Tausinio sui e to’alua aufusu a le atunu’u i le ta’amilosaga i Ausetalia


To’alua alo o le atunu’u ua malaga i le ta’amilosaga o fusuaga o lo o fa’agasolo i Ausetalia i le masina nei, susuga Falaniko Tauta (itu agavale) ma Jeffrey Tago (itu taumatau), fa’atasi ai ma le la faiaoga afioga Sala Sanele Etuale (ogatotonu) e le o malaga, ae o loo malaga le sui Peresetene o le Asosi o Fusuaga a Amerika Samoa ia Okesene Malala e ave le aufusu i Ausetalia. [ata AF]
ausage@samoanews.com

E to’alua alo fusu o le atunu’u ua malaga atu nei e tausinio i le ta’amilosaga i toleniga fa’avaomalo a le Pasefika o lo o fa’agasolo i Ausetalia i le masina lenei, lea fo’i o lo o auai atu i ai aufusu mai isi atumotu o le Pasefika ua lauiloa i lenei ta’aloga e aofia ai Samoa, Fiti, Tonga ma Niu Sila.

 

O le aoauli o le aso Gafua o le vaiaso nei na tuua ai e le au malaga e to’atolu le atunu’u o lenei fa’amoemoe, i lalo o le ta’ita’iga a le sui peresetene o le Asosi o Fusuaga a Amerika Samoa, susuga Okesene Malala, atoa ai ma alo fusu e to’alua a le atunu’u, le susuga ia Falaniko Tauta ma Jeffrey Tago.

 

O Tauta o lo o tausinio i le aupaga o le welterweight ae o Tago o loo tausinio i le aupaga o le lightheavyweight.

 

O le tulaga maualuga sa i ai taumafaiga a nei alo o le atunu’u i le ta’amilosaga a le Oceania lea na talimalo ai Samoa i le masina o Fepuari na te’a nei, ina ua la manuaina pine auro mo le atunu’u, na mafua ai ona maua lo la avanoa e auai atu ai i lenei ta’amilosaga taua.

 

Na taua e le faiaoga o le Asosi o Fusuaga a Amerika Samoa, afioga Sala Sanele Etuale i le Samoa News e fa’apea, o le taua o le ta’amilosaga lea ua malaga atu i ai Tauta ma Tago, o le a mafai ai ona fa’alautele lo la iloa i le ta’aloga o le fusu, ma atili ai ona si’isi’i le tomai ma le iloga i le tulaga maualuga e tatau ona i ai le fa’atinoina o le ta’aloga.

 

“Ua maualuga le tulaga ua i ai tapenaga a le aufusu ua malaga atu i Ausetalia, ae o le agaga atoa o le Asosi o Fusuaga a Amerika Samoa, o le auai atu o alo o le atunu’u e fa’atasi ma tausinio i ta’amilosaga fa’avaomalo faapenei, o se avanoa lelei lea mo a tatou tama fusu e fa’alautele ai lo latou silafia i metotia eseese e fa’atino ai le ta’aloga”, o le saunoaga lea a Sala.

 

Ae na taua e le faiaoga a le aufusu, o ia fo’i lea o le Ta’ita’i malaga ia Malala i le lua vaiaso talu ai ao fa’agasolo mai tapenaga a le aufusu, o le itu taua i soo se tama fusu ia lava le malosi o le tino toe lelei le manava e fa’atino ai le ta’aloga i totonu o le mae’a.

 

O le ta’amilosaga a le Samoa Games sa fa’agasolo i Samoa i le masina o Tesema na te’a nei, fa’apea ai ma le taamilosaga a le Oceania sa faia i le masina o Fepuari o le tausaga nei i Samoa, o iina na molimauina ai le tulaga mataina ua i ai taumafaiga a Tauta ma Tago, e pei ona saunoa le afioga a Sala.

 

O le aso 28 o Aperila lea ua fa’amoemoe e toe taliu mai ai le au malaga i le atunu’u, ma o loo fa’amoemoe o le a i’u manuia taumafaiga a nei alo o le atunu’u i le ta’amilosaga e pei ona malaga atu i ai.

Comment Here