Talitonu TMO e le o galulue Ofisa Lafoga saili pisinisi le fa’amaoni


Sui peresitene o le Tautua Mo Oe (TMO), Francine Gaisoa-Liulevaega, molimau i luma o le Senate i le aso Lua. [ata: FS]
ausage@samoanews.com

A o fa’aauau ai pea iloiloga a le Fono Faitulafono mo le iloiloina o pili tupe a le faigamalo, e ala i lafoga ua fuafua e fa’aee i oloa ma pisinisi, ua fa’aalia manino ai e le sui peresitene a le pisinisi o le Tautua Mo Oe (TMO), Francine Gaisoa-Liulevaega, e i ai lona talitonuga e le o galulue fa’amaoni le Ofisa o Lafoga e saili pisinisi e le o fa’amaoni i le tuuina mai o fa’amaumauga e fa’atatau i a latou tupe maua, ina ia fuafua i ai lafoga e totogi i le malo.

 

I le tele ai o pisinisi tetele i le atunu’u ua mae’a ona tauaao atu i le Fono Faitulafono a latou tusitusiga, e tusa ai o lo latou tulaga i lafoga eseese ua fuafua le malo e fa’ae’e, o le vaiaso nei na tauaao ai fo’i e le Senate se tusitusiga mai ia Gaisoa-Liulevaega.

 

Na faafetaia e Gaisoa-Liulevaega le galuega fita sa gafa ma le Komiti Saili Tupe a le malo, i le tau sailiina lea o auala e fa’atupu ai le tamaoaiga o le atunu’u. Ae i lona talitonuga, e i ai itu e lelei ai lafoga fou ua fuafua le malo e fa’ae’e, e i ai fo’i itu e le lelei ai.

 

E le o mafai e le malo ona faamaonia mai, e atoatoa ona latou aoina uma mai tupe e tatau ona maua i le lafoga o oloa e 7%, pe afai ae pasia le tulafono ma aloaia loa. Afai fo’i e fa’aaoga masini, e le mafai ona mautinoa le fa’amaoni o tagata i le fa’aaogaina o masini. E mautinoa fo’i le taofi e ni isi o pisinisi o isi tupe ae fa’ailoa atu i le Ofisa o Lafoga na o se vaega tupe itiiti, ae o le tele o le tupe e lafo i atunu’u i fafo.

 

E le lagolagoina e le TMO fuafuaga a le malo, i le fa’a faigaluegaina lea o ni isi tagata faigaluega fou, atoa ia ma le fa’atau mai o masini mo fa’amaumauga pe a pasia le tulafono o le lafoga o oloa.

 

E tau feololo atu le lafoga o oloa ma uta mai fafo e 5%, o lo o fa’aaoga le aofa’i o le tau o oloa o lo o i luga o le lisiti, nai lo le lafoga o oloa e 7%, e le mautinoa pe mafai e le malo ona ao uma lea lafoga pe leai.

 

E manatu le TMO, ana sii laititi i luga le lafoga o uta ma oloa mai fafo i le 7% poo le 8% fo’i, e sili atu lena nai lo le lafoga o oloa e 7% ae le mautinoa.

 

Ae afai e finagalo lava le Fono e pasia le lafoga o oloa, ua talosagaina e le TMO le tatau lea ona tu’u i lalo i le 2% poo le 3% fo’i e amata atu ai, sei vaai pe moni e maua ai ni tupe fa’aopoopo mo le malo. Afai e sa’o lea tulaga, ona toe fai lea i ai o se suiga i ni nai tausaga mulimuli ane ai.

 

I le pili e sii ai le tau o tautua i luga o le uafu, e talitonu le TMO, afai ae pasia lea tulafono, o le a atili ai ona pagatia tagata fa’atau. Soo se tupe lava e sii e le malo i luga o oloa, e fa’asoa atu e le aufai pisinisi le totogiina o lena tupe i luga o le tagata fa’atau.

 

E lagolagoina e le TMO le suiga i le lafoga o le ava malosi, ina ia taofia ai le toe faia o lisiti pepelo o loo masalomia le faia e ni isi o le aufai pisinisi i le atunu’u. I le tulaga o le lafoga e 1% mo pisinisi, e le lagolagoina fo’i e le TMO.

 

I le tele o tausaga ua mavae a o tulaga fa’aletonu le tamaoaiga o le malo, ua toeititi atoa le $1 miliona o le tupe ua totogi e le TMO mo ana lafoga i le malo. Tusa lava poo le a le silia i le 100 faleoloa eseese ua i ai, atoa ai ma le mau faleoloa o oloa sii atoa e pepelo le auala o lo o fa’agaioi ai, o lo o fa’amaoni lava le TMO i le totogiina o lana lafoga.

 

Ae o le itu e fa’anoanoa ai, tusa lava pe faamaoni le TMO i le totogiina o lana lafoga, ua fa’a 2 ona su’e e le Ofisa o Lafoga tusi a le TMO.

 

“Talosaga atu i le Ofisa o Lafoga, e tatau ona outou sailiili i pisinisi o lo o masalomia le faia o faamaumauga sese. Fai mai ua silia i le 6 tausaga o faagaioi le pisinisi e aunoa ma se tupe mama, ae o lo o fa’aaua pea ona tatala isi lala ma isi lala fou a lea pisinisi,” o le saunoaga lea a Gaisoa-Liulevaega.

 

Tele tupe o lo o fa’aalu e pisinisi nei i fafo atu o le atunu’u, e pei o tupe o lo o totogi ai malaga, tupe o loo lafo i fafo, ae le o i ai lava se vaega o nei tupe o ripoti atu i le Ofisa o Lafoga.

 

“O le galuega tonu lena a le Ofisa o Lafoga e tatau ona fai, saili pisinisi e le o fa’amaoni, nai lo le toe faaopoopo mai fo’i o le isi avega mamafa i le aufai pisinisi ma le atunu’u,” o le faaiuga lea o le tusi a le TMO ua i luma o le fono.

Comment Here