O le itula e 10:00 i le taeao nei ua fa’amoemoe e amata aloaia ai le sauniga lotu e tatala aloaia ai galuega amata a le Fono Faitulafono a Amerika Samoa, mo le amataina ai o lana ulua’i tauaofiaga mo le nofoaiga lona 35 lea ua nofoia nei.

E pei ona masani ai galuega fa’atino a le Fono Faitulafono i le taimi e tatala aloaia ai lana ulua’i tauaofiaga, o le a maua ai le avanoa o le ta’ita’i o le malo na te fa’aleoina ai ni isi o atina’e ua mafai ona ausia e le faigamalo mo tausaga ua mavae, aemaise ai o le fa’alauiloaina lea o ni isi o fuafuaga fa’ataoto a le malo mo le isi 4 tausaga o loo lumana’i nei.

Na taua e Failautusi a maota e lua i le vaiaso na te’a nei, le leai o ni galuega fou ua tauaao atu e le Ofisa o le ali’i kovana.

Na taua e le afioga i le ali’i kovana ia Lolo Matalasi Moliga i lana saunoaga autu, i le aso na fa’atautoina ai i laua ma le afioga i le lutena kovana ia Lemanu Palepoi Mauga e avea ma ta’ita’i o le malo mo le isi 4 tausaga e fa’apea, ua i ai le fa’amoemoe o le faigamalo mo le tu’uina atu lea o ni isi o tulafono fou i luma o le Fono Faitulafono, e fesoasoani ai i le fa’atumauina lea o le soifua lelei o tagata lautele, aemaise ai o le vaavaai lea i auala e fa’amalosia ai le tamaoaiga o le malo i le lumana’i.

E ui e lei fa’ailoaina e le ali’i kovana tulafono ua manatu le faigamalo e tu’uina atu i le Fono, peita’i sa ia taua e fa’apea, o tulafono ua fuafua le faigamalo e tu’u atu i le Fono Faitulafono mo sa latou fa’aiuga, o tulafono e taua ma aoga mo le manuia o le atunu’u.

O le aso Lua fo’i o le vaiaso na te’a nei na fa’atauto aloaia ai afioga i Senatoa ma Faipule o maota e lua, mo le amataina ai o a latou galuega masani i lenei tausaga.

Saunoa le afioga i le ali’i peresetene o le Senate, afioga i le Tama’ita’i o le Ao ia Gaoteote Palaie Tofau i le aso na mae’a ai le fa’atautoina o Senatoa e fa’apea, o le galuega o le a sauni le maota maualuga e fa’atinoina mo le isi 4 tausaga, e le gata e le o se galuega e faigofie, ae o le a tele fo’i lu’itau e feta’iai ma le maota.

“E ui i ia lu’itau, e fa’amoemoe le manuia o galuega a le Fono i le tofa fa’atupu o loo ia outou afioga i Tama matutua o le atunu’u, aua o la outou lafo e taua ma manuia ai le atunu’u”, o le saunoaga lea a Gaoteote.

Ae na saunoa le Fofoga Fetalai o le maota o sui ia Savali ina ua mae’a ona toe filifilia o ia e avea ma ta’ita’i o le maota e fa’apea, e leai se isi auala e sili atu ona manuia ai galuega a le Fono Faitulafono, nai lo le galulue fa’atasi o afioga i Faipule filifilia, mo le sailia lea o se manuia o le atunu’u.

Sa ia taua atili fo’i lona sauni e galulue fa’atasi ma le maota atoa, ina ia mafai ai ona saili gofie le tali o fa’afitauli ma lu’itau o loo tula’i mai i le atunu’u i aso t’aitasi.