Ads by Google Ads by Google

Taoto atu mataupu Ekalesia EFKAS i se fa’aiuga a le Fa’amasinoga


Susuga i alii faifeau ia Rev. Samuelu Tuilaepa ma Rev. Elder Leatulagi Fa’alevao. [ata AF]
ausage@samoanews.com

Ua taoto atu nei le mataupu a le Ekalesia Faapotopotoga Kerisiano i Amerika Samoa (EFKAS) i se fa’aiuga a le Fa’amasinoga Maualuga, i le mae’a ai lea ona fa’afofoga o ali’i Fa’amasino i mau fa’amaonia mai itu e 2, i le iloiloga sa fa’agasolo i le vaiaso na te’a nei mo le umi e 2 aso.

 

O le aso mulimuli o le iloiloina e le fa’amasinoga maualuga o lenei mataupu, na tu’uina atu ai e loia a itu e lua a laua fa’afinauga fa’ai’u i mau e lagolago ai la latou mau ua taoto i luma o le fa’amasinoga.

 

E pei ona silafia e le atunu’u, o le mataupu a le Ekalesia EFKAS na tofu atu i luma o le fa’amasinoga maualuga, ina ua fa’aulu e le Ekalesia sa latou tagi fa’asaga i se tasi fo’i o totino o le Ekalesia, o ia fo’i lea o le Failautusi Aoao, susuga Rev. Dr. Amaama Tofaeono ma lona faletua ia Rev. Dr. Joan Aleluia Tofaeono, i lo la le usitaia lea o le fa’atonuga la te tuua ai le maota o le Ekalesia o loo nofoia e le latou aiga e o o mai i le taimi nei.

 

O le agaga o le tagi a le Ekalesia e pei ona fa’aleo e le tama’ita’i loia ia Gwen Tauiliili-Langkilde, ia tu’uina mai loa se poloaiga a le fa’amasinoga maualuga e aloaia ai le fa’aiuga a le Au Toeaiina, ma poloaina ai loa Rev. Dr. Tofaeono ma lona aiga ina ia tula’i ese loa ma le maota o le Ekalesia.

 

O le fa’aiuga e pei ona fulisia i ai le Au Toeaiina, na fa’avae mai lea i le latou talitonuga ina ua mae’a ona latou iloiloina a latou mau fa’amaonia, ua le ausia e le ali’i faifeau ma lona faletua tapula’a fa’akerisiano e tatau ona soifua ai i latou ua taua o faifeau fa’au’u, ma latou fa’amalolo ai loa le tofi faifeau fa’au’u o Rev. Dr. Tofaeono mo le 3 tausaga, ae fa’amalolo le tofi faifeau fa’au’u a lona faletua mo le tasi le tausaga.

 

O se tasi o agava’a e tatau ona umia e se tasi e avea ma Failautusi Aoao e pei ona atagia mai i le Fa’avae a le Ekalesia, ia avea o ia o se faifeau fa’au’u, ae talu ai ua fa’amalolo le tofi faifeau fa’au’u o Rev. Dr. Tofaeono, na manatu ai loa le Au Toeaiina ua le toe agava’a ona ia tauaveina le tofiga o le Failautusi Aoao, ma ua le tatau fo’i ona ia toe nofoia le maota o le Ekalesia.

 

Ae i le tali fuaitau a Rev. Dr. Tofaeono ma lona faletua e pei ona fa’aleo e le la loia ia Tasi Tuiteleleapaga i luma o le fa’amasinoga, sa manino ai i le la fa’afinauga le le amiotonu o le fa’aiuga ua faia e le Au Toeaiina e fa’amalolo ai o la tofi faifeau fa’au’u, ona e le o i ai ni mafua’aga po o ni mau fa’amaonia e lagolagoina ai le fa’aiuga a le Au Toeaiina.

 

Na taua atili fo’i e le itu tete’e i le latou fa’afinauga e fa’apea, e le o tusa ma le Fa’avae a le Ekalesia fa’aiuga ua faia e le Au Toeaiina, i lo latou fa’amalolo o le tofi faifeau fa’au’u e aunoa ma ni fa’amaoniga maumau tutu e lagolago ai la latou fa’aiuga, ae i le tofi o le Failautusi Aoao, e le tusa fo’i ma le Fa’avae o le Ekalesia le faia e le Au Toeaiina o se fa’aiuga e fa’amalolo ai se mai lona tauaveina o lea tofiga maualuga o le Ekalesia, se’i vagana le Ekalesia Aoao poo le Fonotele lea e ta’ilua tausaga ma usuia.

 

Na taua e le loia a le Ekalesia ia Tauiliili-Langkilde i lana fa’afinauga mulimuli e fa’apea, talu ai ua le toe umia e le ali’i faifeau le tofi o le faifeau fa’au’u, ua le toe agava’a ai fo’i ona toe avea o ia ma Failautusi Aoao, ae talu ai ua le toe avea o ia ma Failautusi Aoao, ua le toe agava’a ai fo’i ona latou nofoia le maota o le Ekalesia, ma ua tatau loa ona toe fa’afo’i atu le fale o le Ekalesia.

 

“Faamata ea na tusa ai ma le Fa’avae o le Ekalesia le fa’aiuga ina ia fa’amalolo lona tofi faifeau fa’au’u”, o le fesili lea a Tauiliili-Langkilde, “A lea ua mae’a ona folasia mau fa’amaonia a le Ekalesia e lagolago ai le fa’aiuga a le Au Toeaina, ma ua atagia mai ai, o lo o tusa ma le Fa’avae o le Ekalesia le fa’aiuga ua faia”.

 

Ae na taua e le loia a le itu tete’e ia Tasi Tuiteleleapaga e fa’apea, e le o tusa ma le Fa’avae o le Ekalesia le fa’aiuga e fa’amalolo ai le tofi faifeau fa’au’u o Rev. Tofaeono ma lona faletua. Na taua e Tuiteleleapaga e fa’apea, e le mafai e le Ekalesia ona aveese le tofi faifeau fa’au’u o se faifeau, ona o le tofiga lea na maua mai i aoaoga sa aoga ai o ia ma fa’au’u mai ai, ae ina ua fesiligia e le afioga i le ali’i Fa’amasino ia Elvis P. Patea le ali’i loia, poo lana fa’afinauga e le mafai e le Ekalesia ona aveese le tofi o le faifeau fa’au’u o se faifeau, ae na toe fa’amanino atili e le ali’i loia lana fa’afinauga e fa’apea, e le mafai e le Au Toeaiina ona aveese le tofi faifeau fa’au’u a Rev. Tofaeono, se’i vagana ai lava le Fonotele.

 

E talitonu le itu tete’e, o le mafua’aga autu o lenei mataupu, na mafua mai i le taimi na mana’omia ai e le faletua ia Aleluia se fesoasoani fa’a fautuaga mai le ali’i faifeau ia Rev. Faaeteete Saifoloi i ni tulaga fo’i na alia’e mai i lo la aiga ma le faifeau, lea sa ia fa’asoa ai i le ali’i faifeau fa’amatalaga uma e pei ona tula’i mai i le la aiga, ma ua mana’omia ai se fesoasoani, ae ua avea ma auala ua fa’aaoga ai e le Au Toeaiina fa’amatalaga sa tu’uina atu e fa’avae ai la latou fa’aiuga.

 

E talitonu le itu tete’e, o fa’amatalaga sa tu’uina atu i le ali’i faifeau ia Rev. Saifoloi, o fa’amatalaga sa tatau ona malu puipuia ia te ia, a o lea ua ia fa’alauiloa ma avea ai o se auala e autu i ai le fa’aiuga a le Au Toeaiina, peita’i na finau le loia a le Ekalesia e fa’apea, e leai lava se isi na ia fa’alauiloa fa’alaua’itele tulaga uma e uiga i lenei mataupu, sei vagana ai lava Aleluia lea na alu i le Ofisa o le fafine sa tu’uaia ai le igoa o lona to’alua, ma i’u ina tula’i mai ai se vevesi i lo la va, ma i’u atu ai i le Ofisa o Leoleo lenei mataupu.

 

I tulaga o avanoa sa tatau ona tu’uina atu, na finau ai le itu tete’e i le tulaga lea, e le i fa’atasi lava ona tu’uina atu e le Au Toeaiina se avanoa la te o o atu ai i luma o le latou fonotaga e fa’amanino tulaga o le mataupu e pei ona tu’uaia ai i laua, e o o fo’i i tusi sa la tusia ma tu’uina atu, sa le amanaia ma toe fa’afo’i atu, ae na finau le loia a le Ekalesia e fa’apea, sa i ai le avanoa na tu’uina atu e le Au Toeaiina i le ali’i faifeau ma lona faletua e fa’aleo ai o laua lagona e uiga i lenei mataupu, ma e ui sa fa’afofoga le Au Toeaiina i a laua fa’amatalaga, sa le avea lea ma itu e toe suia ai le fa’aiuga ua mae’a ona tu’uina mai.

 

I le fa’aiuga o le fa’afinauga a le Ekalesia, sa talosagaina ai loa e le latou loia le fa’amasinoga ina ia silasila toto’a i mau fa’amaonia ua mae’a ona tu’uina atu, e fa’avae ai se fa’aiuga e poloaina ai le ali’i faifeau ma lona aiga e tula’i ese ma le maota o le Ekalesia, peita’i i le fa’aiuga o le fa’afinauga a le itu tete’e, na taua ai e le ali’i loia ia Tuiteleleapaga le fa’amasinoga ina ia tu’uina mai sana fa’aiuga e fa’aleaoga ai le fa’aiuga a le Ekalesia, a ia tumau pea le nofoia e le ali’i faifeau ma lona aiga le maota o le Ekalesia.