Tala otooto o Fa’amasinoga

ausage@samoanews.com

SAUFO’I TUSIGA

 

Ua tu’uina atu e le fa’amasinoga fa’aitumalo sana poloaiga e faia ai se su’esu’ega fa’asaga i le tulaga malosi ma le lelei o lo o i ai le mafaufau o se ali’i o lo o taofia i le falema’i mo i latou e a’afia i le gasegase o le mafaufau i le taimi nei, ina ia mafai ai ona iloa tonu le tulaga e tatau ona taoto ai le mataupu e pei ona tu’uaia ai o ia, pe gafatia i le malosi o lona mafaufau ona tula’i i luma o le fa’amasinoga mo le tu’uina atu o sana tali e tusa ai o tu’uaiga fa’asaga ia te ia.

 

E pei ona fa’aalia i fa’amaumauga a le fa’amasinoga fa’aitumalo, o le ali’i o Saufo’i Tusiga o lo o tu’uaia e le malo i moliaga mamafa e lua o le tagofia o itutinosa o se tama’ita’i fa’apea ai ma le talepe fale i le tulaga muamua.

 

O ia tu’uaiga na afua mai i se fa’alavelave na tula’i mai i le masina na te’a nei, lea o lo o tu’uaia ai e le malo ia Tusiga i lona ulufale fa’amalosi i totonu o se fale o se tama’ita’i ma ia tagofia ona itutinosa.

 

Na fa’ailoa e le afioga i le ali’i fa’amasino ia Fiti Sunia i le Tama o Tusiga i le iloiloga sa faia i le vaiaso nei, le a’afia o lona atali’i i se gasegase matuia o le mafaufau, e moomia fo’i le fa’ainu o ana fualaau ina ia mautinoa ai o lo o tulaga lelei pea lava lona mafaufau i taimi uma.

 

Na fa’amanino atili e Sunia i le Tama o le ali’i ua molia, o le fa’aiuga o le su’esu’ga fa’asaga i le mafaufau o Tusiga, o le a iloa ai loa pe gafatia e ia ona tula’i mo le tu’uina atu o lana tali i le aso o lona fa’amasinoga.

 

O le aso 25 Me lea ua fa’atulaga e toe valaau ai le mataupu a Tusiga i luma o le fa’amasinoga, ae ua toe taofia nei o ia i le falema’i mo i latou e a’afia i le gasegase o le mafaufau i Faga’alu, ina ia mautinoa e fa’aauau pea ona tausia ma vaaia lelei o ia e lana Foma’i.

 

JOSEPH YANDALL

 

O le aso Lulu na te’a nei na tula’i ai le Tama matua ia Joseph Yandall, 87 tausaga o lona soifua i luma o le fa’amasinoga maualuga, ma ia teena ai moliaga mamafa e 3 o lo o tu’uaia ai o ia e le malo, ina ua ia manatu e aua le fa’ataunu’uina lana ulua’i iloiloga lea sa fuafua e faia i luma o le fa’amasinoga fa’aitumalo, ae tu’u sa’o atu loa lana mataupu i luma o le fa’amasinoga maualuga e fa’agasolo ai ona taualumaga.

 

I le teena ai e Yandall o tu’uaiga fa’asaga ia te ia, ua fa’atulaga ai loa lana ulua’i iloiloga e faia lea i le masina fou o Iuni, o le aso fo’i lea ua fa’atulaga e le fa’amasinoga e tatau ona o o atu i ai ua mautu se tulaga tonu e tatau ona o o i ai lana mataupu.

 

O moliaga e pei ona tu’uaia ai e le malo le susuga a Joseph Yandall e aofia ai le moliaga pito sili ona mamafa o le faia o uiga mataga i se teineititi e i lalo o le 12 tausaga le matua (child molesting), o le vaega A lea o solitulafono mamafa, lea e mafai ona fa’asala ai se tasi i le toese mo le umi e le itiiti ifo i le 10 tausaga ae le sili atu fo’i i le 30 tausaga le umi, fa’apea ai ma isi moliaga mamafa e lua, o le taumafai e ave fa’amalosi se tama’ita’i (attempted kidnapping) atoa ai ma le taumafai e tagofia itutinosa o se tama’ita’i i le tulaga muamua (attempted sexual abuse 1st degree).

 

O lo o tumau pea tuutuuga a le fa’amasinoga ua tuuina atu e tatala ai Yandall i tua, i le mae’a ai lea ona ia totogiina o le tupe e $75,000 na fa’atulaga e le fa’amasinoga e tatala ai o ia i tua mai le toese i Tafuna.

 

O ni isi o ia tuutuuga e aofia ai le fa’asa lea ona ia toe taumafai e fa’afeso’ota’i molimau a le malo, e aofia ai tama’ita’i e to’alua o lo o tu’uaia na a’afia i le gaioiga e pei ona molia ai o ia e le malo.

Comment Here