Tatala le Summer Program a le malo i le fa’aiuga o le masina


Fanau aoga i le taimi o fa’agaioiga i le Summer Program a le malo sa fa’ataunu’uina i le tausaga na te’a nei i le maota o Tupulaga Talavou i Pago Pago. [ata AF]

Ni isi o fanau aoga sa auai i le polokalame o le Summer Program a le malo i le tausaga na te’a nei. [ata AF]
ausage@samoanews.com

O le fa’aiuga o le masina lenei o Iuni ua fa’atulaga e tatala aloaia ai le polokalame a le malo mo fanau aoga (summer program), lea e maua ai e fanau aoga le avanoa e galulue ai i totonu o ofisa ma matagaluega eseese a le malo mo le taimi o tu’uaga o aoga.

 

O le fonotaga a le afioga i le ali’i kovana ia Lolo Matalasi Moliga ma lana Kapeneta i le vaiaso na te’a nei, na fa’alauiloa aloaia ai loa e le ali’i kovana le fuafuaga a le malo ua i ai, mo le tatalaina lea o lenei polokalame mo fanau aoga i le aso 26 Iuni 2017.

 

E le gata ua sauni le malo mo le tatalaina o lenei polokalame, ae sa fautuaina fo’i e le ali’i kovana ia Fa’atonusili o le Matagaluega o Tagata Faigaluega a le malo (DHR), faapea ai ma le Matagaluega o Fefa’atauaiga ma Alamanuia (DOC) mo le sailia lea o ni vaega tupe e fa’atupe ai le polokalame mo fanau aoga.

 

“E talosaga atu fo’i i a outou afioga i Fa’atonusili ma Fa’auluuluga o Matagaluega ma Ofisa uma a le malo, ina ia amata saili ni avanoa faigaluega e avatu ai fanau e galulue i totonu o a outou matagaluega, ina ia maua ai e i latou le avanoa e fa’ata’ita’i ai i galuega a le malo, ina ia i’u mai i aoga ae ua maua lo latou tomai masani e fa’atino ai galuega i totonu o Ofisa”, o le saunoaga lea a le ali’i kovana.

 

“E le o se tulaga lelei le avatu o fanau aoga e galulue i le taimi o le polokalame lenei, ae ave e outou ua fa’a tunu kofe pe fetulia’i solo e fai feau a tagata faigaluega, e leai, e le o le mafua’aga lena na avatu ai fanau aoga e galulue, na mafua ona avatu ina ia maua le poto ma le tomai masani i le fa’atinoina o galuega a le malo ma fa’amasani i ai”.

 

“O le fautuaga masani lava i a outou afioga i Fa’atonusili ma Ta’ita’i o matagaluega ma ofisa a le malo, ia a’oa’o fanau e fa’atino soo se galuega i totonu o ofisa ma matagaluega a le malo, o le aoga lena o le polokalame lenei, aemaise lava i galuega ia e seasea fiafia latou e galulue ai e pei o le Falema’i”.

 

“Taumafai e fa’amasani i latou e galulue fa’atasi ma foma’i ma tausima’i, ina ia lagona ai le fiafia e fa’atino galuega ma tupu ai le loto naunau e galulue i galuega eseese ia, una’i i latou e fa’amasani i ituaiga galuega na, e aoga fo’i le feoa’i solo o tamaiti aoga ma foma’i e fa’atosina ai o latou mafaufau ma naunau ai loa e galulue i ituaiga galuega na i le lumana’i”.

 

Na taua e le ali’i kovana le taua tele o le polokalame o le summer program a le malo, e le gata e alu aoga ai tupe a le malo i fanau aoga, ae o se avanoa lelei fo’i lea e maua ai e fanau aoga le avanoa e malolo mai ai i aoga ae aoao auala e fa’atino ai galuega mo le lumana’i.

 

Na fa’amaonia mai e le Ofisa o Tupulaga, Tina & Tama’ita’i, o le latou ofisa lea ua fa’atulaga e fa’ataunu’uina ai le sauniga mo le tatala aloaiaina o le polokalame mo fanau aoga i le fa’aiuga o le masina nei.

Comment Here