Ads by Google Ads by Google

Taunu’u i le Ofisa Loia Sili mataupu fa’asaga Ta’ita’i se to’alua o le malo


Le Loia Sili a le malo ia Talauega Eleasalo Ale i le taimi na lulu aao ai ma le afioga i le Fofoga Fetalai ia Savali Talavou Ale ina ua mae’a se iloiloga sa molimau ai le Loia Sili i luma o le maota o sui i le tausaga nei. [ata AF]
ausage@samoanews.com

Na fa’amaonia mai e le Loia Sili a le malo i se fa’atalatalanoaga ma le Samoa News i le taeao ananafi, le tauaao aloaia lea e le Vaega e gafa ma le su’esu’eina o mataupu tau solitulafono a lona ofisa (prosecution division) ripoti mai le Ofisa o Leoleo, e fa’atatau i su’esu’ega o lo o a’afia ai suafa o ni isi o Ta’ita’i se to’alua o le atunu’u.

 

O le la’asaga lea o le a sosoo ai nei e pei ona saunoa le Loia Sili, o le tofia lea o se Loia Tuto’atasi (Independent Prosecution) na te fa’aauauina su’esu’ega e uiga i lenei mataupu. I lalo o le Tulafono, o le fa’amasinoga na te tofiaina le Loia Tuto’atasi e gafa ma le su’esu’eina o mataupu fa’apenei.

 

“Ou te fa’amaonia atu o lea ua taunu’u mai i lo’u Ofisa ripoti a Leoleo e fa’atatau i mataupu e pei ona aofia ai le suafa o le Fofoga Fetalai fa’apea ai ma le Ta’ita’i o le Ofisa a le ali’i kovana ia Fiu Saelua, ma o lo o galulue ai nei la’u vaega e su’esu’eina mataupu tau solitulafono mo le iloiloina o ia ripoti, ina ia mafai ona uia auala uma e tatau ona uia e tusa ai ma le tulafono”, o se saunoaga lea a Talauega Eleasalo Ale i se fa’atalatalanoaga ma le Samoa News i lona Ofisa i le taeao ananafi.

 

O lenei fa’atalatalanoaga na afua mai ina ua fia maua e le Samoa News se fa’amatalaga e tusa ai o le tulaga ua o o i ai le su’esu’eina o nei mataupu, ae o afea fo’i le taimi e taunu’u aloaia ai ia mataupu i luma o le Fa’amasinoga.

 

“O le tulafono e pei ona patino mai ai le faia o ni moliaga fa’asaga i ni ta’ita’i maualuluga o le malo, e ese fo’i le auala e tatau ona uia muamua. O le mea moni e tatau ona silafia e le atunu’u, soo se taimi e a’afia ai se tasi o i latou o lo o umia ni tofi maualuluga i le malo e pei la ona i ai mataupu ia ua fesiligia fa’asaga ia Fiu ma le Fofoga Fetalai, e oso mai ai lava lagona popole, ina ne’i fa’apea mai ni isi o le atunu’u ua i ai se tulaga fa’aauau, ae o le mea moni e tatau ona silafia, e leai ma se vaega a le Ofisa a le Loia Sili e faia i mataupu nei, ae o loo manino le tulafono e tatau ai ona filifilia se Loia Tuto’atasi na te su’esu’eina ituaiga mataupu fa’apenei”, o le saunoaga lea a Talauega i le Samoa News.

 

Saunoa atili le Loia Sili e fa’apea, o lea ua mae’a ona ia tu’uina atu le avanoa e fa’agaioi ai le su’esu’eina o ia mataupu, ma ua galulue lona Ofisa mo le fa’atinoina uma o vaega e tatau ona faia.

 

“Pau le tulaga ia silafia e le atunu’u, o lea ua taunu’u mai ripoti e tusa ai o ia mataupu i lo’u Ofisa, ae le o i ai se malosi i lo’u Ofisa e fa’amasinoina ai ia mataupu, ona o puipuiga i lalo o le tulafono ina ne’i tula’i mai ai se manatu ua fa’aituau lo’u Ofisa i le taulimaina o nei mataupu, o le mafua’aga lena e mana’omia ai le tofiaina o se loia tuto’atasi na te taulimaina ituaiga mataupu nei fa’asaga ia i latou o lo o umia tofiga maualuluga i le malo”, o le saunoaga lea a Talauega.

 

Na fa’amaonia mai e le Komesina o Leoleo ia Le’i Sonny Thompson i le Samoa News i le masina na te’a nei, le mae’a lea o su’esu’ega a Leoleo e uiga i mataupu ia e lua, ma ua tauaao atu la latou ripoti i luga o le Ofisa o le Loia Sili.

 

O le mataupu e pei ona su’esu’eina ai le suafa o le tofa Fiu, na afua mai i se tagi sa faila i le Ofisa o Leoleo i le masina o Tesema 2016, lea o lo o aofia ai tu’uaiga o le faia o gaioiga mataga (sexual assault) fa’apea ai ma le faia o sauaga (domestic abuse), e pei ona taua i se tusi sa tu’uina atu e Ipu Avegalio Lefiti i luma o le maota o sui, mo se avanoa e faia ai se su’esu’ega fa’asaga i le Komesina o Leoleo, i le tuai lea ona latou taulimaina o le mataupu e pei ona tu’uaia ai Fiu.

 

O lo o taua i se vaega o le tusi a Ipu le fa’aaoga e Fiu o lona malosi e oo atu ai i le Ofisa o Femalagaaiga, ma mafua ai ona aga’i atu sui o lea Ofisa ma aveese fa’amalosi mai le tama’ita’i o lo o tu’uaia o lo o a’afia i lenei mataupu fa’atasi ai ma lona to’alua, ae tipoti fa’amalosi i laua i Samoa.

 

Ae mo le mataupu o lo o a’afia ai le suafa o le Fofoga Fetalai ia Savali Talavou Ale, na afua mai i se ta’avale fou na aumai i le Ofisa o Tiute, ae tu’uaia ai le maua o vaega o fualaau fa’asaina, ae sa aumai i lalo o le suafa o Savali.

 

Na fa’amaonia mai e Savali i le Samoa News e faapea, o le ta’avale e pei ona fesiligia, o le ta’avale lea a le to’alua a lona afafine. Sa toe fa’amaonia atili mai fo’i e Savali i se talanoaga ma Tusitala i le vaiaso nei le mae’a lea ona tu’uina atu o lana fa’amatalaga i le vaega fa’amalosi tulafono e tusa ai o le ta’avale.