Ua taliaina nei e le Vaega Iloilo o le Fa’amasinoga Maualuga a Amerika Samoa le talosaga na fa’aulu e le afioga i le ali’i senatoa mai Manu’a ia Nuanuaolefeagaiga S. Nua, mo se avanoa e solofua ai e le fa’amasinoga le tagi sa fa’aulu e ni isi o matai mai Ta’u, Manu’a fa’asaga ia te ia, ona o tu’uaiga fai mai e le tusa ai ma ala o le Fa’avae le auala ua mafua ai ona ia toe nofoia le isi nofoa o Manu’a i le maota maualuga a le Senate.

I se fa’aiuga e 14 itulau sa tu’uina mai e le Fa’amasinoga i le vaiaso na te’a nei, e le gata ua solofua ai le tagi sa faia fa’asaga ia Nu’a, ae ua fa’amausali atili ai le fa’aauau pea lea ona nofoia e Nua o le isi nofoa a le itumalo i totonu o le Senate.

E pei ona taua i le fa’aiuga a le fa’amasinoga, o lenei mataupu na tofu atu i le fa’amasinoga, ina ua faila e Lefiti Atiulagi Pese, Maui Aloali’i ma Tauese V.K Sunia sa latou tagi i le aso 30 Tesema 2016, fa’asaga i le mataupu e pei ona toe nofoia ai e Nua le isi nofoaga o le itumalo mo le isi 4 tausaga.

Na taua i le tagi a matai mai Ta’u, Manu’a e fa’apea, i le 4 tausaga ua tuana’i atu, sa fai ai Nua ma sui o Ta’u na te nofoia le nofoa, lea la ua mae’a lana nofoaiga e 4 tausaga, ma ua tatau ona see atu le nofoa e nofoia e Vaitautolu Liugalua, o ia lea ua tasi moemoe i ai ali’i ma faipule na te tauaveina le isi nofoa a le itumalo.

Na taua atili i le tagi e fa’apea, o le tusi fa’amaonia e pei ona taua e Nua e faamaonia ai o ia lea ua faamaonia mo le nofoia o le nofoa mo le isi 4 tausaga, e lei sainia e le Fa’alupega a Manu’a e pei ona mana’omia ai e le Fa’avae, ae na sainia e le Kovana o Manu’a.

Na finau matai nei i le latou tagi e fa’apea, o le auala lea na filifilia ai Nua na te toe fa’aauauina le nofoa a le itumalo, sa le tusa ai ma ala o le Fa’avae Toe Teuteu a Amerika Samoa, peita’i o le fonotaga lea na filifilia ai Vaitautolu Liugalua, sa o gatasi ma ta’iala o le Fa’avae.

Na iloilo toto’a e le fa’amasinoga le talosaga a le itu tagi ina ia fa’aleaoga le suafa o Nua mai lona nofoia o le nofoa a le itumalo, atoa ai ma le talosaga a Nua, i le leai lea o se malosi o le fa’amasinoga na te iloiloina ai lenei mataupu, ona o loo manino i le Fa’avae, e taoto atu lava i maota e lua a le Fono Faitulafono le malosi e iloilo ai fa’aiuga mo sui e agava’a ona nofoia nofoa a itumalo ta’itasi.

I le mae’a ai ona iloilo toto’a e le fa’amasinoga o mau faamaonia uma e uiga i lenei mataupu, e aofia ai taimi ta’itasi sa usuia ai fonotaga i Manu’a i le tausaga na te’a nei e iloilo ai se tasi e nofoia le nofoa o loo nofoia nei e Nua, atoa ai ma fa’aiuga sa autasi i ai ali’i ma faipule o Ta’u, na fa’amalieina ai le fa’amasinoga i le tulaga lea, e leai se tulaga na a’afia ai i latou o loo tagi i lenei mataupu ona o le toe filifilia o Nua na te nofoia le isi nofoa o le itumalo mo le isi 4 tausaga o loo lumana’i nei.

E talitonu fo’i le fa’amasionga, o le mataupu e pei ona iloiloina, e le o fa’atatau i se tagata palota, ona o le tofi senatoa e filifilia mai lea i auala fa’aleaganu’u e pei ona taua i le Fa’avae Toe Teuteu a Amerika Samoa.

O le isi tulaga e pei ona manino i le fa’aiuga a le fa’amasinoga, o i latou sa tagi i lenei mataupu, e le fa’apea o se isi o i latou sa tatau ona nofoia le nofoa lea ua nofoia nei e Nua, ae ua mafua ona latou tagi i le fa’amasinoga, ona e talitonu i latou e le sa’o le auala lea ua toe filifilia ai Nua na te nofoia le isi nofoa o le itumalo.

O loo manino fo’i i le Fa’avae le tulaga lea, e tatau i le Faletolu ia Fitiuta, Ta’u ma Faleasao ona latou filifilia nofoa e 2 ina ia tusa ma le fa’avae.

E le gata fo’i i lea e pei ona taua e le fa’amasinoga, e le o aofia le igoa o Vaitautolu i le lisi o i latou sa fa’auluina le tagi, ae o loo taua Vaitautolu o se tasi e i ai lona silafia i lenei mataupu, ma ua faigata ai ona silasila toto’a le fa’amasinoga i le tulaga tonu o Vaitautolu i lenei tagi.

Ona o ia mafua’aga uma, na talia ai loa e le fa’amasinoga le talosaga a Nua ina ia solofua le tagi sa faila fa’asaga ia te ia.

O le afioga i le ali’i fa’amasino ia Elvis P. Patea sa iloiloina lenei mataupu, fa’atasi ai ma le lagolagosua a afioga i ali’i fa’amasino lagolago ia Satele Lili’o Ali’itai ma Muasau T. Tofili.

O le ali’i loia ia Marcellus T. Uiagalelei sa tula’i mo matai Ta’u sa fa’auluina le tagi i le fa’amasinoga, ae o le tama’ita’i loia ia Gwen Tauiliili-Langkilde sa tula’i mo Nua.