Ads by Google Ads by Google

Tala otooto o Fa’amasinoga


[ata: archive]
ausage@samoanews.com

TONY KOME

 

O le aso Lua o le vaiaso fou lea ua fa’atulaga e tula’i ai le ali’i o Tony Kome i luma o le fa’amasinoga maualuga, mo le tu’uina atu o sana tali e tusa ai o moliaga fa’asaga ia te ia, e mafua mai i le fa’alavelave lea na latou fa’ao’olima ai ma ni isi o ana uo i se ali’i i Iliili ma manu’a tigaina ai lea ali’i.

 

O loo tu’uaia e le malo ia Kome i le moliaga mamafa o le fa’ao’olima i le tulaga lua atoa ai ma le isi moliaga mamafa o le taumafai lea e talepe se fale o se aiga i le tulaga muamua.

 

O le aoauli nei na fa’atulaga e faia ai le ulua’i iloiloga a Kome i luma o le fa’amasinoga fa’aitumalo, mo le iloiloina lea e le fa’amasinoga o mau a le malo e lagolago ai tu’uaiga fa’asaga ia te ia, peita’i e lei fa’ataunu’uina lea iloiloga, ina ua manatu le ua molia e fa’aagafua ona aia tatau, ae tu’u sa’o atu loa lana mataupu e fa’atulaga se aso o lana iloiloga i luma o le fa’amasinoga maualuga.

 

O le po o le aso 12 Novema 2016 i Iliili o loo tu’uaia e le malo na tula’i mai ai lenei fa’alavelave, ina ua tula’i mai se vevesi i le va o Kome ma le ali’i na a’afia, ma i’u ina tulioso atu ai loa ma isi ali’i sa i ai fa’atasi ma Kome e aofia ai Frederick Crichton ma latou fasi fa’amo’amo’a loa le ali’i na a’afia ma manu’a ai se vaega o lona tino.

 

Na taua i fa’amaumauga a le fa’amasinoga e fa’apea, o Kome lava le ulua’i tagata na muamua tau atu i ai le ali’i na a’afia, ma ia fesiligia ai loa o ia pe sa ia iloa atu ali’i e to’alua sa ui atu i tua o lona fale, peita’i e le gata na tali Kome i le ali’i na a’afia na te le iloaina ni ali’i o ui atu i tua o lona fale, ae sa ia fa’aali fo’i ni uiga i le ali’i na a’afia e atagia mai ai lona manatu e fa’atupu se vevesi.

 

Na fai le ali’i na a’afia ia Kome e soso ese ma ona luma, peita’i sa tu pea le ua molia i luma o le ali’i na a’afia, e foliga o le a ia sauni la te fusu, o lea na una’i ese ai loa e le ali’i na a’afia ia Kome mai ona luma ma sulu ai i luga o le paepaema’a sa i ona tua, o le taimi fo’i lea na togi ai loa e Crichton ia le ali’i na a’afia ma tau i lona lima le ma’a, ma tulioso atu ai loa Kome, Crichton ma isi ali’i sa i ai ma latou fasi to’atele loa le ali’i na a’afia.

 

Ina ua mae’a ona fasi e Kome ma ana uo le ali’i na a’afia, sa la aga’i atu ma Crichton ma taumafai e kiki le faitoto’a o le fale a le ali’i na a’afia ma la valaau i ai e sau i fafo ma le fale, afai e leai, o le a latou susunuina le fale ma fa’aleaga.

 

MATTHEW BARJA

 

Na avea fa’amatalaga fou ia ua maua e le fa’amasinoga maualuga mai le ripoti a le Ofisa Fa’anofovaavaaia, ma mafua’aga ua toe tolopo ai le lauina o le fa’asalaga a le ali’i o Matthew Barja seia aulia le tausaga fou, ae sei alo atu le fa’amasinoga e iloilo atili le tulaga tonu o fa’amatalaga fou e uiga i le mataupu a Barja.

 

O le taeao nei lea na fa’atulaga e lau ai le fa’asalaga a le ali’i o Barja, i le mae’a ai lea ona ta’usala o ia e le fa’amasinoga maualuga i le moliaga o le gaoi, i lalo o se maliliega na latou sainia ma le malo, lea fo’i ua talia e le fa’amasinoga maualuga.

 

O se vaega o le ripoti a le Ofisa Fa’anofovaavaaia sa tu’uina atu i luma o le fa’amasinoga maualuga i le taeao ananafi, o loo taua ai e fa’apea, e to’alua ali’i Samoa na ta’ita’ia le fa’alavelave lea na latou osofaia ai ma Barja le Faleaoga a le Aoga Maualuga a Tafuna, ma ave fa’agaoi ai le tele o meaaoga e aofia ai masini iPads e fa’aaoga i meaaoga a tamaiti aoga.

 

O le ali’i o Barja, o ia o se ali’i na fanau i Amerika Samoa ae tupuga mai i matua Filipaina, ma o popolega o le fa’amasinoga o loo i ai i le mae’a ai lea ona maua o fa’amatalaga fou mai le Ofisa Fa’anofovaavaaia, ne’i avea le molia na o le ali’i o Barja i lenei mataupu ma auala e alia’e ai ni fesili i le mafua’aga o le leai o ni moliaga e faia fa’asaga i ali’i Samoa e to’alua sa taitaia le osofaiga.

 

I le ulua’i taimi na fofogaina ai le maliliega a Barja ma le malo i luma o le fa’amasinoga i le masina o Oketopa, na fesili ai le afioga i le ali’i fa’amasino sili ia Michael Kruse i le loia a le malo, poo le se gaioiga ua faia i isi ali’i sa auai fa’atasi ma Barja i le fa’atinoina o le solitulafono, ae na tali le itu a le malo, ua mae’a fo’i ona faila moliaga fa’asaga i ali’i ia, ma o loo fa’agasolo a laua mataupu i luma o le fa’amasinoga fa’aitumalo, ona o i laua o ni ali’i e talavou i lalo o le tulafono.

 

Peita’i o fa’amatalaga fou ua maua e le fa’amasinoga maualuga ua atagia mai ai, e le o failaina e le malo ni moliaga fa’asaga i ali’i Samoa e to’alua sa auai i lenei osofaiga.

 

I le tali ioe ai o Barja i le moliaga mamafa o le gaoi lea ua ta’usala ai o ia e le fa’amasinoga, sa ia ta’utino ai i lona ave fa’agaoi lea o se ato sa i ai iPads e 45, e aofia ai ma se iPad sa ia aveesea mai i totonu o le Ofisa o le JROTC.

 

Ina ua fesiligia e Kruse le ali’i o Barja poo fea ua ave i ai iPads sa gaoia, na tali le ua molia, sa toe fa’afo’i i Leoleo i le taimi na maua ai o ia ma fesiligia e uiga i lenei mataupu.

 

O loo taofia pea i le toese i Tafuna ia Barja e fa’atali ai le aso 13 Ianuari 2017 lea ua fa’atulaga e toe valaau ai lana mataupu.