Tele fesili atunu’u e fa’atatau i le aoga e fa’aaupega ai Leoleo


Komesina o Leoleo, tofa Le’i S. Thompson [ata AF]
ausage@samoanews.com

Ua to’atele ni isi o le mamalu lautele o le atunu’u ua fa’aalia a latou finagalo eseese e fa’atatau i le aoaoga lea ua fa’atinoina e le Matagaluega o Leoleo, e mafai ai ona agava’a ali’i ma tama’ita’i Leoleo i le tauaveina o a’upega a o fa’atino ai a latou tiute tauave i le aso ma le po.

 

Na taua e ni isi o le atunu’u i le Samoa News e fa’apea, e le tatau ona fa’aaupegaina Leoleo o le malo, se’i vagana ua tu’uina atu e le Fono Faitulafono se fa’atanaga latou te fa’atinoina ai lea fo’i tulaga o le latou galuega.

 

Ae na taua e ni isi sa galulue muamua fo’i i le Ofisa o Leoleo e fa’apea, e leai ni fa’alavelave matuia ua tutupu i le atunu’u e ono aloaia ai le tatau lea ona fa’aaupega Leoleo. E ui lava fo’i sa i ai fa’alavelave na tutupu i taimi ua tuana’i, e pei o le fa’alavelave lea na tagatavaleina ai se ali’i Leoleo i le silia i le 6 tausaga talu ai, ae i ai le talitonuga e le o ni fa’alavelave na tutupu sosoo nei ituaiga fa’alavelave, ae na o le tasi lava le taimi na tula’i mai ai.

 

Ae i se fa’atalatalanoaga ma le afioga il e Komesina o Leoleo i le vaiaso na te’a nei, na fa’amanino ai e le tofa i le tootoo ia Le’i S. Thompson le malosi ua tuuina atu e le Tulafono i le Komesina, na te saunia ai se ata faataoto o ni aoaoga e fa’aaupegaina ai Leoleo, ma tu’uina atu i le ofisa o le Kovana mo le fa’amaoniaina.

 

“O lo o i ai i le Ulutala 46 o le Tulafono le malosiaga ua tuuina mai i le Komesina, na te saunia ai ni polokalame e fa’ataoto ai ni aoaoga e fa’aaupegaina ai Leoleo, ina ia tuuina atu i le Kovana e silasila i ai ma fa’amaonia. Ua mae’a ona ou fa’atinoina ia tulaga uma ma ua faamaonia e le Kovana, o le mafua’aga fo’i lena ua ala ai ona faia aoaoga mo Leoleo,” o le saunoaga lea a Le’i.

 

O le vaiaso na te’a nei na fa’amae’aina ai se aoaoga e 2 vaiaso sa fa’agasolo i le potu fono a le Ofisa o Ta’avale afi i Tafuna, e a’otauina ai ali’i ma tama’ita’i Leoleo i auala e fa’aaoga ai a’upega eseese e tete’e atu ai i tagata fa’atupu fa’alavelave atoa ai ma le fa’atinoina o solitulafono eseese.

 

O le aso Tofi ma le aso Faraile na te’a nei, ina ua mae’a aoaoga tusitusi sa faia i totonu o le potu mole silia i le vaiaso, na fa’atinoina ai loa le vaega mulimuli o le aoaoga, e ala i le fa’aaogaina lea o le a’upega malosi poo le fana.

 

O lenei aoaoga sa fa’atinoina e le Faiaoga, susuga Ernie Haleck, o se ali’i Leoleo ua malolo litaea mai le Ofisa o Leoleo i Los Angles (LAPD), ma ua avea nei o ia o se Faiaoga faapitoa mo le a’oa’oina o auala e fa’aaoga ai e Leoleo ia a’upega, lea o lo o fa’atupeina e le vaega a le Feterale.

 

Silia i le to’a 30 Leoleo ma Ta’ita’i na auai i le aoaoga sa faia i Aoloau i le vaiaso na te’a nei. O i latou sa auai e aofia ai le Komesina o Leoleo; o le Lutena Kovana ia Lemanu Peleti Mauga; o le Faatonusili o le Ofisa o le Puipuiga ia Samana S.Ve’ave’a, fa’apea ai ma Ta’ita’i Sinia o le Ofisa o Leoleo.

 

Saunoa Le’i e fa’apea, e le o Leoleo uma e fa’aaupegaina, ae se’i vagana ai lava i latou o le a pasia aloaia a latou suega ma aoaoga, o i latou ia o le a tauaao atu i ai aupega latou te fa’aaogaina i soo se taimi e fa’atino ai a latou galuega, aemaise ai lava le Vaega Faapitoa lea ua galulue mo le sailia o i latou o lo o umia ma tagofia fualaau fa’asaina i le atunu’u (Vice & Narcotics Tactics Team).

 

Saunoa atili le Komesina e fa’apea, ua i ai fa’alavelave ua tutupu i le atunu’u ua alaga tatau ai ona fa’aaupega Leoleo.

 

“Ua silafia uma e le atunu’u le ali’i Leoleo na tagatavaleina, o le faalavelave na tafana ai le ofisa o Leoleo i Leone, ma le fa’alavelave lea na fana ai foliga o se ali’i Leoleo i le 2 tausaga talu ai, o nei uma fa’alavelave na tutupu e aunoa ma ni a’upega na fa’aaoga e Leoleo e tali atu ai,” o le saunoaga lea a Le’i.

 

O le vaiaso fou lea ua fa’amoemoe e faia ai le sauniga faapitoa e tufatufa aloaia ai tusi pasi o Leoleo uma ua pasi a latou suega, ma aloaia loa lo latou tauaveina o aupega i soo se taimi e galulue ai.

Comment Here