Ads by Google Ads by Google

Tala otooto o le Fa’amasinoga

ausage@samoanews.com

TULIESE TALIU

 

O le taeao ananafi na tu’u aloaia atu ai e le afioga i le ali’i fa’amasino sili ia Michael Kruse le fa’aiuga a le fa’amasinoga maualuga, e aloaia ai le tuua loa e le ali’i o Tuliese Taliu laufanua o Amerika Samoa ma aumau ai i fafo atu o le atunu’u mo le umi e 5 tausaga o lana nofovaavaaia, i le mae’a lea ona fa’amanino e ali’i loia a itu e lua i le fa’amasinoga le mae’a aloaia lea o taualumaga o mataupu tau solitulafono sa tu’uaia ai e le malo ia Taliu.

 

O le aso Sa na te’a nei e pei ona fa’ailoa e le loia a Taliu ia Doug Fiaui i le fa’amasinoga na fa’amoemoe e tuua ai e le ua molia le teritori, e tusa ai o le poloaiga o lana faanofovaavaaia ua mae’a ona tu’uina mai e le afioga i le ali’i fa’amasino sili lagolago ia Lyle L. Richmond, peita’i na taofia e sui o le Ofisa o Femalagaaiga i le malae va’alele, ona o lo o i ai se poloaiga (stop order) e fa’asa ai ona tuua e Taliu le atunu’u.

 

O le iloiloga faapitoa sa faia ananafi, na fa’atulaga ma le fa’amoemoe e fa’amanino ai e loia i le afioga i le ali’i fa’amasino ia Kruse le tulaga ua taoto i ai taualumaga o le mataupu a Taliu, talu ai o lo o fa’aauau pea tulaga gasegase o le afioga i le ali’i fa’amasino ia Richmond sa ia tauaveina lana mataupu.

 

Na faailoa e Murphy i le fa’amasinoga e faapea, o le poloaiga e taofi mai ai Taliu mai lona tuua o Amerika Samoa, o se poloaiga sa tu’uina atu i le taimi a o fa’agasolo ai mataupu tau solitulafono sa tu’uaia ai o ia, ma e lei toe aveese mai lava i totonu o faila a le Ofisa o Femalagaaiga i le malae va’alele.

 

“O le taimi nei, ua kilia le igoa o Taliu mai fa’amaumauga a le malo, ma ua talafeagai loa lona tuua o le teritori e tusa ai o tuutuuga o lana nofovaavaaia e 5 tausaga ua mae’a ona tu’uina mai e le fa’amasinoga, ua mae’a fo’i ona aveesea mai fa’amaumauga a le Ofisa o Femalagaaiga i le malae va’alele le poloaiga e taofia ai lona tuua o Amerika Samoa”, o le saunoaga lea a Murphy i le fa’amasinoga, lea fo’i na talia e le afioga a Kruse, ma ia fa’atonuina ai loa le tatala atu o Taliu i lalo o le vaavaaiga a le Ofisa o Femalagaaiga, mo le tapenaina o le toe fo’i atu o le ua molia i Samoa.

 

E talitonu le Samoa News, o le aso lana ananafi na tuua ai e Taliu le teritori, e pei ona fa’amaonia mai e se sui o le Ofisa o Femalagaaiga.

 

O mataupu tau solitulafono e lua na tu’uaia ai e le malo ia Taliu, e aofia ai le mataupu lea na ta’usala ai o ia i lona umia o fualaau fa’asaina ma pulufana sa tula’i mai i le 3 tausaga talu ai, atoa ai ma le fa’alavelave lea na tafana ai le Ofisa o Leoleo i Leone i le 2 tausaga talu ai, lea fo’i na ta’usala ai o ia i le moliaga mama o le fesoasoani e fa’atino le moliaga o le fa’aleaga meatotino i le tulaga muamua.

 

BRIAN BENJAMIN LOMA

 

O le aso 22 Tesema lea ua toe tolopo i ai le fofoga aloaiaina o le maliliega lea ua mae’a nei ona sainia e le malo ma le ali’i o Brian Benjamin Loma ma le fa’amoemoe e fa’amuta ai taualumaga o le mataupu o lo o tu’uaia ai o ia.

 

O le taeao ananafi na fa’amoemoe e fa’alauiloa aloaia ai i luma o ali’i fa’amasino lenei mataupu, ae talu ai o ni isi o vaega o lo o naunau ali’i fa’amasino e fia malamalama atili ai, na mafua ai loa ona toe tolopo lenei matuapu i le isi 2 vaiaso.

 

Na fa’amaonia mai e le loia a le malo ia Gerald Murphy i le Samoa News le mae’a lea ona saini e itu e lua o se maliliega e fa’amuta ai lenei mataupu, ma ua sauni fo’i Loma e tali ioe i le moliaga mamafa lea ua latou toe teuteu, ina ia fa’ailoa ai le moliaga o lona umia faasolitulafono lea o vaega o fualaau fa’asaina o le mariuana.

 

E pei ona taua i fa’amaumauga a le fa’amasinoga, o tu’uaiga fa’asaga ia Loma na alia’e mai i le po o le aso 15 Setema 2015, ina ua malaga mai o ia i le va’alele o le Hawaiian Air mai Colorado i Amerika Samoa, ae maua ai o ia e ta’ifau a le vaega o le K-9 o lo o ia tauaveina vaega o fualaau fa’asaina o le mariuana.

 

Na saili ana ato ma lona tino atoa e ali’i Ofisa o Tiute, ae maua ai ni isi o oloa e aofia ai se tama’i pusa ‘mouth high lollipop’, o se pusa ‘blueberry green tea’, faapea ai ma se isi puea o lo o i ai ‘peach tea package with three tea bags’ o lo o i ai vailaau oona o loo maua i le laau fa’asaina o le mariuana.

 

Na faia e Leoleo se suega e uiga i oloa na malaga mai ma Loma i Amerika Samoa, ma faamaonia ai le maua ai i totonu o oloa nei le vailaau oona o lo o maua i le mariuana.

 

O lo o tumau pea tuutuuga a le fa’amasinoga o lo o tatala ai Loma i tua i le taimi nei, e fa’atali ai le aso lea ua fa’atulaga e toe valaau ai lana mataupu i luma o le fa’amasinoga.

 

VALAAU IOPU

 

E tasi le vaiaso lea ua tu’u atu e le fa’amasinoga maualuga i le ali’i o Valaau Iopu na te fa’amaonia mai ai lana molimau lea ua i luma o le fa’amasinoga, ua fiu e ave ana tusi apalai mo ni avanoa faigaluega i le tele o kamupani ma pisinisi i le atunu’u, e le o mafai lava ona ofo mai se kamupani e fa’a faigaluega o ia.

 

O se tasi o tuutuuga o le nofovaavaaia a Iopu na tu’u atu e le fa’amasinoga maualuga, a mae’a ona ia tuliina masina e 10 i le toese i Tafuna, ona tatala lea o ia i tua e saili sana galuega e galue tumau ai, ae afai e uma ane le 90 aso e lei maua lava sana galuega, ona toe fo’i loa lea i totonu o le toese e tuli fa’amae’a isi masina e 10 o lo o totoe ai o lana fa’asalaga fa’a falepuipui e 20 masina, e mafua mai ina ua ta’usala o ia e le fa’amasinoga i le moliaga mamafa o le gaoi.

 

E pei ona taua e le Ofisa Fa’anofovaavaaia, ua silia i le 5 masina o talu ona tatala Iopu i tua e saili sana galuega ae lei maua lava.