Ads by Google Ads by Google

Tala otooto o Fa’amasinoga

ausage@samoanews.com

TU’UAIA GRANDMOTHER , FASI O LE GRANDDAUGHTER

 

E 66 tausaga o se Tina matua mai le itu i sasae o Tutuila ua taofia nei i le toese i Tafuna, e mafua mai i le fa’alavelave lea ua tu’uaia ai o ia e le malo, o lona fasi fa’amo’amo’a lea o lona granddaughter e 11 tausaga le matua.

 

O le taeao o le Aso Gafua na tula’i ai le Tina i luma o le fa’amasinoga fa’aitumalo ma ia teena ai le moliaga mama o le fa’aoolima i le tulaga tolu, ma le fa’amoemoe o le malo o se taimi o le vaiaso nei latou te failaina ai moliaga fa’aopoop fa’asaga ia te ia.

 

O le mataupu e pei ona tu’uaia ai Togia na tula’i mai i le vaiaso nei, ina ua tu’uina atu i Leoleo se ripoti e fa’atatau i se teineititi e 11 tausaga le matua sa manu’a ina ua fa’ao’olima i ai lona grandmother.

 

Ae i su’esu’ega a Leoleo sa faia e tusa ai o lenei mataupu, o lo o taua ai le fa’aaoga e le ua molia o ni fasi paipa (PVC) i soo se ituaiga e sasa ai le tino atoa o le teineititi na a’afia ma manu’a ai.

 

E $2,000 le tupe na fa’atulaga e le fa’amasinoga e tatala ai le Tina i tua mai le toese i Tafuna, ae i le mae’a ai lea ona finau o lana loia i le fa’amasinoga mo se avanoa e fa’aitiitia ai le aofaiga o lea tupe, na talia ai loa e le afioga i le ali’i fa’amasino ia Fiti Sunia le fa’aitiitia o le tinoitupe i le $1,000.

 

Afai ae mafai ona tatala lenei Tina i tua, ua fa’asa o ia ona toe taumafai e fa’afeso’ota’i le teineititi o lo o a’afia i lenei mataupu, e le mafai fo’i ona toe nofo lea teineititi i le fale o lo o ia nofo ai.

 

Na fa’amaonia e le loia a le malo ia Gerald Murphy i le fa’amasinoga e fa’apea, ua tu’uina atu nei le teineititi na a’afia i lalo o le vaavaiga a le malo.

 

ROY PITOLAU

 

E 45 aso lea ua fa’asala ai e le fa’amasinoga fa’aitumalo le ali’i o Roy Pitolau e taofia ai i le toese i Tafuna, ina ua fa’amaonia tu’uaiga o lona le usitaia lea o poloaiga o lana fa’anofovaavaaia sa tu’uina atu e le fa’amasinoga.

 

E 24 masina o lo o fa’anofovaavaaia ai Pitolau i luma o le Fa’amasinoga o Aiga, Fualaau Fa’asaina ma le Ava malosi (FDA), e mafua mai ina ua fa’amaonia e le fa’amasinoga le moliaga mama o le fa’ao’olima i le tulaga tolu sa tu’uaia ai o ia e le malo.

 

O ni isi o tuutuuga o le nofovaavaaia a Pitolau sa tu’uina atu e le fa’amasinoga, o le fa’asa lea ona ia toe soli se tulafono a ia avea o ia ma tagatanu’u lelei e tausisi i tulafono uma a le malo i so o se taimi.

 

O le masina na te’a nei na ta’usala ai e le fa’amasinoga fa’aitumalo ia Pitolau i le moliaga fou o le fa’atupu vevesi i nofoaga faitele, ma mafua ai loa ona fa’aleaoga tuutuuga o lana nofovaavaaia e pei ona tu’uina atu e le fa’amasinoga i le taeao ananafi.

 

Saunoa le afioga i le ali’i fa’amasino ia Fiti Sunia e fa’apea, o le fa’asalaga fa’a falepuipui e 45 aso sa fa’amalumalu e le Fa’amasinoga o Aiga (FDA) mo Pitolau, ua toe faia nei i ai se teuteuga ina ia poloaina loa Pitolau na te tuliina aso e 45 i le toese.

 

Ua fautuaina atili o ia ina ia usita’i i isi poloaiga o lana nofovaavaaia, afai e leai, e ono mamafa atu se isi fa’asalaga fa’a falepuipui e tu’uina atu ia te ia e le fa’amasinoga i se taimi o i luma, pe afai na te toe soliina se isi lava tuutuuga o lana nofovaavaaia.