Ads by Google Ads by Google

Tala otooto o Fa’amasinoga

ausage@samoanews.com

MAELI LAFOGA

 

Na matua fa’amamafa e le afioga i le ali’i fa’amasino ia Fiti Sunia o le Fa’amasinoga Fa’aitumalo i le vaiaso na te’a nei, i le taimi na lau ai le fa’asalaga a le ali’i o Maeli Lafoga ina ua ta’usala o ia i le moliaga mama o le ave ta’avale ‘ona, e matua leai lava se alofaga o le tagata e maua o lo o ia fa’afoeina se ta’avale ae o lo o se’i lona laisene.

 

“Ia e manatua, o lea ua se’i lou laisene ave ta’avale mo le 6 masina, lona uiga ua le mafai ona e toe fa’afoeina se ta’avale i totonu o le taimi lea ua se’i ai e le fa’amasinoga lou laisene, afai ae molia oe e le malo i lou fa’afoeina o se ta’avale ae o lo o se’i lou laisene ae fa’amaonia e le fa’amasinoga, e matua leai lava se alofaga mo oe, ae mafai ona taofia oe i le toese mo le umi e le silia i le 5 tausaga, ae fa’amalosia ai lou tuliina o le umi e 90 aso i totonu o le toese”, o le saunoaga lea a Sunia i le ali’i o Lafoga i le taim ina tu’uina atu ai lana fa’asalaga.

 

E 12 masina lea ua faanofovaavaaia ai e le fa’amasinoga fa’aitumalo ia Lafoga ina ua ta’usala o ia i le moliaga o le ave ta’avale ‘ona.

 

O ni isi o tuutuuga o lana nofovaavaaia e aofia ai le fa’asa lea ona ia toe fa’afoeina se ta’avale mo le 6 masina, o le umi fo’i lea ua se’i ai lona laisene ave ta’avale, fa’asa ona ia toe tagofia le ‘ava malosi pe na te toe solia se tulafono, a ia avea o ia ma tagatanu’u e tausisi i soo se tulafono a le malo.

 

E fa’atolu ona fa’amamafa e Sunia ia Lafoga le tuutuuga pito taua o lana nofovaavaaia, o le fa’asa lea ona ia toe fa’afoeina se ta’avale ao se’i ai lona laisene.

 

“O lea ua poloaina e le fa’amasinoga le fa’asa lea ona e toe fa’afoeina se ta’avale o le 6 masina, ae mafai lava ona e fa’afoeina se ta’avale i lou lava loto malie, a ia e manatua, afai ae maua oe ma molia i le solitulafono mamafa o le ave ta’avale ae o loo se’i lou laisene, ae fa’amaonia e le fa’amasinoga lena solitulafono, o lou iuga o le toafia lea i le toese mo le umi o lo o fa’atulaga mai e le tulafono”, o le isi lea saunoaga toe fa’amanatu a Sunia ia Lafoga.

 

I le 2 vaiaso talu ai, e to’alua isi ali’i na molia e le malo i le moliaga mamafa o le ave ta’avale ae o lo o se’i a laua laisene, e mafua mai ina ua ta’usala i laua e le fa’amasinoga i le moliaga mama o le ave ta’avale ‘ona.

 

I le taimi na faila ai e le malo moliaga mamafa fa’asaga i ali’i ia e to’alua, na toe fa’amanatu ai e Sunia i ia ali’i le taua tele o le usita’i i le tuutuuga o le fa’asa lea ona ave ta’avale ae o lo o se’i le laisene.

 

Saunoa Sunia e fa’apea e mafua ona fa’amamafa e le fa’amasinoga le tuutuuga o le fa’asa lea ona ave ta’avale ao se’i le laisene, ona o lo o i ai i le tulafono se fa’asalaga fa’a falepuipui e 90 aso e fa’amalosia le tatau lea ona tuli.

 

FASIA FETUAO

 

E 90 aso lea ua poloaina e le fa’amasinoga fa’aitumalo e taofia ai le susuga ai Fasia Fetuao i le toese i Tafuna, ina ua ta’usala o ia e le fa’amasinoga i le moliaga mamafa o le fa’atupu vevesi i nofoaga faitele, aemaise ai o lona ioeina lea o lona le usitaia o tuutuuga o lana nofovaavaaia.

 

E le o se taimi muamua lenei ua a’afia ai Fetuao i le tulafono. I le 5 tausaga talu ai na amata a’afia ai lenei Tama matua i le tulafono, i solitulafono eseese e a’afia ai lona tagofia o le ‘ava malosi.

 

Na amata a’afia mai lava Fetuao i le tulafono i le fa’alavelave lea na ia fa’ao’olima ai i lona to’alua e ala i lona fa’aaogaina o le tama’i naifi safu i’a i le 5 tausaga talu ai, ma fa’aauau mai ai lava le a’afia o ia i solitulafono eseese e aofia ai le fa’atupu vevesi i nofoaga faitele. O ia solitulafono uma e aofia ai lava le ‘ava malosi.

 

O le fa’alavelave fou lea e pei ona ta’usala ai e le fa’amasinoga ia Fetuao, na mafua mai ina ua la vevesi ma lona uso laititi i se la inugapia sa faia, ma vili ai loa e le to’alua o lona uso Leoleo ma taofia ai loa o ia i le toese.

 

E ui na pepelo le ua molia i le fa’amasinoga na te lei tagofia le ‘ava malosi, peita’i na manino i mau fa’amaonia a le malo le ova o lona ‘ona i le taimi na taofia ai o ia e Leoleo.

 

Na fa’ailoa e le afioga i le ali’i fa’amasino ia Fiti Sunia ia Fetuao, le foliga mai lea e le o i ai lava se lesona o ia a’oa’oina mai le tele o avanoa sa tu’uina atu e le fa’amasinoga i tausaga ua mavae.

 

“O le isi taimi e te toe tula’i ai i luma o le fa’amasinoga ona o se isi solitulafono, o le a fa’aopopo e le fa’amasinoga le 60 aso e taofia ai oe i le falepuipui”, o le lapataiga lea a Sunia ia Fetuao.

 

Na fa’ailoa atili fo’i e le fa’amasinoga i lenei ali’i e fa’apea, o le a le taofia e le fa’amasinoga o ia mai lona tagofia o le ‘ava malosi, o lana lava lea filifiliga, ae o le a le alo fo’i le fa’amasinoga i le tu’uina atu o lana fa’aiuga talafeagai e tusa ai o lana solitulafono.