Ads by Google Ads by Google

Tala otooto o Fa’amasinoga

ausage@samoanews.com

ABRAHAM MCMOORE

 

O le aso 9 Fepuari lea ua fa’atulaga e lau ai le fa’asalaga a le ali’i o Abraham McMoore, i le mae’a ai lea ona ta’usala o ia e le fa’amasinoga maualuga i le taeao ananafi, i moliaga mama e lua o lona umia fa’asolitulafono o se fana e lei lesitalaina, atoa ai ma lona faaaoga fa’asolitulafono o se fana.

 

O le taliaina ai e le fa’amasinoga o le maliliega na sainia e McMoore ma le itu a le malo, na talosaga ai loa le malo ina ia solofua isi moliaga o loo totoe ai i le pepa o tagi sa latou fa’aulu fa’asaga ia McMoore, e aofia ai le moliaga o le faatupu vevesi i nofoaga faitele, fa’aoolima i le tulaga tolu, atoa ai ma le moliaga mamafa e tasi o lona fa’aaoga fa’asolitulafono lea o se a’upega.

 

O le mataupu e pei ona ta’usala ai e le fa’amasinoga ia McMoore, na alia’e mai i le taeao o le aso 18 Oketopa 2016 i Utulei, ina ua ia ‘ona ma ia fa’alala se fana i se ali’i sa alu atu e fa’atino sana galuega kamuta i le fale o loo sosoo ma lona fale, ma vili ai loa e le ali’i na a’afia Leoleo mo se fesoasoani.

 

I le tali ioe ai o McMoore i moliaga e pei ona ta’usala ai o ia, sa ia ta’utino ai i luma o le fa’amasinoga maualuga e fa’apea, i le aso e pei ona taua, e le gata sa ia umia ai se tama’i fana o le ituaiga o le .22 “caliber pistol” e lei lesitalaina, ae sa ia umia fo’i lea tama’i fana i le taimi sa ‘ona ai.

 

Na fesili le ali’i fa’amasino sili ia Michael Kruse ia McMoore poo fea ua ave i ai le fana sa ia te ia, na tali le ua molia, “ua mae’a ona tu’uina atu i le Ofisa o Leoleo”. Na toe fesili Kruse ia McMoore poo ai e ana le fana, na tali le ua molia, “O le fana a lo’u Tama”. Na fa’ailoa e le loia a le malo, e le fa’atagaina ituaiga fana nei i Amerika Samoa.

 

E le gata ua poloaina e le fa’amasinoga le Ofisa Faanofovaavaaia e tapena mai se ripoti e fa’atatau i le moliaga o le fa’aoolima i le tulaga tolu, atoa ai ma le moliaga mamafa o le fa’aaoga fa’asolitulafono o se a’upega lea ua solofua e le fa’amasinoga, ae sa ia poloaina fo’i le malo ina ia avatu i luma o le fa’amasinoga le fana i le aso e lau ai le fa’asalaga a le ua molia.

 

O loo tumau pea tuutuuga o loo tatala ai McMoore i tua e fa’atali ai le aso lea ua fa’atualga e lau ai lana fa’asalaga.

 

MALAGA FUATAGAVI

 

O le ali’i lea na sola ese mai i Leoleo ina ua mae’a ona pu’e fa’apagota o ia i le aso 26 Novema 2016, ona o tu’uaiga i lona pisapisao ma lafo upu mataga ao fa’alogologo ona tuaoi, ua molia nei o ia e le malo i moliaga mama e tolu e aofia ai le fa’atupu vevesi, tete’e atu i Leoleo ao taumafai e pu’e fa’apagota o ia, atoa ai ma le sola ese mai le vaaiga a Leoleo.

 

O le taeao ananafi na tula’i ai le ali’i o Malaga Fuatagavi i luma o le fa’amasinoga fa’aitumalo, ma ia teena ai tu’uaiga fa’asaga ia te ia, ma ua toe tolopo nei lana mataupu e toe fofogaina i le fa’aiuga o le masina nei.

 

I le mae’a ai ona fa’ailoa e le to’atele o molimau i Leoleo uiga le mafaufau sa faia e le ua molia i lona aiga i le po e pei ona taua, o lona lafo lea o upu palauvale ma pisapisao, na aga’i atu ai loa Leoleo ma taofia fa’apagota mo le taofia fa’apagota mai o ia mai lona aiga.

 

Ao ta’ita’i mai e Leoleo le ua molia mai fafo o lona fale, na fa’afuase’i ona alu i le atoa o ia ma fai ai loa a latou tuliga ma Leoleo, e lei umi ae maua o ia ma auina atu loa i le Ofisa mo suesuega, o iina na talosagaina ai loa e le ua molia le auina atu o ia i le falema’i i Faga’alu, ona o se vaega o lona tino o loo fa’alogoina le tiga.

 

Na taua i fa’amaumauga a le fa’amasinoga e fa’apea, ina ua taunu’u le ua molia i le falema’i mo togafitiga, o iina na sola ese ai o ia ae le’i oo atu i le foma’i mo le faia o ana togafitiga.

 

E $500 lea ua totogi e le ua molia e tatala ai o ia i tua, ma ua poloaina o ia e le fa’amasinoga fa’aitumalo ina ia auai i soo se taimi e valaau ai lana mataupu, aua fo’i ne’i ona toe solia se tulafono a le malo.