Ads by Google Ads by Google

Talosaga aufai fa’atoaga e taofi le taro o loo aumai i Samoa


Le afioga ia LeAtualevao S. Asifoa (itu agavale) o se tasi o sui o le aufai fa’atoaga ma ni isi o le aufai fa’atoaga a le atunu’u sa auai i le fonotaga sa faia ma le Ofisa o Fa’atoaga i le vaiaso nei. [ata AF]
ausage@samoanews.com

Ua talosagaina e le aufai fa’atoaga a le atunu’u le Ofisa o Fa’atoaga a le malo, mo se avanoa e taofia ai le toe aumaia o taro mai Samoa mo se taimi le tumau, ina ia maua ai le avanoa e fa’atau ai taro a le aufai fa’atoaga i faleoloa eseese i totonu o le atunu’u.

 

O le fonotaga i le va o le aufai fa’atoaga ma le Fa’atonusili o le Matagaluega o Fa’atoaga a le malo ma lona Ofisa, o le taumafai lea e saili auala e foia ai fa’afitauli o lo o alia’e mai i le lotoifale a le aufai fa’atoaga, atoa ai ma le tau fa’amaninoina o ni isi o tulaga o lo o atugalu i ai le aufai fa’atoaga, i auala o lo o fa’atautaia ai le polokalame o le School Lunch a le malo i le taimi nei.

 

O le Fa’atonusili o le Ofisa o Fa’atoaga ia Filifa’atali Michael Fuiava na taitaia le fonotaga, fa’atasi ai ma le lagolagosua a le sui faatonusili ia Peter Gurr ma ni isi o sui o le Ofisa.

 

Na taua e se tasi o sui o le aufai fa’atoaga, le afioga ia LeAtualevao Sosene Asifoa le tele o le meamata e pei o le taro ma le fa’i ua fau ma soloi a le aufai fa’atoaga, ua le maua se avanoa e fa’atau atu ai i le School Lunch, ua le maua fo’i se avanoa e fa’atau atu ai i le tele o faleoloa i le atunu’u, ona ua ave uma e le aufaipisinisi taro mai Samoa avanoa sa tatau ona maua e le aufai fa’atoaga a le atunu’u.

 

“E talosaga atu ma le agaga fa’aaloalo, pe mafai lava ona taofi le toe aumai o taro mai Samoa mo sina taimi le tumau pe na o le 2 vaiaso, ae se’i maua ai le avanoa e fa’atau atu ai taro a le aufai fa’atoaga a le atunu’u, ua le iloa poo fea o le a ave e fa’atau ai”, o le talosaga lea a LeAtualevao sa tu’uina atu i le afioga a Filifa’atali.

 

Ae na taua e le isi sui o le aufai fa’atoaga lona popolega o lo o i ai, ina ne’i avea le fa’aauau pea lea o le la’u mai o taro mai Samoa ma fa’atau i totonu o le atunu’u, ma auala e fa’alotovaivaia ai lagona o le aufai fa’atoaga, ma mumusu ai loa e toe toto fa’atoaga e tua i ai le atunu’u.

 

Na fa’afetaia e Filifa’atali sui o le aufai fa’atoaga i le talosaga e pei ona tu’uina atu, peita’i o popolega e faigata ai ona talia gofie e le Ofisa o Fa’atoaga le talosaga, ina ne’i le lava le taro e sapalai mai e le aufai fa’atoaga a le atunu’u mo faleoloa, ona avea lea ma lape ma tula’i mai ai ni isi fa’aletonu i le lumana’i.

 

Ae ina ua fesiligia e le Samoa News le susuga Gurr pe i ai se avanoa e talia ai e le Ofisa o Fa’atoaga le talosaga ina ia taofia le auina mai o le taro mai Samoa, na taua ai e le sui fa’atonu le tele o mafua’aga e le mafai ai ona talia le talosaga a le aufai fa’atoaga a le atunu’u ina ia taofi le aumaia o le taro mai Samoa mo sina taimi le tumau.

 

O se tasi o mafua’aga e le mafai ai ona tupu lea tulaga e pei ona saunoa Gurr, e maualuga tele le tau o loo manana’o le aufai fa’atoaga a le atunu’u e fa’atau atu ai a latou taro i faleoloa, nai lo le tau o loo fa’atau atu ai e le aufai fa’atoaga mai Samoa a latou taro.

 

“O lea e fa’aaoga e le aufai fa’atoaga a le atunu’u le tau o loo fa’atau atu ai a latou taro i le School Lunch e fa’atau atu ai i faleoloa, ma o le mafua’aga lena o le faigata ona talia e faleoloa o a latou taro, ae talia na o taro mai Samoa, ae afai e mafai ona latou faia le suiga i tau e pei ona fa’aaoga e le aufai fa’atoaga mai Samoa, ona tau fa’a faigofie lea ona talia e faleoloa a latou taro”, o le saunoaga lea a Gurr.