Ads by Google Ads by Google

Tala otooto o Fa’amasinoga


[ata: archive]
ausage@samoanews.com

TETE’E LE ALI’I NA FAIA UIGA MATAGA I LONA AFAFINE I ONA MOLIAGA

 

O le aso 24 Fepuari 2017 lea ua fa’atulaga e faia ai le ulua’i iloiloga o le mataupu a le Tama lea o loo tu’uaia i lona faia o uiga mataga i lona afafine e 13 tausaga le matua, i le mae’a ai lea ona tula’i o ia ma teena tu’uaiga a le malo fa’asaga ia te ia i luma o le fa’amasinoga maualuga i le taeao nei.

 

O le ua molia o loo tuuaia o ia e le malo i moliaga mamafa e 4 atoa ai ma le moliaga mama e tasi, e mafua mai i le fa’alavelave lea o loo tu’uaia ai o ia i lona faia lea o ni uiga mataga i lona afafine moni lava i le 2 vaiaso talu ai.

 

Na taua e le teineietiti na a’afia i Leoleo le tago atu o le ua molia i ona itutinosa ona o se lagona e fa’amalie ai ona lagona, ma ia lagonaina ai le fefe ma le le mautonu i lea taimi, ma ia fa’ailoa ai loa i lona Tina le fa’alavelave sa tupu, ma tofu atu ai loa le mataupu i le Ofisa o Leoleo.

 

Na taua e le teineititi na a’afia i Leoleo lona fiu e tete’e ese le ua molia mai luga o lona moega, ae sa fa’aauau pea ona faia e le ua molia nei uiga mataga ia te ia, ae ina ua fesiligia e Leoleo le ua molia, sa ia ioeina ai lona faia o uiga mataga i lona afafine ona o le manatu e fa’amalie ai lagona tu’inanau sa ia te ia.

 

O ni isi o tuutuuga ua tuuina atu e le fa’amasinoga i le ali’i amio valea ua tu’uaia nei, o le fa’asa lea ona ia toe taumafai e fa’afesoota’i lona afafine i soo se auala, fa’asa fo’i ona ia toe soli se tulafono, a ia avea o ia ma tagatanu’u e tausisi i tulafono a le malo i taimi uma.

 

O loo taofia pea le ua molia i le toese i Tafuna ina ua le mafai ona ia totogiina le $25,000 ua uma ona fa’atulaga e le fa’amasinoga e tatala ai o ia i tua.

 

JOEITA FA’AALIGA

 

O le vaiaso fou lea ua fa’amoemoe le malo latou te failaina ai moliaga mamafa e 2 o le sola ese mai le toese fa’asaga i le ali’i o Joeita Fa’aaliga, e tusa ai ma fa’alavelave e lua lea o loo tu’uaia ai o ia i lona sola ese lea mai le toese i Tafuna ao taofia ai o ia.

 

Ina ua valaau le mataupu a Fa’aaliga i luma o le fa’amasinoga maualuga i le taeao ananafi, na talosaga ai le loia a le malo ia Bob Pickett i le fa’amasinoga ina ia toe tolopo le mataupu a le ua molia mo se isi 2 vaiaso, ae sei fa’amautu moliaga o loo fuafua le malo e faila fa’asaga i lenei ali’i.

 

O le iloiloga a Fa’aaliga lea na fuafua e faia i le taeao ananafi, e iloilo ai tu’uaiga o lona le usitaia lea o poloaiga o lana nofovaavaaia, peita’i na fa’ailoa e le loia a le malo e fa’apea, e tatau ona faila muamua e le malo moliaga o le sola ese mai le toese faasaga ia Fa’aaliga, ona fa’atoa mafai ai loa lea ona fa’ataunuu lana iloiloga lea ua faatulaga e iloilo ai tu’uaiga o lona le usitaia lea o poloaiga o lana nofovaavaaia.

 

O se tasi o poloaiga o le nofovaavaaia a Fa’aaliga sa tu’uina atu e le fa’amasinoga maualuga i le aso na lau ai lana fa’asalaga, o le fa’asa lea ona ia toe solia se tulafono a le malo, peita’i o le tausaga lenei e pei ona taua e le malo, na sola fa’alua ai Faaaliga mai le toese ao taofia ai o ia mo le tuliina o lana fa’asalaga fa’a falepuipui e 28 masina, e mafua mai ia ua ta’usala o ia e le fa’amasinoga i le moliaga o le talepe fale ma le gaoi.

 

E pei ona taua atili i fa’amaumauga a le fa’amasinoga, o le taimi lea na a’afia ai Fa’aaliga i le solitulafono e pei ona ta’usala ai o ia i le 2013, sa nofo fa’asolitulafono o ia i totonu o le atunu’u, talu ona ulufale mai i le pemita e 30 aso i le tausaga e 2012.

 

VAEGA LOTONU’U

 

O le vaiaso nei na faila ai e le malo le moliaga mamafa o le ave ta’avale ao se’i le laisene ave ta’avale fa’asaga i le alii o Vaega Lotonu’u, e mafua mai i le fa’alavelave lea na maua ai o ia e Leoleo o loo ia fa’afoeina se ta’avale, e ui e 2 tausaga lea o loo se’i ai e le fa’amasinoga fa’aitumalo lona laisene, ina ua ta’usala o ia i le moliaga o le ave ta’avale ‘ona i le tausaga na te’a nei.

 

A o tiute ni Leoleo se to’alua i luga o le alatele i le tuaoi o Aua ma Leloaloa, sa maitauina ai se ta’avale pikiapu lanu uliuli o loo aga’i mai i le kamupani ma le faamoemoe e aga’i atu i le itu i sasa’e i se saoasaoa uiga ese.

 

Na taofi e Leoleo le ta’avale ma fesiligia ai le ave ta’avale i le mafua’aga o lona alu saoasaoa, peita’i na taua e le ave ta’avale lona natinati e momoli fualaau a si ona Tina matua o loo fa’atali mai i le fale.

 

Ao fa’agasolo fesili ma tali a Leoleo ma le ali’i o Lotonu’u, na vaaia e Leoleo foliga fefe o le ua molia, ma talosagaina ai loa o ia e oso i fafo ma le ta’avale. Ina ua fa’aauau fesili a Leoleo fa’asaga i le ali’i ua molia, na fa’afuase’i ona fa’apea se tala a le ua molia, “ua ou malie lava i le mea e oo ia te a’u”.

 

Na fesili se tasi o Leoleo ia Lotonu’u poo le a le uiga o lana tala, ae na tali le ua molia, ua ia malie lava i le fa’aiuga e faia ia te ia, ona e le o fa’atagaina o ia ona ia fa’afoeina se ta’avale, ae o lea ua la taofia o ia.

 

O se tasi o tuutuuga o le nofovaavaaia a Lotonu’u i le aso na lau ai lana fa’asalaga ma se’i lona laisene, ina ua ta’usala o ia i le moliaga mama o le ave ta’avale ‘ona, o le fa’asa lea ona ia toe aveina se ta’avale i totonu o le 2 tausaga.