Ads by Google Ads by Google

Tala otooto o Fa’amasinoga


[ata: archive]
ausage@samoanews.com

SAMUEL WRIGHT

 

O le aso 9 Fepuari 2017 lea ua fa’atulaga e faia ai le fa’amasinoga autu a le ali’i o Samuel Wright i luma o le afioga i le ali’i fa’amasino ia Fiti Sunia (Bench Trial), i le mae’a ai lea ona teena e le ua molia o le ofa sa tu’uina atu e le malo mo ia, ma le fa’amoemoe e fa’amuta ai le mataupu o lo o tu’uaia ai o ia.

 

O Wright o lo o tu’uaia e le malo i le moliaga mama o le fa’ao’olima i le tulaga tolu, fa’atasi ai ma le ali’i o Manu Lefatia, e mafua mai i le fa’alavelave lea na tula’i mai i le toese i Tafuna i le tausaga na te’a nei, lea o loo tu’uaia ai i laua i lo la fa’ao’olima lea i le ali’i pagota ia Larry Samatua.

 

Na fa’ailoa e le tama’ita’i loia fautua ia Kate Hannaher i le fa’amasinoga le mae’a lea ona ia fa’ailoa ia Wright o le ofa a le malo, peita’i o lo o teena e ia tu’uaiga fa’asaga ia te ia, ae ua manatu e fa’atulaga loa se aso e faia ai lana fa’amasinoga autu.

 

O lo o taofia pea Wright i le toese i Tafuna i le taimi nei mo le tuliina o lana fa’asalaga fa’a falepuipui e 15 tausaga le umi, e mafua mai ina ua ta’usala o ia e le fa’amasinoga maualuga i le moliaga o le taupulepule lea e fa’atino le solitulafono o le faomea i le tulaga lua, ona o le fa’alavelave lea na latou osofaia ai ma ni ali’i se to’alua le faleoloa o le Gold Gonda i Faga’alu i le masina o Me 2014.

 

VISE GAUTA

 

O le taeao ananafi na toe tula’i ai i luma o le fa’amasinoga fa’aitumalo le ali’i o Vise Gauta, i le mae’a ai lea ona faila e le malo o moliaga mamafa fa’asaga ia te ia, e mafua mai i le fa’alavelave lea na tula’i mai i Vaitogi i le fa’aiuga o le vaiaso na te’a nei, lea o lo o tu’uaia e le malo se vevesi na tula’i mai ai ma fa’aaogaina ai a’upega malolosi poo fana.

 

O le aso Lua na te’a nei na tula’i ai Gauta i luma o le fa’amasinoga fa’aitumalo mo le ulua’i taimi, ma fa’atonuina ai loa e le afioga i le ali’i fa’amasino ia Fiti Sunia le Masela a le Fa’amasinoga, mo le faia o se suega i le tino o Gauta ina ia iloa ai o lo o ia usitaia poloaiga o lana nofovaavaaia sa tu’uina atu e le fa’amasinoga i le tausaga ua mavae, e aofia ai le fa’asa lea ona ia tagofia o le ‘ava malosi.

 

O le mae’a ai o lea suega na fa’ailoa ai loa e le Masela a le Fa’amasinoga le mae’a ona fa’atinoina o le suega i le tino o Gauta, ma ua fa’amaonia le maua i lona tino o le vailaau o loo maua i le pauta fa’asaina o le aisa, ma poloaina ai loa e le fa’amasinoga le taofia o le ua molia i le toese e aunoa ma se tupe e tatala ai o ia i tua.

 

O le taeao ananafi ina ua mae’a ona faila e le malo le latou tagi fou fa’asaga ia Gauta, na fa’atulaga ai loa e le fa’amasinoga le vaega tupe e $20,000 e totogi ona fa’atoa mafai lea ona tatala le ua molia i tua, peita’i sa fa’ailoa e Sunia i le loia a Gauta e fa’apea, o le tupe lea ua fa’atulaga e tatala ai le ua molia, e mo lana mataupu fou lea ua faila nei, ae o lo o taofia o ia i le toese i Tafuna mo le isi ana mataupu e aunoa ma se tupe e tatala ai o ia i tua.

 

O tuutuuga ua tu’uina atu e le fa’amasinoga ia Gauta e ao ona usita’i i ai, o le fa’asa lea ona ia toe umia ni a’upega mata’utia poo fana, fa’asa ona ia toe tagofia fualaau fa’asaina ma le ‘ava malosi, fa’asa fo’i ona ia toe taumafai e fa’afeso’ota’i le aiga na a’afia i le vevesi lea ua tu’uaia ai o ia e le malo.