaga lua, ae solofua e le fa’amasinoga le isi moliaga sa totoe ai i le pepa o le tagi sa latou fa’aulu, le moliaga o le talepe fale i le tulaga lua.

 

O le mataupu e pei ona fa’asala ai Mapu i le toese i Tafuna, na afua mai i se fa’alavelave na tula’i mai i Tafuna i le amataga o le tausaga nei, ina ua alu i totonu o le fale o le ali’i na a’afia ma ia fa’ao’olima ia te ia, e mafua mai ina ua fa’ao’olima le ali’i lea i le atali’i o lona uso.

 

Na fa’atoese Mapu i le toese e tusa ai o lana solitulafono sa faia, ma ia talosagaina ai se isi avanoa mo ia se’i toe fo’i atu ai i tua i lona aiga e tausi lona to’alua ma lana fanau. Sa ia taua fo’i e fa’apea, o masina e 9 lea na taofia ai o ia i le toese e fa’atalitali ai le aso e lau ai lana fa’asalaga, ua ia aoaoina mai ai se lesona taua mo lona olaga i le lumana’i.

 

Sa ia fa’atoese i le malo o Amerika Samoa i lona le usitaia o tulafono a le malo, ae faapitoa ai lana faatoesega i le ali’i na a’afia, e ala i lona fa’aigoaina o ia o lona uso. Na taua e Mapu e fa’apea, e ui e lei maua se avanoa la te toe talanoa ai ma le “uso” na a’afia ona ua taofia o ia e Leoleo i le toese, ae i ai lona talitonuga ua ia fa’amagaloina o ia.

 

Na finau le loia a Mapu ia Michael White i le fa’amasinoga mo se avanoa e faanofovaavaaia ai le ua molia. Na taua e White e fa’apea, o le ‘ava malosi le mafua’aga atoa na ala ai ona tula’i mai le fa’alavelave e pei ona a’afia ai Mapu.

 

Na lagolagoina e le loia a le malo ia Robert Morris le talosaga a le itu tete’e mo se fa’asalaga fa’anofovaavaaia, fa’atasi ai ma lana talosaga, ina ia totogi e Mapu le pili o le falema’i a le ali’i na a’afia, e mafua mai i le taimi na manu’a ai o ia ma taofia ai o ia i le falema’i.

 

O ni isi o tuutuuga o le nofovaavaaia a Mapu mo le 5 tausaga, o lona tuliina lea o masina e 20 i le toese, e aofia ai ma masina e 9 lea ua mae’a ona ia tuliina. Ua fa’asa ona ia toe tagofia le ‘ava malosi, fa’asa ona ia toe soli se tulafono a le malo, fa’asa fo’i ona ia toe fa’atupuina lava se vevesi i le va o ia ma le ali’i na a’afia, a ia avea o ia ma tagatanu’u lelei e tausisi i tulafono a le malo i taimi uma.

Comment Here