E foliga mai o lo o tele pea le mau fesili o lo o tu’u fesili ai le atunu’u fa’asaga i le mau fa’afitauli o lo o fetaia’i ma le toese i Tafuna i le taimi nei e le o mafai lava ona tali.

O nei mau fesili e le gata o lo o tu’u fesili ai le Fa’amasinoga a Amerika Samoa, ae o lo o tu’u fesili ai fo’i le atunu’u lautele aemaise aiga o i latou o lo o taofia ma tuli a latou fa’asalaga i totonu o le falepuipui.

O le soso’o ai o fa’alavelave e lua lea na alia’e mai i totonu o le 2 vaiaso ina ua manunu’a ni ali’i pagota se to’alua ina ua fa’ao’olima i ai isi pagota, ua fesiligia ai le tulaga saogalemu o pagota i totonu o potu o lo o taofia ai i latou mo le tuliina o a latou fa’asalaga, atoa ai ma le fa’aauau pea lea o le fa’afitauli ua tele tausaga o alia’e mai i le toese i Tafuna, o le to’alaiti lea o Leoleo e fa’atinoina le galuega.

O le afiafi o le aso na fa’amoemoe ai se tasi o Loia Sili lagolago mai le Ofisa o le Loia Sili a le malo e faia sana asiasiga i totonu o le toese i Tafuna, mo le fia mata’ituina o auala o lo o fa’atautaia ai galuega a Leoleo, atoa ai ma le tulaga o lo o taofia ai pagota ua fa’amaonia a latou solitulafono, atoa ai ma i latou o lo o fa’agasolo a latou fa’amasinoga.

E ui e lei o o atu lea asiasiga i le tulaga tonu e tatau ona i ai, peita’i na mafai lava e le Samoa News ona mata’ituina ni isi o vaaiga o lo o tutupu i totonu o le toese i Tafuna e tatau ona silafia e le atunu’u.

O ni isi o ia vaaiga e aofia ai le gasolo atu pea o aiga o i latou o lo o taofia i le toese e momoli atu meaai, lavalava, tupe, fa’apea ai ma vaega o lo o mana’omia e o latou aiga i aso o le vaiaso, e ese mai i le aso To’ona’i ma le aso Sa lea o lo o fa’atulaga ai asiga a pagota.

O le tulaga i asiga a pagota i fa’aiuga o vaiaso, o se tasi lea o faiga fa’avae a le toese i Tafuna ua mae’a ona tu’u atu i ai se fautuaga mai le afioga i le Fa’amasino Sili ia Michael Kruse fa’asaga i Loia a le malo ina ua iloiloina ni isi o mataupu tau solitulafono i luma o le fa’amasinoga, ina ia fautuaina le Komesina e toe silasila i le polokalame o asiga a pagota, ona o le isi lea auala o lo o masalomia le sao atu ai i totonu o le toese o vaega e le tatau ona i ai i le toese, e pei o telefoni ma laptop, atoa ai ma fualaau fa’asaina.

E fia fa’ailoa atu e le Samoa News e fa’apea, e silia i le 3 mataupu tau solitulafono ua mae’a ona tofu atu i luma o le fa’amasinoga, fa’asaga i ni isi o aiga o pagota o lo o taofia i le falepuipui sa molia e le malo, i lo latou taumafai lea e fa’aulufale fa’anana fualaau fa’asaina i totonu o le toese, peita’i e lei mafai ona sao i totonu ina ua maua e Leoleo a le toese i le taimi e siaki ai ato i luma o le faitoto’a ae o le’i o o atu i le tagata o le aiga.

O se tasi o mataupu na maua ai e Leoleo se afifi i totonu o se pea seevae koleni fou lava sa fa’amoemoe se fafine e ave ma lona to’alua sa taofia i le toese, o le isi mataupu na maua ai vaega o fualaau fa’asaina o nana atu i totonu o se pepa fasimoli sa fa’amoemoe e ave mo se tagata o lo o taofia i le falepuipui, ae o le isi mataupu na maua e Leoleo o le toese i le tafa o le ofu a se ali’i sa alu atu e asi se isi o lona aiga se afifi o lo o i ai sikaleti mariuana e 2 i totonu.

I le faitoto’a e ulufale ai i totonu o le toese i Tafuna, o lo o tiute ai ni ail’i pagota se to’alua ua fa’aigoaina, o i laua ua Fa’atuatuaina e Leoleo (Trustees) i le fa’atinoina lea o galuega ma fesoasoani i Leoleo i le vaaiga o le pa, fa’amamaina o le otaota, aemaise ai o le mata’ituina o tagata e aga’i atu i totonu o le toese.

E to’afa “Trustees” a le toese i Tafuna o lo o i ai i le taimi nei, o i latou fo’i ia o lo o tele lo latou sao i le fa’amamaina lea o galuega a Leoleo, e pei ona fa’amaonia mai e se tasi o Leoleo Sinia.

O i latou e taua o “Trustees”, e filifilia mai lea i tagata ua mae’a ona lau a latou fa’asalaga, ma ua toe lava o ni nai masina o lo o totoe o a latou fa’asalaga ona mae’a loa lea ona tuli o a latou taimi ma toe fo’i atu i o latou aiga.

“E iloilo lelei lava suafa o i latou e avea ma “Trustees”, e le gata o a latou fa’amaumauga ae o amio fo’i i totonu o le toese, o i latou fo’i ia ua mautinoa suiga ia latou amio, ma ua sauni fo’i e toe fo’i atu i tua i aiga”, o le saunoaga lea a se tasi o Leoleo Sinia i le Samoa News.

O le fesili pe fa’ataga i lalo o le tulafono ona tofia ni pagota ua ta’usala i solitulafono ona avea ma “Trustee” e feofeoa’i sa’oloto e pei fo’i o isi Leoleo, na soisoi se tasi o Leoleo o le toese ma saunoa mai e fa’apea, “Tailo ia te oe, ae pau lea o le auala o lo o maua ai e Leoleo le fesoasoani i le fa’atinoina o a latou galuega, ona e o o mai lava i le taimi nei e le o gafatia lava e le aofa’i o Leoleo o lo o i ai ona fa’atino le galuega”.

E tusa ai o se fa’amatalaga sa tu’uina mai i le Samoa News, e na o le to’atasi lava le Leoleo e tiute i le falepuipui fou lea ua ave i ai le silia i le to’a 70 o pagota ali’i mo le sifi e 12 itula, ma le isi to’atasi e tiute i le nofoaga o lo o i ai isi pagota mo le umi e 12 itula i le sifi.

Na taua e se tasi o Leoleo e fa’apea, “E le tau fesiligia le fa’afitauli ua tele tausaga o fetaia’i ma le toese i Tafuna, o le to’atele o pagota ae le lava Leoleo”.

Na taua e se tasi o pagota ua mae’a ona tuli lana fa’asalaga i le Samoa News e fa’apea, o le alofa o le Atua o lo o mafua ai ona leai ni fa’alavelave matuia ma mata’utia e tutupu mai i totonu o le toese, e mafua mai i le le lava o Leoleo.

Sa ia taua atili e fa’apea, talu ai o le lagona fa’a tagata Samoa o lo o fusia ai se vaega to’atele o Leoleo, o le isi lea mafua’aga o lo o mautinoa le saogalemu ai o soifua o nai ali’i ma tama’ita’i Leoleo o lo o galulue i le toese, peita’i e le avea le tulaga lea e fa’atamala ai le malo i le tatau lea ona to’atele ni Leoleo e galulue mo le tausia atoa ai ma le vaaia lelei o pagota.