Tala otooto o Fa’amasinoga

ausage@samoanews.com

MOSEGI SOLIA JR

 

O le taeao ananafi lea na fa’atoa faila ai e le malo le moliaga fou o le fa’ao’olima i le tulaga lua fa’asaga i le ali’i o Mosegi Solia Jr, e mafua mai i le fa’alavelave lea o loo tu’uaia ai o ia i lona fa’ao’olima lea i se isi ali’i pagota ma manu’a tigaina ai.

 

O se vevesi na tula’i mai i le va o Solia Jr ma le ali’i pagota na a’afia, na mafua ai loa ona ia fa’ao’olima i ai e pei ona tu’uaia ai o ia e le malo. Na taua fo’i e le ali’i pagota na a’afia i le Samoa News, le fa’aaoga e le ali’i o Solia Jr o se nofoa e ta ai ona foliga, ma mafua ai ona manu’a tigaina o ia.

 

O manu’a na a’afia ai le ali’i pagota na a’afia o Muaiga Siatiu e aofia ai se ta’e i lona ulu fa’apea ai ma se ta’e i lona mata agavale, lea na mana’omia ai filo ta’i 5 e tapuni ai ia manu’a.

 

MICHAEL AGASIVA

 

O le aso Lua o le vaiaso fou lea ua fa’atulaga e faia ai le ulua’i iloiloga o le mataupu a le ali’i pagota lea na musu e tula’i i luma o le fa’amasinoga fa’aitumalo i le vaiaso na te’a nei, i le mae’a ai lea ona toe faila e le malo o moliaga fa’asaga ia te ia.

 

O le amataga o le vaiaso nei na tula’i ai le ali’i o Michael Agasiva i luma o le fa’amasinoga fa’aitumalo, e tusa ai o tu’uaiga fa’asaga ia te ia, i lona faia lea o ni uiga mataga fa’asaga i se tama’ita’i talavou.

 

O le vaiaso na te’a nei sa tatau ona tula’i ai Agasiva i luma o le fa’amasinoga fa’aitumalo, i le mae’a ai lea ona faila e le malo o le latou tagi fa’asaga ia te ia, ae talu ai le musu o Agasiva e tula’i i luma o le fa’amasinoga, ma nofonofo ai lava i totonu o le toese i le mae’a ai lea ona taofia ai o ia e Leoleo mo le 48 itula ae sei fa’agasolo le failaina o moliaga fa’asaga ia te ia, na faia ai loa e le afioga i le ali’i fa’amasino ia Fiti Sunia le fa’aiuga i le vaiaso na te’a nei, ina ia fa’aleaoga le ulua’i mataupu na faila fa’asaga i le ua molia, ae poloaina le toe tatala o ia i tua mai le toese i Tafuna, ina ia maua ai le avanoa e toe pu’e fa’apagota ai o ia e Leoleo pe afai e mae’a ona toe faila e le malo la latou tagi fa’asaga ia te ia.

 

Na fa’amamafa e Sunia i lana fautuaga sa tu’uina atu i le itu a le malo ma Leoleo, le tatau lea ona fa’amanino lelei ia Agasiva le mafua’aga o moliaga ua tu’uaia ai o ia e le malo, ina ia maua ai sona iloa ma faigofie ai ona ioe o ia i le fa’agasoloina o taualumaga uma o lana mataupu.

 

E $5,000 le vaega tupe lea ua fa’atulaga e le fa’amasinoga e tatala ai le ua molia i tua, ma o loo taofia pea o ia i le toese i Tafuna i le taimi nei, e fa’atali ai taualumaga o lana mataupu.

 

O le tausaga na te’a nei na fa’atoa magalo mai ai i tua mai le toese i Tafuna ia Agasiva, i le mae’a ai lea ona tuli o lana fa’asalaga fa’a falepuipui e 5 tausaga, e mafua mai i le fa’alavelave lea na ia fa’aaoga ai le pito o le agaese e fa’aoo ai manu’a i se isi ali’i i le aso 29 Setema 2009 i Amaluia, ma ta’usala ai loa o ia e le fa’amasinoga maualuga i le moliaga mamafa o le fa’ao’olima i le tulaga lua.

 

ALATISE FONOTI

 

Talu mai le masina o Novema 2013 lea na lau ai le fa’asalaga fa’a falepuipui a le ali’i o Alatise Fonoti, ma fa’asala ai o ia e le fa’amasinoga maualuga mo le 7 tausaga i le falepuipui, e mafua mai ina ua ta’usala o ia ma le isi ali’i i le moliaga o le gaoi, o le vaiaso na te’a nei na toe vaaia ai Fonoti i luma o le fa’amasinoga maualuga, ina ua faila e se tagata faipisinisi i le atunu’u sana tagi i le fa’amasinoga maualuga, mo sana poloaiga e poloaina ai Fonoti ina ia toe totogi atu lana $10,000 o loo aitalafu ai.

 

Na taua e le ali’i loia ia Matailupevao Leupolu Jr o loo tula’i mo le tagata faipisinisi o loo tagi i lenei mataupu, e $10,000 le vaega tupe na totogi e le o loo tagi i lenei mataupu ia Fonoti, ma le fa’amoemoe e fa’atau ai se fanua i se nu’u i le itumalo o Tualauta, peita’i o lea ua taofia Fonoti i le toese i Tafuna mo le tuliina o lana fa’asalaga, ae o loo fa’atali pea le o loo tagi i le fanua.

 

Na fesili le afioga i le ali’i fa’amasino sili ia Michael Kruse i le ali’i loia a le itu tagi, poo le a se mea o loo mana’o i ai le tagata faipisinisi, ae na tali le ali’i loia, o loo mana’o le tagata faipisinisi e toe totogi atu e Fonoti lana tupe e $10,000, peita’i na fa’ailoa i ai e Kruse i le ali’i loia, e le mafai e le fa’amasinoga ona fa’agasolo le mataupu fa’asaga ia Fonoti ona o loo taofia o ia i le toese.

 

Sa i ai fo’i le manatu o le ali’i fa’amasino ia Kruse ina ia tu’u atu le mataupu lenei e fofogaina i luma o le afioga i le ali’i fa’amasino ia Elvis P. Patea, ona e i ai tulaga e fete’ena’i ai o ia ma le mataupu, ae talu ai o loo i ai fo’i tulaga e fete’ena’i ai le afioga ia Patea ma i latou o loo a’afia i lenei mataupu, na manatu ai loa Kruse e tu’u aloaia atu loa le mataupu na te taulimaina.

 

E 2 vaiaso lea ua toe tolopo i ai le mataupu ma le tuutuuga, e tatau ona oo atu i le taimi lea ua mautu talanoaga a itu e lua i le tulaga tonu e tatau ona fai.

Comment Here