Ads by Google Ads by Google

Tala otooto o Fa’amasinoga


[ata: archive]

SIAOSI IEREMIA

 

O le aso 6 Iulai lea ua toe tolopo i ai e le fa’amasinoga maualuga le mataupu a le ali’i talavou o Siaosi Ieremia, ina ua manino i le silasila a ali’i fa’amasino le tele o vaega e tatau ona toe fa’amanino i le maliliega aufa’atasi lea ua mae’a ona sainia e le ali’i o Ieremia ma le malo, lea fo’i na fuafua e fofogaina i luma o le fa’amasinoga maualuga i le taeao nei.

 

E 3 mataupu tau solitulafono o lo o tu’uaia ai e le malo le ali’i o Ieremia. O ia mataupu e aofia ai tagi e lua ua mae’a ona fa’aulu ma ua i luma nei o le fa’amasinoga maualuga, atoa ai ma le tagi fou e tagi lea o lo o i luma o le fa’amasinoga fa’aitumalo i le taimi nei, lea o lo o tu’uaia ai le ua molia i moliaga eseese e aofia ai le talepe fale i le tulaga muamua ma le moliaga mamafa o le gaoi.

 

O le tausaga e 2014 na ta’usala ai e le fa’amasinoga maualuga ia Ieremia i le moliaga o le gaoi, ma fa’anofovaavaaia ai o ia mo le 5 tausaga i lalo o poloaiga e ao ona ia usita’i i ai, ma o ni isi o ia poloaiga e aofia ai le fa’asa lea ona ia toe soli se tulafono pe tagofia le ‘ava malosi.

 

I le amataga o le tausaga lenei 2017, na toe a’afia ai Ieremia i le tulafono ina ua tu’uaia o ia e le malo i isi fo’i moliaga o le talepe fale ma le gaoi, lea e pei ona i ai tagi e 2 sa fa’aulu e le malo fa’asaga ia te ia. Ona o ia tagi fou ua fa’aulu fa’asaga ia te ia, na talosagaina ai loa e le Ofisa Fa’anofovaavaaia le Fa’amasinoga mo sana poloaiga e fa’aleaoga ai le nofovaavaaia a Ieremia sa tu’uina atu i le 2014, ae poloaina loa o ia e tuli le fa’asalaga fa’a falepuipui o lo o fa’amalumalu e le fa’amasinoga, ona o lea ua fa’amaonia lona le usitaia o tuutuuga o lana nofovaavaaia.

 

I luma o ali’i fa’amasino e to’a 5 sa iloiloina le mataupu a Ieremia i le taeao nei, na ta’utino ai le ua molia i lona le usita’ia lea o tuutuuga o lana nofovaavaaia, e mafua mai i lona toe soli o le tulafono ma tagofia le ‘ava malosi.

 

Na fa’ailoa e le loia a le malo e fa’apea, o se tasi o tuutuuga o le latou maliliega lea ua mae’a ona sainia ma Ieremia, o le tali ioe lea o ia i moliaga o le gaoi ma le talepe fale ma isi tagi sa fa’aulu fa’asaga ia te ia, ae o le a talosaga le malo e solofua le tagi fou lea ua mae’a ona latou fa’aulu fa’asaga ia te ia, o le mataupu lea o lo o i ai pea i luma o le fa’amasinoga fa’aitumalo i le taimi nei.

 

Ae na fa’ailoa e le afioga i le ali’i fa’amasino ia Elvis P. Patea i le itu a le malo e fa’apea, e le mafai e le malo ona latou solofua se tagi fa’asaga i se tagata ua molia o lo o aofia ai ni moliaga mamafa, ona o mataupu uma e aofia ai moliaga mamafa e tatau ona tu’uina atu i luma o le fa’amasinoga maualuga e iloilo ai.

 

Saunoa atili Patea e fa’apea, e le o o le malosi o le fa’amasinoga fa’aitumalo i le tulaga e iloilo ai mataupu tau i solitulafono mamafa, pau le latou vaega e fa’atinoina i lalo o le tulafono o lo o lima ta’ita’iina ai galuega fa’a fa’amasinoga, o le saili lea pe lava mau a le malo e lagolago ai se latou tagi ua fa’aulu, ona tu’uina atu loa lea o lea tagi i luma o le fa’amasinoga e fa’aauau ai.

 

O le aso 6 Iulai lea ua toe tolopo i ai le mataupu a Ieremia, ma le fa’amoemoe e tatau ona oo atu i le aso lea ua maua se faaiuga o lana mataupu o loo i luma o le fa’amasinoga fa’aitumalo.

 

O ali’i fa’amasino sa latou iloiloina le mataupu a Ieremia e aofia ai le afioga a Elvis P. Patea, fa’apea ai ma Fa’amasino Lagolago ia Mamea Sala Jr, Su’apaia Pereira, Satele Lili’o ma Muasau T. Tofili.

 

O le ali’i loia ia Douglas Fiaui o lo o tula’i mo Ieremia ae o le ali’i loia ia Bob Pickett o lo o tula’i mo le itu a le malo.

 

SEMI SAGO

 

E 30 aso le umi lea ua tuli e le ali’i Leoleo ia Semi Sago i le toese i Tafuna, ina ua ta’usala o ia e le fa’amasinoga fa’aitumalo i le moliaga mama o le fa’ao’olima i le tulaga tolu, e mafua mai i se fa’alavelave na tula’i mai i le tausaga na te’a nei, lea na ia fa’ao’olima ai i se ali’i i se Fale Inisinia i Aua ao laei lona toniga Leoleo.

 

E 12 masina na manatu le fa’amasinoga e fa’asala ai Sago i le toese i Tafuna, ae talu ai o itu lelei sa silasila i ai le fa’amasinoga, ua manatu ai loa e fa’anofovaavaaia o ia mo le 12 masina i lalo o poloaiga e ao ona ia usita’i i ai.

 

O ni isi o ia tuutuuga e aofia ai lona tuliina o aso e 30 i le toese, fa’asa ona ia toe soli se tulafono, a ia auai i aoaoga e fesoasoani ai i le tulaga o le ita.

 

Saunoa le afioga i le ali’i fa’amasino ia Fiti Sunia i le taimi na lau ai le fa’asalaga a Sago e fa’apea, o le ua molia, o se ali’i Leoleo sa fa’atauto na te puipuia le tulafono, peita’i ua fa’atino e ia gaioiga e le tusa ai ma le tulafono.

 

Saunoa atili Sunia e faapea, tusa lava po o ia o se Leoleo ua fa’atauto na te puipuia le tulafono, e leai se isi e i luga atu o le tulafaono, ae tutusa tagata uma i lalo o le tulafono, ma, talu ai ua fa’atamala o ia i le fa’atinoina o ona tiute fa’a Leoleo, o le ata vaaia fo’i lea o le ta’u leagaina atu ai o i latou uma ua fa’atauto ma filifilia latou te puipuia le tulafono.

 

O le fa’aiuga o le masina lenei ua fa’amoemoe e mae’a ai le tuliina o le fa’asalaga a le susuga a Sago mai le toese i Tafuna.