TOE A’AFIA FO’I SE ALI’I I LE TULAFONO

O le ali’i lea na ta’usala a le fa’amasinoga i le 2012 i le moliaga mamafa o lona umia fa’asolitulafono o vaega o le laau fa’asaina o le mariuana, ua toe a’afia fo’i o ia i le tulafono i le vaiaso nei, ona o tu’uaiga i lona fa’ao’olima lea i lona to’alua.

Talu ai le matuia o le fa’alavelave ua tu’uaia ai e le malo le ua molia, aemaise ai o lea ua toe a’afia o ia i le tulafono ae o lo o nofovaavaaia o ia, toe i ai fo’i ana salatupe e le i totogiina i le fa’amasinoga fa’aitumalo, ua fa’atulaga ai loa e le afioga i le ali’i fa’amasino ia Fiti A. Sunia le tinoitupe e $1,000, ona fa’atoa mafai lea ona tatala o ia i tua e fa’atali ai lana iloiloga lea ua fa’atulaga e faia i le aso 28 Novema 2016.

O le vevesi na tula’i mai ina ua tula’i mai se taugaupu i le va o le ulugali’i i le aso Gafua na te’a nei, ma i’u ai loa i le fa’ao’olima o le ua molia i lona to’alua, ma vili ai loa e le fafine Leoleo mo se fesoasoani.

Na oo atu le fafine i le fale fa’amasino i le taeao ananafi ma talosaga i le loia a le malo, ina ia fautua i le fa’amasinoga e poloa’i lona to’alua e aua ne’i ona toe taumafai e fa’afeso’ota’i i laua ma lana tama teine e 5 tausaga le matua, ona ua fefe lana tama i lona saua.

Ua poloaina e le afioga i le ali’i fa’amasino ia Sunia le tu’uina atu o le mataupu a le ua molia e fofogaina i luma o le fa’amasinoga o Aiga, Fualaau Fa’asaina ma le ‘Avamalosi (FDA Court).

O lo o taofia pea le ua molia i le toese i Tafuna e fa’atali ai le taimi e tatala ai o ia i tua.

SIVANILA JR TAUINAOLA

“Afai e te toe solia se isi poloaiga a le fa’amasinoga, ia e manatua o lo o i ai aso e 35 e tatau ona taofia ai oe i le toese ua fa’amalumalu e le fa’amasinoga lona tuliina, atoa ai ma le 24 masina lea o lo o fa’anofovaavaaia ai oe e le fa’amasinoga”, o le fautuaga lea a Fiti A. Sunia i le ali’i o Sivanila Jr Tauinaola i le taimi na fofogaina ai le fa’asalaga a le fa’amasinoga fa’aitumalo fa’asaga ia te ia i le taeao ananafi.

O le faaiuga o le tausaga e 2014 na ta’usala ai e le fa’amasinoga fa’aitumalo ia Tauinaola i le moliaga mama o le fa’ao’olima i le tulaga lua, ma fa’anofovaavaaia ai o ia mo le 18 masina, ae o le taeao ananafi na toe ta’usala ai fo’i le ua molia e le fa’amasinoga fa’aitumalo i le isi moliaga mama, o le faaleaga meatotino lea i le tulaga tolu, e mafua mai i le fa’alavelave lea na ia ‘ona ai ma talepe le faitoto’a pito i tua o le fale o le latou aiga.

O le fa’afitauli numera tasi o lo o fetaia’i ma Tauinaola e pei ona taua e loia a itu e lua, o le faigata lea ona ia manumalo i le ‘ava malosi.

O tuutuuga la o le nofovaavaaia e 24 masina a Tauinaola lea ua tu’uina atu e le fa’amasinoga, e le gata ua fa’asa ona ia toe tagofia le ‘ava malosi, ae ua fa’asa fo’i ona ia toe soli se tulafono a le malo, ae ua fautuaina o ia ina ia auai i ni aoaoga e fesoasoani ai i le fa’afitauli o le ‘ava malosi o lo o a’afia ai o ia.

E 10 aso ua poloaina o ia e le fa’amasinoga e taofia ai i le toese i Tafuna, lea e aofia ai aso e 10 lea ua mae’a ona ia tuliina i le toese, ma o le aso ananafi na fa’asa’oloto ai e le fa’amasinoga le ua molia i lalo o fautuaga ina ia usita’i i poloaiga uma a le fa’amasinoga.

“O le autu o le mataupu e pei ona toe molia ai oe e le malo, e le o le talepeina o le faitoto’a, ae oe lou soliina o le tulafono, e taua tele lou usita’i i le tulafono, ina ne’i a’afia ai le lumana’i o lou olaga”, o le fautuaga fa’ai’u lea a le fa’amasinoga ia Tauinaola.