Na tumu tumu luga o le uafu tele i Fagatogo i ta’ita’i o Samoanalua, ta’ita’i fa’aleaganu’u aemaise ai o le to’atele o le atunu’u i Tutuila ma Manu’a na lolofi atu latou te molimauina le taunu’u aloaia mai i laufanua o Amerika Samoa i le taeao ananafi.

Sa auai i le polokalame mo le fa’ataliina o le taunu’u aloaia mai o le va’a o le MV Manu’atele le Ao mamalu o le malo Tuto’atasi o Samoa, afioga Tui Atua Tupua Tamasese Efi ma le masiofo ia Filifilia Tamasese, fa’apea ai le afioga i le ali’i Palemia, susuga Tuilaepa Lupesoliai Sailele Malielegaoi.

Sa fa’apea fo’i ona i ai le afioga i le ali’i kovana ia Lolo Matalasi Moliga ma le lutena kovana ia Lemanu Palepoi Mauga, o Ta’ita’i o le Fono Faitulafono ma sui o maota e lua, fa’apea le Failautusi o le Ofisa o Mataupu Tau Samoa ia Mauga Tasi Asuega, ma le mamalu lautele o le Faleagafulu ma le Manu’atele.

Na laulaututu le aofia ao aga’i mai va’a alo e lua fa’atasi ai ma fautasi o le God is Good ma le Sinapioa e fa’afeao le aga’i mai o le va’a o le Manu’atele i totonu o le ava, ao mulimuli mai ai i tua le va’a tuai a le malo, le MV Sili, ae o va’a tosova’a e lua i autafa.

O le toai taunu’u ai o le MV Manu’atele i luga o le uafu, lea na ta’ita’ia mai e le afioga i le Lutena Kovana ia Lemanu Palepoi Mauga, fa’apea ai ma le kapeteni ia Loleni Fai’ai ma le au va’a atoa, na momoli ai loa le viiga e fa’afetaia ai le ta’ita’iga a le Atua i le auva’a, lea na ta’ita’ia e le susuga i le ali’i faifeau ia Rev. Aukusitino Paaniani, ma viiga o le Atua na lagiina lea e le aufaipese a le Ekalesia Katoliko mai Aua, ma le aufaipese a le Ekalesia Metotisi mai Pava’ia’i.

O le saunoaga autu o le polokalame na saunoa i ai le afioga i le ali’i Kovana, lea na ia fa’afetaia ai Ta’ita’i o le Fono, o sui o le malo atoa ai ma le Ofisa o le Initeria i lo latou galulue fa’atasi ua mafai ai ona taunu’u le fa’amoemoe o le malo mo le fa’atauina lea o le Sa fou mo le itumalo o Manu’atele.

Na fa’afetai fa’apitoa fo’i le ali’i kovana i le Ao o le malo o Samoa ma le afioga i le ali’i Palemia, i le tu’uina mai pea lea o le tauau o le malo o Samoa e fesoasoani ai i atina’e i Tutuila ma Manu’a, aemaise lava i le tautua a le Fotu o Samoa mo le itumalo o Manu’a.

I le fa’aiuga o lana fa’afetai, sa ia tauaao atu ai tagavai o Amerika Samoa atoa ai ma le tagavai o le malo tele o Amerika na folau mai ai le Manu’atele, e fai meaalofa atu ai i le afioga i le Ao mamalu o le malo o Samoa ma le afioga i le ali’i Palemia.

“O le tagavai lenei a Amerika Samoa e fai meaalofa atu ai i le afioga Tui Atua, ae o le tagavai lenei a le malo tele o Amerika e fai meaalofa atu ai i lau afioga i le ali’i Palemia, e ui ua foliga masaesae tagavai, ae o le agaga atoa ia avea nei meaalofa e fa’amanatu ai pea lo tatou sootaga vavalalata, aemaise ai o le talosaga ina ia manatua pea e le ali’i Palemia le malo o Amerika Samoa i soo se taimi tou te fesaga’i ai ma le malo tele o Amerika”, o le saunoaga lea a le ali’i kovana.

Na fa’ai’u le fa’afetai a le ali’i kovana i lona fa’afetaia lea o le ali’i kapeteni ia Fai’ai ma le auva’a, ina ua mafai ona latou momoliina mai le sa o le atunu’u i ona laufanua, e aunoa ma se fa’aletonu na tula’i mai i luga o le va’a.

“Afai ua mafai ona outou aumaia le vaa o le malo mai Uosigitone le nofoaga mamao seia taunu’u mai i Amerika Samoa, o le ata vaaia fo’i lena e ta’u mai ai tou te mafaia ona fa’aauau le galuega i le lumana’i”, o le saunoaga lea a Lolo na tau fai patipati le mamalu o le aofia.

Sa ia fa’afetaia fo’i ali’i papalagi e to’a 4 sa malaga mai ai i le auva’a, o ali’i Inisinia fa’apitoa e to’atolu atoa ai ma le sui o le kamupani sa latou fausiaina le va’a, i lo latou naunau e fesoasoani i le auva’a atoa ai ma le malo o Amerika Samoa.

I le saunoaga puupuu a le ali’i kapeteni ia Fai’ai, sa ia fa’afetaia ai le tapuaiga a le atunu’u atoa, aemaise ai o talosaga ua mafai ai ona taunu’u manuia mai la latou faigamalaga.

Na tutulu le ali’i kapeteni ao ia fa’amatala le taimi na fesili atu ai le afioga i le Tama’ita’i Fa’atonusili o le Ofisa o Pulega o Taulaga ma Malaeva’alele ia Taimalelagi Dr. Claire Poumele ia te ia i Uosigitone, pe mafai ona ia aumaia le va’a i Amerika Samoa, lea fo’i sa ia tali i ai, “e leai se mea e faigata i le Atua”.

Na foa’i e le malo teutupe mo sui uma o le auva’a e fa’afetaia ai le galuega fita sa latou fa’atinoina. O fa’afiafiaga fa’a Samoa mai le autalavou Metotisi a Pava’ia’i ma fa’ai’u ai le polokalame.

O le fa’apaiaina o le Sa o le MV Manu’atele ua fuafua e fa’ataunu’uina i le aso Gafua o le vaiaso fou.