RINTEL IATALA

O le ali’i lea na alu i le Ofisa o Leoleo i Fagatogo e fia talanoa i se isi ali’i, na fa’ai’u i le toese i Tafuna lana savaliga, ina ua loka o ia e Leoleo i le po o le aso Lua na te’a nei ina ua palauvale o ia i se ali’i Leoleo ma ia fa’aali ai ona uiga le tau pulea i malu o le malo.

Na teena e Rintel Iatala le moliaga o le faatupu vevesi ua tuuaia ai o ia e le malo, ma ua tatala o ia i tua e aunoa ma se tupe e fa’atali ai le isi lana iloiloga lea ua fa’atulaga i le masina fou.

Na taua i fa’amaumauga a le fa’amasinoga e fa’apea, na alu Iatala i le Ofisa o Leoleo e fia talanoa i le tagata e suafa ia Fiaui. Na ulufale le ua molia i le ofisa o leoleo ma fesili ia Fiaui, peita’i na toe fesili i ai Leoleo i le mafu’aaga e fia talanoa ai ia Fiaui. E le i tali le ua molia ae sa ia fa’aalia uiga ita, sosoo ai loa ma lona palauvale i le Leoleo.

Na pu’e faapagota e Leoleo le ua molia ma taofia ai loa i le toese i Tafuna i le po lava lea, seia oo i le taeao na sosoo ai lea na tula’i ai o ia i luma o le fa’amasinoga mo lana ulua’i iloiloga.

O n i isi o tuutuuga ua tatala ai Iatala i tua, e le gata ua faasa ona toe alu i le ofisa o leoleo, ae ua fa’asa fo’i ona ia toe taumafai e fa’afeso’ota’i le Leoleo o lo o tu’uaia na ia palauvale i ai.

IOANE FAIMATA

O le itula e 9:00 i le taeao nei lea ua fa’atulaga e tula’i ai Ioane Faimata i luma o le fa’amasinoga maualuga mo le fa’aauauina o lana mataupu, ina ua ia manatu e faaagafua lana ulua’i iloiloga lea sa fuafua e faia i le Fa’amasinoga Faaitumalo i le aso Lulu o le vaiaso nei.

O Faimata o lo o tu’uaia i moliaga o le gaoi, talepe fale i le tulaga muamua, atoa ai ma lona fa’aaoga o se a’upega e talepe ai se fale, o ni solitulafono mamafa uma ia i lalo o tulafono a le malo o Amerika Samoa.

O le mataupu e pei ona tu’uaia ai Faimata na alia’e mai ina ua pu’e ma saisai e ni tagata Asia o ia, e mafua mai ina ua maua o ia o lo o ulufale faamalosi i totonu o le faleoloa o le Pacific Mini Mart ae gaoia oloa mai totonu o le faleoloa.

Talu ai le matuia o tu’uaiga fa’asaga ia Faimata, ua mafua ai ona taofia o ia i le toese e aunoa ma se tupe ua fa’atulaga e tatala ai o ia i tua.

TU’UAIA SE ALI’I I LONA FA’AOOLIMA I LONA TO’ALUA

O le ali’i lea na ia fa’aoolima i lona to’alua e ala i lona ta tu’i o ona foliga atoa ai ma le ta kiki o lona tua ina ua manava atu i le fale e le o i ai se meaai, ua poloaina e le fa’amasinoga faaitumalo na te totogi le $1,000 ona fa’atoa mafai lea ona tatala o ia i tua. Ae afai e mafai ona tatala o ia i tua, ua faasa ona ia toe taumafai e fa’afesootai lona to’alua, a ia saili se isi nofoaga e nofomau ai, se’i vagana ua toe tuuina atu se isi poloaiga a le fa’amasinoga.

O le ali’i lenei na amata sailia mai e le Fa’amasinoga Faaitumalo i le masina o Me o le tausaga na te’a nei, ina ua fa’alua ona le oo atu i ana iloiloga sa fa’atulaga, ma poloaina ai loa e le Fa’amasinoga se tusi saisai e pu’e fa’apagota mai ai o ia.

Ae o le mataupu e pei ona tu’uaia ai o ia i lona fa’aoolima i lona to’alua, na mafua ai loa ona maua o ia e Leoleo, ma taofia ai loa i le toese i Tafuna e faatali ai lana iloiloga i le aso Lulu na te’a nei.

O le vevesi na tula’i mai ina ua e e le to’alua a le ua molia mo se fesoasoani, na vili ai loa e le Tina a le ua molia le Ofisa o Leoleo mo se lavea’i. Na sola ese le ua molia ma ave lana fanau teine e to’alua ina ua o atu Leoleo. Na faamatala a le fafine gaioiga a le ua molia sa faia ia te ia, e aofia ai le ta tu’i ma ta kiki o ia.

O le aso na sosoo ai na toe o atu ai Leoleo ma maua atu ai le ua molia i le fale, ma pu’e fa’apagota mai ai loa o ia. Ua faasa e le fa’amasinoga le ua molia ona toe taumafai e fa’afesootai lona to’alua ma lana fanau, a ia saili se isi nofoaga e nofo ai mo le taimi nei, se’i vagana ua toe tuuina atu se isi poloaiga a le fa’amasinoga.