E tele naua fautuaga mai afioga i Faipule o le maota o sui sa tu’uina atu i le Komesina filifilia o le Matagaluega o le Puipuiga o le Saogalemu Lautele, i auala e fa’aleleia atili ai le tautua a le Ofisa o Leoleo i le atunu’u.

Saunoa Gafatasi Afalava e faapea, e tele naua fa’amatalaga salatua ua ia maua e fa’atatau i i isi o “leoleo” o loo a’afia i tulaga o fualaau fa’asaina, lea ua faigata ai i le Matagaluega ona foia le fa’afitauli e uiga i le fa’atupulaia o fualaau fa’asaina i le atunu’u.

“Saili Leoleo na e aveese ma le Ofisa o Leoleo, e leai se aoga, e leai fo’i se manuia o le matagaluega e maua mai ai, ae atili ai ona afaina le atunu’u”, o le saunoaga lea a Gafatasi.

I le 2 vaiaso lea na malolo ai le Fono Faitulafono, na taua ai e Gafatasi le maua o lona avanoa e asiasi ai i le toese i Tafuna, ma talatalanoa ai ma ni isi o le aufaigaluega o loo i ai, e uiga i tulaga o loo mana’omia le fa’aleleia i totonu o le nofoaga a le toese.

“Tele naua le manaoga o loo tula’i mai i le toese, e le o lava leoleo e vaavaaia pagota, atonu o le isi lea mafu’aaga o le sosola soo o pagota i tua, alofagia fo’i itula ova taimi o nai leoleo o loo galulue i le toese ina ia mautinoa e totogi i latou. Silasila ane fo’i i le ta’avale o loo feavea’i ai pagota, e na o le tasi le Van ae o le fa’afitauli fo’i e ta’e le isi tioata, e faigofie ai fo’i ona sola le pagota”, o fautuaga ia a Gafatasi i le Komesina fou o Leoleo.

Saunoa Faimealelei Anthony Fu’e Allen e fa’apea, o se tasi o fa’afitauli ua ia maitauina i luga o le alatele, o le tele o ta’avale o loo feoa’i ai sa le tatau ona pasia, o isi ta’avale e le ola moli, o isi ta’avale e matua le saogalemu lava mo le mamalu o le atunu’u, ae o loo pasia lava e le Ofisa o Ta’avale Afi a le malo i Tafuna.

“Silasila toto’a fo’i i totogi o Leoleo, ua to’atele naua Leoleo ua o ese ma le galuega ona e fa’aletonu totogi”, o le fautauga lea a Faimealelei.

O le fa’amalosia o tulafono e fa’atatau i le umia fa’asolitulafono o fualaau fa’asaina, na mafua ai ona fesili le afioga i le ali’i faipule ia Sataua Dr. Mataese Samuelu ia Le’i, pe tatau ona molimau sui o le Ofisa o Tiute o loo latou muamua maua fualaau fa’asaina o loo aumai fa’anana i pusa meli i taimi e fai ai iloiloga i luma o le fa’amasinoga, ina ia taofia ai le tula’i soo mai o le tulaga lea o le solofua e le fa’amasinoga o mataupu fa’asaga ia i latou o loo tu’uaia i le umia o fualaau fa’asaina.

Saunoa Le’i e fa’apea, e ui e tofu lava le Matagaluega ma latou matata e fa’atino, peita’i o es tulaga taua fo’i pe afai e manaomia le galulue fa’atasi o Ofisa o le malo i le fa’amalosia o tulafono ina ia mautinoa e mautu ma malosi mataupu o loo tu’uina atu i le fa’amasinoga.

Na fesili le afioga i le ali’i faipule ia Vailoata E. Amituana’i i le Komesina filifilia, poo fea ua fai i ai le falepuipui fou ua mafua ai ona fai ma sosola i tua pagota, ae na saunoa Le’i e fa’apea, o lea ua fa’aaoga e se vaega o pagota le falepuipui fou, peita’i o loo i ai lava nai vaega e moomia le fa’aleleia i le pa o loo si’omia ai le falepuipui.

“E pei ona silafia, e le faapea a pagota loa le tagata ona nofo pologa loa lea, leai, e i ai fo’i o latou aia tatau i lalo o le tulafono, pau le vaega e tatau ona fa’atino e le matagaluega o Leoleo, ia mautinoa le malu puipuia o nofoaga o loo loka ma taofia ai i latou nei”, o le saunoaga lea a Le’i.

O se tasi o polokalame na fa’afetaia e ni isi o Faipule e aofia ai Vui Florence Saulo ma Samelu Ioka Ale Meleisea, o le polokalame lea e vaavaaia ai e Leoleo fanau aoga i taimi e tuua ai aoga ina ia aua ne’i toe tula’i mai misa ma fusuaga i le va o fanau aoga.

Na faafetaia e le afioga a Vui le Sui Komesina o Leoleo ia Vaimaga Maiava ma lana aufaigaluega, i le fa’aauauina pea lea o le latou tautua lea mo aoga i le itu i sisifo o le atunu’u, e le gata ua taofia ai le tula’i soo mai o vevesi, ae o le saogalemu o fanau aoga i le taimi e tuua ai aoga.

Na taua e le to’atele o faipule lo latou fa’afetaia o le kovana ina ua ia tofia le tofa Le’i e avea ma Komesina o Leoleo. Na taua e ni isi o faipule e fa’apea, e ui e leai se tomai fa’aleoleo o le tofa Le’i e tatau ai ona avea o ia ma Komesina, ae o ona agava’a i soo se matata o le malo e aofia ai le fa’amalosia o tulafono, o se tasi lea o mafua’aga ua filifilia ai o ia e le kovana.

Sa fautuaina e le afioga i le ali’i faipule ia Vaetasi Tuumolimoli Moliga le tofa Le’i, ina ia vaavaai pe mafai ona tuu eseese auaunaga a vaega a le Fale Leoleo, Fale Fuimu atoa ai ma le Falepuipui, ina ia fa’a faigofie ai ona fa’aleleia auaunaga a vaega taitasi, ma aga’i ai lava le vaega ia e fa’atino a latou tautua.

Na faamaonia saunoaga a afioga i Faipule i lo latou lagolagoina lea o tofiga a le kovana mo Le’i e avea ma Komesina fou, ina ua tu’uina mai le fa’aiuga o le latou palota, e 18-0 i le aso Tofi na te’a nei, ae o le taeao nei na palota fulisia ai fo’i le Senate i le 16-0 e lagolago ai tofiga le kovana mo Le’i.