Ads by Google Ads by Google

Tala otooto o Fa’amasinoga

ausage@samoanews.com

MOI KERESETA

 

O se matai matua e 58 ona tausaga mai le afioaga o Faleniu na ia tata’eina le faitoto’a tioata o le faleoloa, ina ua musu le fa’atauoloa e toe ave i ai ni fagupia e mafua mai ina ua matua ova lava lona ‘ona, ua tu’uaia nei o ia e le malo i moliaga mama e 2 o le fa’atupu vevesi i nofoaga faitele atoa ai ma le fa’aleaga meatotino i le tulaga tolu.

 

Pe tusa o le itula e 9:35 i le po o le aso To’ona’i o le fa’aiuga o le vaiaso na te’a nei, na logo ai e ni molimau le Ofisa o Leoleo mo se fesoasoani, i le mae’a ai lea ona tata’e e le susuga a Moi Kereseta, poo “Mr. Saleka” fo’i e pei ona iloa ai o ia e le to’atele le faitoto’a tioata o se faleoloa i Faleniu.

 

I fa’amaumauga a le fa’amasinoga, o lo o taua ai e molimau i  Leoleo le ulufale atu o le ua molia i totonu o le faleoloa, ma ia laulauvavale solo ai i totonu, sosoo ai ma lona palauvale i le fa’atauoloa ina ua musu le fa’atauoloa e tu’u atu i ai le ‘ava malosi.

 

O le ua molia e sosoo lava lona fale ma le faleoloa na a’afia e pei ona taua i fa’amaumauga a le fa’amasinoga. E le i umi ae taunu’u loa Leoleo ma latou pu’e fa’apagota ai loa le ua molia ae auina atu loa i le Ofisa mo su’esu’ega. Ao aga’i atu i le Ofisa o Leoleo, sa molimauina le ova o le ‘ona o le ua molia, sa le i mana’o fo’i e usita’i i fa’atonuga a Leoleo, ae sa ia fai i Leoleo e momoli sa’o o ia i lona aiga, ae aua ne’i avea o ia e loka i le falepuipui.

 

I luma o le fale fa’amasino fa’aitumalo i le aso Gafua na te’a nei, na vaaia ai le tula’i o le susuga a Mr. Saleka ma ona foliga salamo, ua te’a ese fo’i le malosi o le ‘ava malosi sa filogia ai lona toto, ae ua na o le luelue ulu lava ma tali lelei i fesili a le afioga i le tama’ita’i fa’amasino ia Gwen Tauiliili-Langkilde.

 

Na teena e le ua molia moliaga ua tu’uaia ai o ia e le malo, ma ua toe tatalaina nei o ia i tua e fa’atali ai le isi ana iloiloga lea ua fa’atulaga i le masina fou o Aokuso. O ni isi o poloaiga ua tu’u atu e le fa’amasinoga e usita’i i ai ao fa’atalitali ai le isi ana iloiloga, ua fa’asa ona ia toe tagofia le ‘ava malosi, fa’asa ona toe alu i le faleoloa na tula’i mai ai le fa’alavelave, a ia avea o ia ma tagatanu’u e tausisi i soo se tulafono a le malo.

 

LOKA E LEOLEO INA UA IA FOLAFOLA LE FASIOTIINA O LONA TO’ALUA

 

Na taofia e Leoleo i le fa’aiuga o le vaiaso se ali’i e 52 tausaga, i le mae’a ai lea o lona folafola o le fana ina o lona to’alua, ina ua ia masalomia o lo o faia se mafutaga fa’anunumi i le va o lona to’alua ma se isi tamaloa.

 

O le taeao o le aso Gafua na te’a nei na tula’i ai lea ali’i i luma o le fa’amasinoga fa’aitumalo, ma ia teena ai le moliaga e tasi o le fa’atupu vevesi i totonu o lona aiga ua tu’uaia ai o ia e le malo, ma fa’atulaga ai loa e le fa’amasinoga le $300 e totogi ona fa’atoa mafai lea ona tatala o ia i tua.

 

O tu’utu’uga e tatau ona usita’i i ai pe afai e tatala o ia i tua, o le fa’asa lea ona ia toe taumafai e fa’afeso’ota’i lona to’alua i soo se auala, pe toe alu fo’i i le fale, a ia saili se isi nofoaga e nofo ai e fa’atalitali ai taualumaga o lenei mataupu. Ua fa’asa fo’i ona ia toe taumafai e faia ni uiga tau fa’amata’u i lona to’alua.

 

I le afiafi o le aso To’ona’i na te’a nei pe tusa o le itula e 5:00 i le afiafi, na fa’afeso’ota’i ai e le fafine na a’afia le Ofisa o Leoleo mo se fesoasoani, ona ua lagona lona sese i lona to’alua lea ua ia folafola le alu atu ma le fana e fana ai o ia, ma mafua ai loa ona ia sola ma lafi i le falesa.

 

O le mae’a ai ona fa’amatala e le fafine o foliga o lona to’alua lea o lo o alu atu e tuliloa atu o ia, na aga’i atu ai loa Leoleo i luga o le auala e saili le ua molia, e le i umi ae vaaia e Leoleo le ua molia o lo o aga’i atu i luga o le auala, ma latou taofia ai loa o ia ae fesiligia e tusa ai o le mataupu, peita’i na fa’aalia e le ua molia i Leoleo, e leai se mea latou te aia ai fua i le mataupu i le va o ia ma lona to’alua, e leai fo’i se mafua’aga o le a taofia ai fua o ia, e leai se mea sese sa ia faia.

 

Ina ua fai Leoleo i le ua molia latou te o i le Ofisa i Tafuna latou te talanoa ai, na tali le ua molia o ia e fia alu muamua e vaai lona to’alua. A o aga’i atu le ta’avale a Leoleo i le Ofisa i Tafuna, na fa’ailoa ai e le ua molia e fa’apea, ua mafua ona sola ese lona to’alua ma lafi, ona sa ia fa’ailoa i ai tala ua ia maua e fa’atatau i le la fa’anunumi ma le isi tamaloa.

 

Ina ua taunu’u le fafine na a’afia i le Ofisa o Leoleo i Tafuna, na ia fa’ailoa ai i Leoleo le tumau pea o lona mana’o e fa’aauai le failaina o lana tagi fa’asaga i lona to’alua, ona e le o se taimi muamua lenei ua ia faia ai lenei mea ia te ia. Na fa’ailoa atili e le fafine i Leoleo ona lagona popole o lo o i ai, pe afai ae latou toe tatalaina i tua lona to’alua e alu atu i le fale, sa talosagaina malosi fo’i e le ua molia se avanoa la te toe talanoa ai ma lona to’alua peita’i sa fa’ailoa i ai e le fafine e le toe i ai se avanoa.

 

Na taua e le fafine i Leoleo e fa’apea, o le vevesi na mafua mai ina ua manava atu i le fale, e na o lana fanau o lo o i ai, ma ia fesiligia ai loa poo fea o i ai le ua molia, ae tali lana fanau, na alu ese atu lava ma le fale i le taeao e le i toe oo atu lava i le fale, o le mafua’aga lea na ia viliina ai loa lona to’alua ma fesili i ai poo fea o i ai, ae ita ai le ua molia ma folafola lona alu atu e fana o ia, ma ia sola ese ai loa mai le fale.

 

Na fa’ailoa atili fo’i e le fafine i Leoleo, e i ai le fana a lona to’alua o lo o teu i le fale, peita’i e le o taua i fa’amaumauga a le fa’amasinoga pe na sailia e Leoleo le fale mo le fanau e pei ona taua e le fafine.