PASIA IUGAFONO FA’AMALOLO AI LE FONO MO LE 2 VAIASO

O le taeao nei na pasia ai e maota ta’itasi a le Fono Faitulafono a laua i’ugafono e aloaia ai le malologa a le Fono mo le umi e 2 vaiaso. O le aso lea na amata aloaia ai malologa a maota ta’itasi ma le fa’amoemoe e toe amata galuega i le aso Gafua, Ianuari 30 i le itula e 10:00 i le taeao.

I le aga’i atu ai o maota ta’itasi o a laua malologa, ua fautuaina ai e ta’ita’i fono afioga i Senatoa ma Faipule ina ia sauniuni mo le galuega tele lea ua tapena atu nei i ai le Fono Faitulafono, o le iloiloina lea atoa ai ma le fa’amaoniaina o tofiga a le afioga i le ali’i kovana, mo i latou ua filifilia e avea ma Fa’atonusili o Matagaluega ma Ofisa eseese a le malo.

Saunoa le peresetene o le maota maualuga ia Gaoteote Palaie Tofau e fa’apea, o lo o i ai le fa’amoemoe e tatau ona mae’a le vaiaso muamua lea e toe a’e mai ai le Fono mai lana malologa, ua taunu’u uma atu i le Fono tofiga fou a le ali’i kovana, ma amata fa’atulaga ai loa aso ma taimi o iloiloga a komiti ta’itasi, i le mae’a ai lea ona galulue o Loia i le tapenaina o i’ugafono mo le fa’amaoniaina o suafa o i latou ua tofia i tofiga ta’itasi.

I luma o le maota o sui i le taeao nei, na toe talosagaina ai e le afioga i le ali’i faipule ia Vesi Talalelei Fautanu Jr le fofoga fetalai ina ia silasila toto’a i ripoti o lo o fa’ailoa atu ai agava’a ma tala’aga o galuega sa galulue i ai i latou ua tofia e avea ma fa’atonusili a le malo, ina ia mafai ona silasila ma faitau i ai afioga i sui mamalu ao lumana’i ai taimi ma aso o iloiloga.

I le silia ai i le 10 le aofa’i o tofiga a le kovana ua mae’a ona fa’ataunu’uina, e tusa ma le 8 tofiga ua mae’a ona fa’aoo atu i le Fono Faitulafono, ma le fa’amoemoe o le vaiaso e toe a’e mai ai le Fono o le a fa’ao’o atu ai isi tofiga ua mae’a ona faia ma sainia.

ALOAIA TAUTUA TOFA VELEGA SAVALI E ALA I SE IUGAFONO A LE SENATE

E ui ua mae’a ona tauaao atu le kopi o le iugafono a le Fono Faitulafono e aloaia ai le tautua a le tofa a Velega Savali, i taimi o lona toe sauniga i le tausaga na te’a nei, o le taeao nei na fa’atoa pasia aloaia ai e le Fono Faitulafono lenei iugafono, e ala i le pasia e maota e lua i le palota fulisia.

O le tofa Velega na soifua mai i le aso 11 Ianuari 1943 i lona nu’u o Ofu, Olosega ma Fitiuta i Manu’a, ae na usufono o ia i le aso 15 Oketopa 2016 i le falema’i o le LBJ i Faga’alu ina ua 73 tausaga o lona soifua.

Na amata le soifua aoaoina o Velega i Manu’a, ma fa’asolo atu ai loa i Hawaii ma Amerika e fa’aauau ai lona tomai i le sailiina lea o fa’ailoga eseese, ma i’u ina galue ai o ia i ni galuega eseese i totonu o Amerika, a o lei toe fo’i mai e tautua i le faigamalo a Amerika Samoa.

E tele vaega eseese sa o o i ai le soifua galue o Velega ina ua toe taliu mai i Amerika Samoa, e pei o le avea lea o ia ma totino o ni isi o faigamalo ua mavae atu, e aofia ai le faigamalo a Tauese ma Togiola, atoa ai ma le faigamalo a Togiola ma Faoa.

Sa galue o ia i le Ofisa o le sui faipule a Amerika Samoa i le laumua i Uosigitone i le taimi ao avea ai le tofa a Fofo Sunia ma faipule i Uosigitone. O ni isi o ana tautua iloga i le malo e aofia ai le tausaga na tofia ai o ia e kovana Togiola Tulafono e avea ma Teutupe a le mlao mo se taimi, sa avea fo’i o ia ma sui tauva mo le tofi lutena kovana i le la paga ma Afoa M Lutu i se tasi o faiga palota e ui e lei manuia le la taumafaiga.

Sa avea o ia ma senatoa mo le itumalo o Manu’a #2 mo le nofoaiga lona 31 ma le 32, lea fo’i na galue ai i le komiti o le Litaea, Atina’e o le Tamaoaiga o le malo, Soifua Maloloina, aemaise ai le avea ma Ta’ita’i o le Komiti o le Pulega o le Eletise ma le Suavai.

I lana tautua i le Ekalesia, sa avea ai o ia ma Tiakono mo le Ekalesia EFKAS i Poloa, fa’apea ai ma le Ekalesia EFKAS i Ofu, Manu’a ina ua fa’aee i ai le suafa Velega e lona aiga.

O le a misia lenei Tama o le atunu’u i le tele o uiga lelei ma le tau sa’afia sa ia fa’atinoina mo soo se tasi.

FESILIGIA FAIMEALELEI LE FA’AMALOSIA O TUALFONO UA UMA ONA PASIA

Ua talosagaina e le afioga i le ali’i faipule mai le afioaga i Aua ia Faimealelei Anthony Fu’e Allen le fofoga fetalai o le maota o sui, ina ia vaavaai i auala o lo o fa’amalosia ai e le vaega fa’amalosi tulafono a le malo le tele o tulafono ua mae’a ona pasia e le Fono ma sainia e le afioga i le ali’i kovana ina ia avea ma tulafono.

O ni isi o ia tulafono e aofia ai le tulafono lea e fa’asa ai ona paka ni ta’avale i vaega ua faapitoa e paka ai na o ta’avale a i latou e i ai manaoga faapitoa o le tino ma le mafaufua, tulafono e fa’asa ai le ulaula tapa’a i nofoaga faitele aemaise ai o luga o ta’avale la’upasese, ma le tulafono e fa’asa ai le fa’alapisi i nofoaga faitele i totonu o le atunu’u.

Saunoa Faimealelei e fa’apea, o le taua o le malamalama o le Fono Faitulafono i auala o lo o fa’amalosia ai tulafono nei, ona e foliga mai o lea ua i ai tulafono ae o lo o fa’atamala le vaega fa’amalosi tulafono e fa’amalosia tulafono, ma e ono avea lea ma fa’aletonu i le tautua a le faigamalo.