Toeitiiti lava o aso uma i taimi o iloiloga a Komiti atoa ai ma tauaofiaga a le maota o sui, e tau fa’amanatu ma tau a’oa’o ai ni isi o afioga i Faipule ina ia fa’aaloalo ma iloa usitaia tulafono ua mae’a ona pasia e fa’atautaia ai galuega a le maota o sui i le Fono Faitulafono a le atunu’u.

Mo se fa’ata’ita’iga o le tulafono e fa’asa ai ona toe fa’aaoga telefoni i taimi o iloiloga poo tauaofiaga a le maota, ae o loo molimauina pea lava ni isi o afioga i Faipule latou te le o usitaia lea tulafono.

E oo fo’i i le tulafono e fa’asa ai ona feoa’i afioga i Faipule e solitu le maota pe afai o loo tauaofia le Fono, pe talanoa i le isi faipule o loo sosoo nofoa ao tulei saunoa le isi sui mamalu, poo le tula’i foi ma aga’i atu i fafo ae o loo tauaofia le maota, o loo maitauina pea le to’atele o ni isi o Faipule latou te le o usitaia ma aloaia nei tulafono, ma ua avea ai o se fa’ata’ita’iga le lelei i ni isi e autova’a atu e maimoa ma fa’alogologo i taimi o tauaofiaga a le maota.

E umi se taimi na fa’aalu e le Sui Fofoga Fetalai o le maota ia Fetu Fetui Jr e tau toe fa’ailoa ma fa’amanatu ai i le taeao ananafi tulafono a le maota e tatau ona aloaia i taimi o ana tauaofiaga ma iloiloga.

I le taimi o le tauaofiaga a le maota o sui i le aso Lua na te’a nei, na si’isi’i ai le si’ufofoga o le sui fofoga fetalai ao ia saunoa e fa’aleo lona finagalo fa’anoanoa, i le talanoa o ni isi o faipule ao usuia le Fono, ma ua atagia mai ai i lona taofi le eseese o uiga fa’aalia o ni isi o sui mamalu i le taimi e ta’ita’i le fofoga fetalai, ma le taimi e avea ai o ia ma ta’ita’i.

“E pei lava e le o se fono la tatou mea lea e fai, ou talosaga atu i le maota, ia tutusa le taimi e taitai ai e le fofoga fetalai le maota ma lo’u taimi, ia taumafai e fa’amamalu mai le Fono, e le o se fono a tamaiti lea e fai, taofi le mumu mumu ma le talanoa o a outou afioga o lea e tulei saunoa isi sui mamalu o le maota”, o le saunoaga lea a Fetu Jr i le taimi o folafolaga a le maota i le aso Lua na te’a nei, ina ia ia maitauina le talanoa ma magamaganu o le to’atele o faipule ao usuia le fono.

Ae i le taimi o le tauaofiaga a le maota i le aso ananafi, sa toe tula’i mai ai fo’i ia fa’aletonu, o le tauaofia o le fono ae feoa’i ni isi o faipule ma aga’i atu i fafo o le maota, ae o isi o loo talatalanoa ma magamaganu.

E fetaui lava le talanoaina o le mataupu lea e fa’atatau i le fa’asa ona toe tatala o le faitoto’a o le maota pe a oo i taimi o le tauaofiaga, ae fa’afuase’i loa ona tatala mai e se ali’i faigaluega a le maota o sui le faitoto’a pito i tua o le maota, ma fa’alogoina ai loa le ta’alili o le si’ufofoga o le sui fofoga fetalai i le taimi lea.

“Tapuni le faitoto’a lena, alu i fafo, aua e te le mafaufau ma lou soli o le maota ae o loo tauaofia le fono a le atunu’u. Satini, tuli le tama le la i fafo”, o le alaga leotele atu lea a le sui fofoga fetalai ma vaaia ai le sao o le maota.

O le mataupu na mafua ai ona toe talanoaina tulafono a le maota, o le taimi o iloiloga a komiti ta’itasi, lea e talitonu isi faipule e tatau ona auai uma sui o le maota i iloiloga e atagia mai ai le galulue fa’atasi ma le lagolago i galuega fai, ae na taua e ni isi faipule, e tusa ai ma tulafono a le maota, e na o le komiti lava e auai i le iloiloga, a mae’a le iloiloga, ona fa’ailoa mai lea e le Komiti i luma o le maota tulaga sa oo i ai le iloiloga ma galuega fa’atino.

Na tula’i le sui ta’ita’i o le Komiti o Tulafono o le maota ia Vaetasi Tuumolimoli Saena Moliga ma toe fa’amanino le tatau lea ona mulimulita’i i tulafono a le maota, ina ia iloa ai o loo mamalu pea galuega fai a le Fono i aso ta’itasi.

“Ua lelei, o le a amata atu i le aso a taeao, a toe sau se faipule ua tuai mai i le taimi o le lotu, fa’atali i fafo se’i mae’a le faigalotu ona fa’atoa mafai lea ona ulufale i totonu o le maota, o le tulafono lena o loo i ai, ma ua tatau ona toe fa’amalosia”, o le saunoaga lea a le sui fofoga fetalai.

O le lagona o le sui fofoga fetalai e pei ona ia saunoa, e le o taumafai e a’oa’o sui mamalu o le atunu’u, ae o lona tiute o le fa’amanatu lea o tulafono o loo fa’afoe ai galuega a le fono.