Talitonuina e Fa’amausili agava’a o Inisinia Vaega Tosova’a malo


Le afioga i le Senatoa ia Fa’amausili Mau Jr. [ata AF]
ausage@samoanews.com

O se tasi o mataupu na fesiligia i le Iloiloga a le Komiti Soofa’atasi a le Fono Faitulafono i le taeao ananafi, a o fa’agasolo ai iloiloina o le Tupe Fa’asoasoa a le malo mo le tausaga tupe fou 2018, o galuega mo le lipeaina o va’a a le malo o lo o i lalo o le vaavaaiga a le Ofisa o Pulega o Uafu ma Malaeva’alele.

 

E pei ona taua i le paketi a le Ofisa o Pulega o Uafu ma Malaevaalele, e $150,000 le tupe o lo o fa’aagaga e lipea ai va’a e 7 a le malo.

 

Na fesili le afioga i le ali’i Senatoa ia Fa’amausili Mau Jr i le Fa’atonusili, afioga Taimalelagi Dr. Claire Poumele, pe fa’atinoina uma e le Ofisa a le Vaega Tosova’a galuega lipea i va’a a le malo, ae na saunoa le Fa’atonusili, e fuafua lava pe afai o lo o i ai ni inisinia ua i ai le agava’a fa’apitoa i galuega uela.

 

Na saunoa Fa’amausili e fa’apea, e i ai lona talitonuga soo se galuega lipea lava a le malo i tulaga o va’a, e tatau ona fa’atinoina uma e le Vaega Tosova’a, o lo o i ai le aufaigaluega ua mae’a ona a’oa’oina fa’apitoa, ua lava fo’i lo latou tomai ma le agava’a e fa’atino ai soo se galuega lipea, e aofia ai ma galuega uela.

 

Na toe fesili le ali’i Senatoa pe lava le tupe lea ua fa’atulaga e fa’atupe ai galuega lipea, ae na tali le tama’ita’i Fa’atonusili, e le taitai lava le tupe.

 

O va’a e 7 e aofia ai va’a tosova’a o le Sa’ilele, Tatoso ma le Tautua, atoa ai ma va’a tuai e pei o le MV Sili ma le Uila o le Sami, ma va’a fou e lua o le Segaula ma le Manu’atele.

 

Na fesiligia e le afioga i le ali’i Senatoa ia Paepae Iosefo Faiai tulaga o Ta’avale Fuimu mo Manu’a, e fesoasoani i le taimi e tula’i mai ai se fa’alavelave i Manu’a.

 

Saunoa Paepae e fa’apea, o lona popolega o lo o i ai, ina ne’i tula’i mai se fa’alavelave i le malaeva’alele i Ofu poo Fitiuta fo’i, e aofia ai ma se va’alele pe a afaina, ae o lo o i ai se ta’avale e tua i ai le matagaluega.

 

Sa ia fautuaina le tama’ita’i Fa’atonusili ina ia silasila toto’a i le fautuaga ua tu’uina atu. Ae na saunoa Taimalelagi e fa’apea, o lo o taumafai pea i se auala e fa’atau ai se Ta’avale Fuimu mo le malae va’alele i Ofu.

 

I tulaga o femalagaaiga mo Manu’a, o le isi lea mataupu na fesiligia ai e Faipule mai Manu’a le Fa’atonusili.

 

Na talosagaina e le afioga a Toeaina Faufano Autele le tatau lea ona toe silasila le matagaluega i totogi o uta mo tagata o le itumalo, ona ua maualuga tele le tulaga o lo i ai. E o o fo’i i le taimi o malaga i Manu’a, sa ia talosagaina le tatau lea ona i ai ni taumafa ma ni vaiinu e fa’atau e le Ofisa i totonu o le va’a, ina ia mafai ona fa’atau e tagata o le itumalo o lo o malaga i le po.

 

Saunoa Toeaina e fa’apea, e le puupuu le 8 itula o lo o malaga ai le va’a mai Tutuila mo Manu’a, e tatau fo’i la ona silasila toto’a i ai le matagaluega i lea tulaga.

 

Saunoa Taimalelagi e fa’apea, o lo o vaavaai pea i se auala e fa’aleleia ai tulaga e pei ona fautuaina e le itumalo, ae o le fa’afitauli numera tasi lava o lo o i ai, o le tau fa’asoasoa lea o tupe a le malo e fa’atino ai manaoga e pei ona taua.

 

I le va o le masina o Oketopa o le 2016 e oo mai i le masina lenei o Setema 2017, e na o le $153,000 le tupe na mafai ona maua mai i malaga i Manu’a, i pasese ma totogi o uta. E le taitai lava lenei vaega tupe e fesoasoani ai i le fa’atupeina o manaoga mo le itumalo.

 

Na fesili Savali Talavou Ale poo aofia ai ma tupe o loo maua mai i pasese ma uta mo Manu’a, i totonu o fuafuaga a le malo i tupe e fa’atino ai ana auaunaga, ae na tali le Fa’atonusili, o lea lava.

 

I tulaga o tupe fa’aopoopo i totogi o tagata faigaluega (increment), na fesiligia ai e le afioga a le ali’i faipule ia Vailoata E. Amituana’i le Faatonusili, poo i ai se fuafuaga e tuuina atu ai lea vaega tupe e faaopoopo i totogi o tagata faigaluega. Saunoa Taimalelagi e fa’apea, na te lagolagoina le tatau lea ona fa’atinoina loa lea tulaga, ae fuafua lava i le fa’aiuga a le ali’i kovana.

 

Na fa’atula’i e Vailoata se lu’i mo le tamaitai fa’atonusili, i le tatau lea ona fausia se ‘airport tower’ e fa’atonutonu ai malaga a va’alele. I lona talitonuga, ua tele tausaga o tula’i mai pea le fa’afitauli, o le pulea ma fa’atonutonu mai Samoa femalagaaiga a va’alele, e mafua mai i le leai o sa tatou ‘airport tower’.

 

I le fa’aiuga o le iloiloga, na fautuaina ai e Savali le Fa’atonusili ina ia silasila i tulaga o femalagaaiga mo Manu’a. I lona talitonuga, e le tatau ona maualuga tupe e totogi e Manu’a mo le fa’aaogaina o le va’a a le malo, aua o Tutuila ma Manu’a e tasi.

 

Afai e malaga mai le tagata o loo nofo i soo se nuu o Tutuila e fai lana fa’atau i Fagatogo, e le tele se tupe e alu i le pasese, ae a malaga mai le tagata o loo nofo i Manu’a e fai lana fa’atau i Fagatogo, e le gata i le taugata, ae tele fo’i feuiaiga.

Comment Here