O le ali’i pagota lea na musu e tula’i i luma o le fa’amasinoga fa’aitumalo i le amataga o le masina nei, i le mae’a ai lea ona sainia e le fa’amasinoga o se poloaiga e pu’e fa’apagota ai o ia, ua toe a’afia nei fo’i o ia i le tulafono, ina ua faila e le malo se mataupu fou fa’asaga ia te ia.

O le mataupu fou fa’asaga ia Michael Agasiva, e alia’e mai i se fa’alavelave na tula’i mai i le po o le tausaga fou na mae’a atu nei, ina ua ia ulufale fa’amalosi i totonu o se fale o se tama’ita’i ma faia i ai uiga mataga.

I fa’amaumauga a le fa’amasinoga o lo o taua ai e fa’apea, o le taeao o le aso 1 Ianuari 2017 na talosagaina ai e le tama’itai na a’afia le Ofisa o Leoleo i Leone mo se fesoasoani, ma aga’i atu ai loa Leoleo e tali i le valaau.

Na taunu’u Leoleo i le nofoaga na tula’i mai ai le fa’alavelave ma latou fetaia’i ai ma le tama’ita’i na a’afia, o lo o tagi ma mafatia lona mafaufau e tusa ai o le fa’alavelave sa tula’i mai.

Na taua e le tama’ita’i na a’afia i Leoleo e fa’apea, sa faia se fiafia a le latou aiga i le po o le tausaga fou i le fale o se tasi o ona tausoga (cousin), ae pe tusa o le itula e 5:00 pe 6:00 fo’i i le taeao, na ia tuua ai loa le fiafia ae alu i le fale e fai sina malologa, ma alu atu ai loa ua moe i luga o le nofoa o loo i luma o le potu malolo, ae o le taimi lea o lo o i ai pea lava lana fanau i totonu o le fale.

I se taimi o le taeao lava lea ina ua aga’i ese lana fanau, sa galo ia tei latou ona loka le faitoto’a o le fale.

A o ia moe i luga o le nofoa, sa fa’afuase’i ona ia fa’alogoina se tagata o loo ia faia ni uiga mataga ia te ia, e aofia ai ma le tagofia o lona itutinosa, ae ina ua ia ala i luga, sa ia vaaia ai le ua molia o loo taoto atu i ona luga, o lea na ia una’i ese ai loa o ia ma palauvale i ai ma fai i ai e alu ese ma le fale.

Ina ua mae’a ona tuli ese e le na a’afia le ua molia i fafo mai lona fale, sa ia savali atu ai loa ma loka le faitoto’a o le fale, ae vili loa Leoleo mo se fesoasoani.

Na taua e le tama’ita’i na a’afia i Leoleo e fa’apea, e leai se fa’atanaga na ia tu’uina atu ia Agasiva e alu atu ai i totonu o le fale.

E le i mana’o le ua molia e faia sana fa’amatalaga i Leoleo ina ua fesiligia o ia e tusa ai o lenei fa’alavelave.

O le vaiaso nei lea ua fa’atulaga e faia ai le ulua’i iloiloga o le mataupu a Agasiva i luma o le fa’amasinoga fa’aitumalo, mo le iloiloina lea e le fa’amasinoga o mau a le malo, pe lava ma totoe e fa’amaonia ai sa soli se vaega o le tulafono, ae pe o Agasiva fo’i lea o lo o tu’uaia i le soliina o le tulafono.

O moliaga o lo o tu’uaia ai e le malo ia Agasiva e aofia ai moliaga mamafa e lua o le talepe falei le tulaga lua, tagofia o itutinosa o se tama’ita’i i le tulaga muamua, fa’apea ai ma moliaga mama e lua o le tu fua i le fale o se isi aiga, fa’apea ai ma le fa’ao’olima i le tulaga tolu.

E $5,000 le vaega tupe lea ua fa’atulaga e le fa’amasinoga e totogi ona fa’atoa mafai lea ona tatala Agasiva i tua mai le toese i Tafuna.

O le tausaga na te’a nei na fa’atoa magalo ai i tua mai le toese i Tafuna ia Agasiva, i le mae’a ai lea o le tuliina o lana fa’asalaga fa’a falepuipui e 5 tausaga, ina ua ta’usala o ia e le fa’amasinoga maualuga i le moliaga mamafa o le fa’ao’olima i le tulaga lua, e mafua mai i le fa’alavelave lea na ia fa’aaoga ai le pito o se agaese e fa’ao’o ai manu’a i se isi ali’i i le aso 29 Setema 2009 i Amaluia.